ਬੀਜਾਪੁਰ ''ਚ ਨਕਸਲਵਾਦ ਨੂੰ ਵੱਡਾ ਝਟਕਾ, 52 ਮਾਓਵਾਦੀਆਂ ਨੇ ਕੀਤਾ ਆਤਮ-ਸਮਰਪਣ

ਨੈਸ਼ਨਲ ਡੈਸਕ : ਛੱਤੀਸਗੜ੍ਹ ਦੇ ਬੀਜਾਪੁਰ ਜ਼ਿਲ੍ਹੇ ਵਿੱਚ ਨਕਸਲਵਾਦ ਦੇ ਖਾਤਮੇ ਦੀ ਦਿਸ਼ਾ ਵਿੱਚ ਸੁਰੱਖਿਆ ਬਲਾਂ ਨੂੰ ਇੱਕ ਵੱਡੀ ਸਫਲਤਾ ਹਾਸਲ ਹੋਈ ਹੈ। ਵੀਰਵਾਰ ਨੂੰ ਦੱਖਣੀ ਸਬ-ਜ਼ੋਨਲ ਬਿਊਰੋ ਨਾਲ ਸਬੰਧਤ 52 ਮਾਓਵਾਦੀਆਂ ਨੇ ਹਿੰਸਾ ਦਾ ਰਾਹ ਤਿਆਗ ਕੇ ਸਰਕਾਰ ਅੱਗੇ ਆਤਮ-ਸਮਰਪਣ ਕਰ ਦਿੱਤਾ। ਇਨ੍ਹਾਂ ਸਾਰੇ ਮਾਓਵਾਦੀਆਂ 'ਤੇ ਉਨ੍ਹਾਂ ਦੇ ਅਹੁਦੇ ਅਤੇ ਸੰਗਠਨ ਵਿੱਚ ਭੂਮਿਕਾ ਦੇ ਆਧਾਰ 'ਤੇ ਕੁੱਲ 1.41 ਕਰੋੜ ਰੁਪਏ ਦਾ ਇਨਾਮ ਐਲਾਨਿਆ ਸੀ।

21 ਮਹਿਲਾ ਕੈਡਰ ਵੀ ਸ਼ਾਮਲ 
ਪੁਲਸ ਅਨੁਸਾਰ, ਆਤਮ-ਸਮਰਪਣ ਕਰਨ ਵਾਲੇ 52 ਮਾਓਵਾਦੀਆਂ ਵਿੱਚ 21 ਮਹਿਲਾਵਾਂ ਅਤੇ 31 ਪੁਰਸ਼ ਕੈਡਰ ਸ਼ਾਮਲ ਹਨ। ਇਹ ਸਾਰੇ ਮਾਓਵਾਦੀ ਡੀ.ਵੀ.ਸੀ.ਐਮ (DVCM), ਪੀ.ਪੀ.ਸੀ.ਐਮ (PPCM), ਏ.ਸੀ.ਐਮ (ACM), ਪਲਾਟੂਨ ਕਮਾਂਡਰ ਅਤੇ ਜਨਤਾਨਾ ਸਰਕਾਰ ਦੇ ਪ੍ਰਧਾਨ ਵਰਗੇ ਮਹੱਤਵਪੂਰਨ ਅਹੁਦਿਆਂ 'ਤੇ ਤਾਇਨਾਤ ਸਨ। ਇਨ੍ਹਾਂ ਨੇ ਭਾਰਤੀ ਸੰਵਿਧਾਨ ਵਿੱਚ ਆਪਣੀ ਆਸਥਾ ਪ੍ਰਗਟਾਈ ਹੈ ਅਤੇ ਲੋਕਤੰਤਰੀ ਵਿਵਸਥਾ ਵਿੱਚ ਸਤਿਕਾਰਯੋਗ ਜੀਵਨ ਜਿਊਣ ਦਾ ਸੰਕਲਪ ਲਿਆ ਹੈ।

ਸਰਕਾਰ ਦੀਆਂ ਨੀਤੀਆਂ ਦਾ ਅਸਰ 
ਬੀਜਾਪੁਰ ਦੇ ਪੁਲਿਸ ਕਪਤਾਨ ਡਾ. ਜਤਿੰਦਰ ਕੁਮਾਰ ਯਾਦਵ ਨੇ ਦੱਸਿਆ ਕਿ ਇਹ ਸਫਲਤਾ ਰਾਜ ਦੀ ਪੁਨਰਵਾਸ ਨੀਤੀ 'ਪੂਨਾ ਮਾਰਗੇਮ' (ਨਵਾਂ ਰਸਤਾ) ਅਤੇ 'ਮੇਰਾ ਸੁੰਦਰ ਪਿੰਡ' (ਨਿਯੋਦ ਨੇਲਾਨਾਰ) ਵਰਗੀਆਂ ਯੋਜਨਾਵਾਂ ਦੇ ਨਾਲ-ਨਾਲ ਸੁਰੱਖਿਆ ਬਲਾਂ ਦੇ ਨਿਰੰਤਰ ਯਤਨਾਂ ਦਾ ਨਤੀਜਾ ਹੈ। ਪੁਨਰਵਾਸ ਪ੍ਰਕਿਰਿਆ ਦੇ ਤਹਿਤ, ਹਰੇਕ ਕੈਡਰ ਨੂੰ ਤੁਰੰਤ ਸਹਾਇਤਾ ਵਜੋਂ 50,000 ਰੁਪਏ ਦੀ ਆਰਥਿਕ ਸਹਾਇਤਾ ਪ੍ਰਦਾਨ ਕੀਤੀ ਗਈ ਹੈ।

ਸੁਰੱਖਿਆ ਬਲਾਂ ਦੀ ਸਾਂਝੀ ਕਾਰਵਾਈ 
ਇਸ ਪ੍ਰਾਪਤੀ ਵਿੱਚ ਡੀ.ਆਰ.ਜੀ. (DRG), ਐਸ.ਟੀ.ਐਫ. (STF), ਕੋਬਰਾ (CoBRA), ਬਸਤਰ ਫਾਈਟਰਜ਼ ਅਤੇ ਕੇਂਦਰੀ ਰਿਜ਼ਰਵ ਪੁਲਿਸ ਬਲ (CRPF) ਦੀਆਂ ਬਟਾਲੀਅਨਾਂ ਦੀ ਸਾਂਝੀ ਭੂਮਿਕਾ ਰਹੀ ਹੈ। ਪੁਲਸ ਦੇ ਅੰਕੜਿਆਂ ਅਨੁਸਾਰ, 1 ਜਨਵਰੀ 2024 ਤੋਂ ਹੁਣ ਤੱਕ ਇਕੱਲੇ ਬੀਜਾਪੁਰ ਜ਼ਿਲ੍ਹੇ ਵਿੱਚ 824 ਮਾਓਵਾਦੀ ਮੁੱਖ ਧਾਰਾ ਵਿੱਚ ਪਰਤ ਚੁੱਕੇ ਹਨ, ਜਦੋਂ ਕਿ 1126 ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ ਅਤੇ 223 ਮੁਕਾਬਲਿਆਂ ਵਿੱਚ ਮਾਰੇ ਗਏ ਹਨ।
ਜ਼ਿਕਰਯੋਗ ਹੈ ਕਿ ਹਾਲ ਹੀ ਵਿੱਚ ਸੁਕਮਾ ਜ਼ਿਲ੍ਹੇ ਵਿੱਚ ਵੀ 7 ਮਹਿਲਾਵਾਂ ਸਮੇਤ 26 ਹਾਰਡਕੋਰ ਨਕਸਲੀਆਂ ਨੇ ਆਤਮ-ਸਮਰਪਣ ਕੀਤਾ ਸੀ, ਜਿਨ੍ਹਾਂ 'ਤੇ 64 ਲੱਖ ਰੁਪਏ ਦਾ ਇਨਾਮ ਸੀ। ਪੁਲਿਸ ਅਧਿਕਾਰੀਆਂ ਨੇ ਹੋਰ ਮਾਓਵਾਦੀਆਂ ਨੂੰ ਵੀ ਹਿੰਸਾ ਛੱਡ ਕੇ ਮੁੱਖ ਧਾਰਾ ਵਿੱਚ ਪਰਤਣ ਦੀ ਅਪੀਲ ਕੀਤੀ ਹੈ।\

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e