ਭਵਾਨੀਗੜ੍ਹ: ਅੱਜ ਫ਼ਿਰ ਦਿਨ-ਦਿਹਾੜੇ ਹੀ ਇਕ ਦੁਕਾਨ ’ਚ 15 ਹਜ਼ਾਰ ਰੁਪਏ ਦੀ ਨਕਦੀ ਉਡਾਈ, ਲੋਕਾਂ ’ਚ ਦਹਿਸ਼ਤ ਦਾ ਮਾਹੋਲ
02/28/2021 4:23:19 PM
ਭਵਾਨੀਗੜ੍ਹ (ਕਾਂਸਲ): ਸਥਾਨਕ ਸ਼ਹਿਰ ਵਿਖੇ ਸਰਗਰਮ ਚੋਰ ਗਿਰੋਹ ਵੱਲੋਂ ਸ਼ਹਿਰ ’ਚ ਲਗਾਤਾਰ ਚੋਰੀ ਦੀਆਂ ਘਟਨਾਵਾਂ ਨੂੰ ਅੰਜਾਮ ਦਿੱਤੇ ਜਾਣ ਕਾਰਨ ਸ਼ਹਿਰ ਨਿਵਾਸੀਆਂ ’ਚ ਭਾਰੀ ਡਰ ਅਤੇ ਦਹਿਸ਼ਤ ਦਾ ਮਾਹੋਲ ਪਾਇਆ ਜਾ ਰਿਹਾ ਹੈ। ਅੱਜ ਫਿਰ ਦਿਨ ਦਿਹਾੜੇ ਹੀ ਬਲਿਆਲ ਰੋਡ ਉਪਰ ਇਕ ਮੋਟਰਸਾਇਕਲ ਉਪਰ ਸਵਾਰ ਹੋ ਕੇ ਆਏ ਇਕ ਚੋਰ ਵੱਲੋਂ ਇਕ ਦੁਕਾਨ ਦੇ ਸ਼ੀਸ਼ੇ ਵਾਲੇ ਗੇਟ ਦਾ ਲਾਕ ਤੋੜ ਕੇ ਦੁਕਾਨ ’ਚੋਂ 15 ਹਜ਼ਾਰ ਰੁਪੈ ਦੇ ਕਰੀਬ ਦੀ ਨਗਦੀ ਚੋਰੀ ਕਰਕੇ ਰਫੂ ਚੱਕਰ ਹੋ ਜਾਣ ਦਾ ਸਮਾਚਾਰ ਪ੍ਰਾਪਤ ਹੋਇਆ।
ਇਸ ਘਟਨਾ ਸਬੰਧੀ ਜਾਣਕਾਰੀ ਦਿੰਦਿਆਂ ਬੰਟੀ ਕਰਿਆਨਾ ਸਟੋਰ ਦੇ ਮਾਲਕ ਬੰਟੂਪਾਲ ਕਾਂਸਲ ਨੇ ਦੱਸਿਆ ਕਿ ਉਹ ਅੱਜ ਦੁਪਹਿਰ ਸਮੇਂ 2:20 ਮਿੰਟ ਉਪਰ ਆਪਣੀ ਦੁਕਾਨ ਦਾ ਸ਼ੀਸ਼ੇ ਵਾਲਾ ਗੇਟ ਲਾਕ ਕਰਕੇ ਦੁਕਾਨ ਦੇ ਹੀ ਪਿਛੇ ਬਣੇ ਆਪਣੇ ਮਕਾਨ ਅੰਦਰ ਗਿਆ ਸੀ ਅਤੇ ਕੁਝ ਹੀ ਮਿੰਟਾਂ ਬਾਅਦ ਜਦੋਂ ਉਹ ਦੁਕਾਨ ’ਚ ਵਾਪਸ ਆਇਆ ਤਾਂ ਦੇਖਿਆਂ ਕਿ ਉਸ ਦੀ ਦੁਕਾਨ ਦਾ ਸ਼ੀਸ਼ੇ ਵਾਲਾ ਗੇਟ ਅਤੇ ਕਾਊਂਟਰ ਵਿਚਲਾ ਪੈਸਿਆਂ ਵਾਲਾ ਦਰਾਜ ਦੋਵੇ ਖੁੱਲ੍ਹਾ ਪਿਆ ਸਨ ਅਤੇ ਦਰਾਜ ’ਚੋਂ 15 ਹਜਾਰ ਰੁਪਏ ਦੇ ਕਰੀਬ ਦੀ ਨਕਦੀ ਗਾਇਬ ਸੀ। ਜੋ ਕੋਈ ਅਣਪਛਾਤਾ ਵਿਅਕਤੀ ਚੋਰੀ ਕਰਕੇ ਲੈ ਗਿਆ ਹੈ। ਇਸ ਘਟਨਾ ਦੀ ਸੂਚਨਾ ਉਨ੍ਹਾਂ ਸਥਾਨਕ ਪੁਲਸ ਨੂੰ ਦਿੱਤੀ।
ਮੌਕੇ ’ਤੇ ਪਹੁੰਚੀ ਪੁਲਸ ਪਾਰਟੀ ਨੇ ਘਟਨਾ ਦਾ ਜਾਇਜ਼ਾ ਲਿਆ ਅਤੇ ਨਾਲ ਹੀ ਉਸ ਦੇ ਗੁਆਂਢ ’ਚ ਸਥਿਤ ਇਕ ਹੋਰ ਦੁਕਾਨ ਦੇ ਬਾਹਰ ਲੱਗੇ ਸੀ.ਸੀ.ਟੀ.ਵੀ. ਕੈਮਰਿਆਂ ਨੂੰ ਘੋਗਲਿਆਂ ਤਾਂ ਦੇਖਿਆਂ ਕਿ ਮੋਟਰਸਾਇਕਲ ਉਪਰ ਸਵਾਰ ਹੋ ਕੇ ਆਇਆ ਇਕ ਵਿਅਕਤੀ ਜਿਸ ਦਾ ਮੂੰਹ ਰੂਮਾਲ ਨਾਲ ਢੱਕਿਆ ਹੋਇਆ ਸੀ ਉਸ ਦੀ ਦੁਕਾਨ ਦੇ ਅੰਦਰ ਦਾਖਲ ਹੁੰਦਾ ਹੈ ਅਤੇ ਦੋ ਮਿੰਟਾਂ ਬਾਅਦ ਹੀ ਉਹ ਦੁਕਾਨ ਤੋਂ ਬਾਹਰ ਆ ਕੇ ਉਥੋਂ ਆਪਣੇ ਮੋਟਰਸਾਇਕਲ ਉਪਰ ਫਰਾਰ ਹੋ ਜਾਂਦਾ ਹੈ। ਸ਼ਹਿਰ ਨਿਵਾਸੀਆਂ ਨੇ ਜ਼ਿਲਾ ਪੁਲਸ ਮੁਖੀ ਤੋਂ ਮੰਗ ਕੀਤੀ ਕਿ ਇਸ ਚੋਰ ਗਿਰੋਹ ਨੂੰ ਜਲਦ ਤੋਂ ਜਲਦ ਕਾਬੂ ਕੀਤਾ ਜਾਵੇ।
