ਹਾਦਸਿਅਾਂ ’ਚ 1 ਵਿਅਕਤੀ ਦੀ ਮੌਤ, ਕਈ ਫੱਟੜ

ਜਲਾਲਾਬਾਦ, (ਸੇਤੀਆ, ਬੰਟੀ)– ਥਾਣਾ ਸਦਰ ਜਲਾਲਾਬਾਦ ਦੀ ਪੁਲਸ ਨੇ ਸਡ਼ਕ ਹਾਦਸੇ ’ਚ ਮੋਟਰਸਾਈਕਲ ਚਾਲਕ ਦੀ ਹੋਈ ਮੌਤ ਦੇ ਮਾਮਲੇ ’ਚ ਟਰੱਕ ਚਾਲਕ ਖਿਲਾਫ ਧਾਰਾ 304 ਏ ਐਕਟ ਅਧੀਨ ਮਾਮਲਾ ਦਰਜ ਕਰ ਲਿਆ ਹੈ। ਪੁਲਸ ਨੂੰ ਦਿੱਤੇ ਬਿਆਨਾਂ ’ਚ ਸੋਨਾ ਸਿੰਘ ਪੁੱਤਰ ਇੰਦਰ ਸਿੰਘ ਨੇ ਦੱਸਿਆ  ਕਿ 22 ਦਸੰਬਰ ਨੂੰ ਕਰੀਬ ਸਾਢੇ 11 ਵਜੇ ਉਹ ਅਤੇ ਉਸ ਦਾ ਭਰਾ ਆਪਣੇ-ਆਪਣੇ ਮੋਟਰਸਾਈਕਲ ’ਤੇ ਸਵਾਰ ਹੋ ਕੇ ਜਾ ਰਹੇ ਸੀ ਕਿ ਪਿੰਡ ਭੰਬਾ ਵੱਟੂ ਨਜ਼ਦੀਕ ਇਕ ਟਰੱਕ ਨੇ ਬਡ਼ੀ ਹੀ ਲਾਪ੍ਰਵਾਹੀ ਨਾਲ ਉਸ ਦੇ  ਭਰਾ ਦੇ ਮੋਟਰਸਾਈਕਲ ਨੂੰ ਟਰੱਕ ਮਾਰ ਦਿੱਤੀ, ਜਿਸ ’ਚ ਉਸ ਦੇ ਭਰਾ ਕਾਲਾ ਸਿੰਘ ਦੀ ਸੱਟਾਂ ਲੱਗਣ ਕਰ ਕੇ ਮੌਤ ਹੋ ਗਈ ਅਤੇ ਟਰੱਕ ਡਰਾਈਵਰ ਮੌਕੇ ਤੋਂ ਫਰਾਰ ਹੋ ਗਿਆ।
 ਅਬੋਹਰ, (ਰਹੇਜਾ, ਸੁਨੀਲ)– ਪਹਿਲੀ ਧੁੰਦ ਨੇ ਸੋਮਵਾਰ ਅਚਾਨਕ ਦਸਤਕ ਦਿੱਤੀ ਤਾਂ ਵੱਖ-ਵੱਖ ਸਡ਼ਕਾਂ ’ਤੇ ਵਾਹਨਾਂ ਦੀ ਟੱਕਰ ਨਾਲ ਅੱਧਾ ਦਰਜਨ ਤੋਂ ਉਪਰ ਲੋਕ ਫੱਟਡ਼ ਹੋ ਗਏ, ਜਿਨ੍ਹਾਂ ’ਚੋਂ ਇਕ ਦੀ ਹਾਲਤ ਨੂੰ ਗੰਭੀਰ ਵੇਖਦੇ ਹੋਏ ਰੈਫਰ ਕਰ ਦਿੱਤਾ ਗਿਆ, ਜਦਕਿ ਹੋਰ ਫੱਟਡ਼ਾਂ ਨੂੰ ਸਮਾਜ-ਸੇਵੀ ਸੰਸਥਾ ਨਰ ਸੇਵਾ ਨਾਰਾਇਣ ਸੇਵਾ ਸੰਮਤੀ ਦੇ ਸਹਿਯੋਗ ਨਾਲ ਹਸਪਤਾਲ ’ਚ ਦਾਖਲ ਕਰਵਾਇਆ ਗਿਆ ਹੈ। ਜਾਣਕਾਰੀ ਅਨੁਸਾਰ ਪਿੰਡ ਗਿੱਦੜਾਂਵਾਲੀ ਦੇ ਨੇਡ਼ੇ ਬੀਤੀ ਰਾਤ 2 ਟਰੱਕ ਆਪਸ ’ਚ ਟਕਰਾ ਗਏ, ਜਿਸ ਕਾਰਨ ਗੰਗਾਨਗਰ ਤੋਂ ਅਬੋਹਰ ਆ ਰਹੇ ਇੰਦਰਾ ਨਗਰੀ ਗਲੀ ਨੰਬਰ 6 ਵਾਸੀ ਨੰਦ ਲਾਲ ਪੁੱਤਰ ਪ੍ਰੇਮ ਕੁਮਾਰ ਅਤੇ ਸ਼ੇਰੂ ਪੁੱਤਰ ਰਣਜੀਤ ਸਿੰਘ ਗੰਭੀਰ ਰੂਪ ਨਾਲ ਫੱਟਡ਼ ਹੋ ਗਏ, ਜਦਕਿ ਮੁਕਤਸਰ ਤੋਂ ਗੰਗਾਨਗਰ ਟਰੱਕ ’ਚ ਜਾ ਰਿਹਾ ਮੁਕਤਸਰ ਵਾਸੀ ਮੰਗਾ ਸਿੰਘ ਪੁੱਤਰ ਬਲਦੇਵ ਸਿੰਘ ਵੀ ਫੱਟਡ਼ ਹੋ ਗਿਆ। ਸੂਚਨਾ ਮਿਲਣ ’ਤੇ ਸਮਾਜ-ਸੇਵੀ ਸੰਸਥਾ ਨਰ ਸੇਵਾ ਨਰਾਇਣ ਸੇਵਾ ਦੇ ਮੈਂਬਰ ਸੋਨੂ ਗਰੋਵਰ ਮੌਕੇ ’ਤੇ ਪੁੱਜੇ ਅਤੇ ਫੱਟਡ਼ਾਂ ਨੂੰ ਆਲੇ-ਦੁਆਲੇ ਦੇ ਲੋਕਾਂ ਦੀ ਮਦਦ ਨਾਲ ਸਰਕਾਰੀ ਹਸਪਤਾਲ ਪਹੁੰਚਾਇਆ, ਜਿਥੇ ਡਾਕਟਰਾਂ ਨੇ ਸ਼ੇਰੂ ਦੀ ਹਾਲਤ ਨੂੰ ਗੰਭੀਰ ਹੋਣ ’ਤੇ ਫਰੀਦਕੋਟ ਰੈਫਰ ਕਰ ਦਿੱਤਾ, ਜਦਕਿ ਇਸ ਹਾਦਸੇ ’ਚ ਹਾਦਸਾਗ੍ਰਸਤ ਦੋਵਾਂ ਟਰੱਕਾਂ ਨੂੰ ਸਾਈਡ ’ਤੇ ਨਾ ਕੀਤੇ ਜਾਣ ਨਾਲ ਸੋਮਵਾਰ ਸਵੇਰੇ ਸੰਘਣੀ ਧੁੰਦ ਕਾਰਨ ਕਾਰ ਸਵਾਰ ਤਰਮਾਲਾ ਵਾਸੀ ਅਜੀਤ ਸਿੰਘ ਅਤੇ ਗੰਗਾਨਗਰ ਤੋਂ ਆ ਰਹੇ ਟਰਾਲਾ ਸਵਾਰ ਵੀ ਇਨ੍ਹਾਂ ਨਾਲ ਟਕਰਾ ਗਏ। ਟੱਕਰ ਨਾਲ ਅਜੀਤ ਸਿੰਘ ਅਤੇ ਟਰਾਲਾ ਸਵਾਰ ਦੋਵੇਂ ਵੀ ਫੱਟਡ਼ ਹੋ ਗਏ। ਇਕ ਹੋਰ ਮਾਮਲੇ ’ਚ ਪਿੰਡ ਆਲਮਗਡ਼੍ਹ ਚੌਕ ਦੇ ਨੇਡ਼ੇ ਰਾਜਸਥਾਨ ਤੋਂ ਆ ਰਹੇ ਛਤਰਗਡ਼੍ਹ ਦੇ ਤਹਿਸੀਲਦਾਰ ਦੀ ਗੱਡੀ ਇਕ ਪਿੱਕਅਪ ਨਾਲ ਟਕਰਾ ਗਈ, ਜਿਸ ਕਾਰਨ ਪਿੱਕਅਪ ਚਾਲਕ ਪਵਨ ਕੁਮਾਰ ਪੁੱਤਰ ਜੀਵਨ ਸਿੰਘ ਅਤੇ ਅਲਾਦੀਨ ਪੁੱਤਰ ਸ਼ਮਸ਼ੇਰ ਵਾਸੀ ਹਿਸਾਰ ਅਤੇ ਤਹਿਸੀਲਦਾਰ ਦੀ ਗੱਡੀ ’ਚ ਸਵਾਰ ਲੋਕ ਮਾਮੂਲੀ ਰੂਪ ਨਾਲ ਫੱਟਡ਼ ਹੋ ਗਏ। ਘਟਨਾ ਤੋਂ ਬਾਅਦ ਪੁਲਸ ਟੀਮ ਨੇ ਮੌਕੇ ’ਤੇ ਪੁੱਜ ਕੇ ਹਾਦਸਾਗ੍ਰਸਤ ਵਾਹਨਾਂ ਨੂੰ ਜੇ. ਸੀ. ਬੀ. ਰਾਹੀਂ ਸਾਈਡ ’ਤੇ ਕਰਵਾਇਆ।