ਗੰਦੇ ਪਾਣੀ ਦੀ ਨਿਕਾਸੀ ਨਾ ਹੋਣ ਕਾਰਨ ਮੁਹੱਲਾ ਵਾਸੀ ਪ੍ਰੇਸ਼ਾਨ

ਕੋਟਕਪੂਰਾ,  (ਨਰਿੰਦਰ)-  ਸ਼ਹਿਰ ਦੇ ਮੁਹੱਲਾ ਵਿਜੈ ਨਗਰ ਅਤੇ ਅਮਨ ਨਗਰ ਦੇ ਸੈਂਕਡ਼ੇ ਨਿਵਾਸੀ ਮੁਹੱਲੇ ਦੇ ਗੰਦੇ ਪਾਣੀ ਦੀ ਨਿਕਾਸੀ ਨਾ ਹੋਣ ਕਾਰਨ ਬੇਹੱਦ ਪ੍ਰੇਸ਼ਾਨ ਹਨ। ਇਨ੍ਹਾਂ ਥਾਵਾਂ  ’ਤੇ ਘਰਾਂ ਦਾ ਪਾਣੀ ਵਿਜੈ ਨਗਰ ਵਿਖੇ ਪਏ ਖਾਲੀ ਪਲਾਟਾਂ ਵਿਚ ਪੈ ਰਿਹਾ ਹੈ, ਜਿਸ ਕਰ ਕੇ ਪਲਾਟਾਂ ਨੇ ਛੱਪਡ਼ ਦਾ ਰੂਪ ਧਾਰਨ ਕੀਤਾ ਹੋਇਆ ਹੈ।  ਇਸ ਕਰ ਕੇ ਮੱਖੀਆਂ-ਮੱਛਰਾਂ ਅਤੇ ਹੋਰ ਕੀਡ਼ੇ-ਮਕੌਡ਼ਿਆਂ ਦੀ ਭਰਮਾਰ ਹੋਣ ਕਾਰਨ ਜਿੱਥੇ ਬੀਮਾਰੀਆਂ ਫੈਲਣ ਦਾ ਡਰ ਬਣਿਆ ਹੋਇਆ ਹੈ, ਉੱਥੇ ਹੀ ਬੀਤੇ ਦਿਨੀਂ ਪਏ ਮੀਂਹ ਦੇ ਪਾਣੀ ਕਾਰਨ ਇਹ ਛੱਪਡ਼ ਨੱਕੋ-ਨੱਕ ਭਰਨ ਤੋਂ ਬਾਅਦ ਓਵਰਫਲੋਅ ਹੋਣ ਲੱਗ ਪਿਆ ਹੈ। ਪਿੱਛੋਂ ਪਾਣੀ ਜ਼ਿਆਦਾ ਆਉਣ ਅਤੇ ਅੱਗੇ ਨਿਕਾਸੀ ਨਾ ਹੋਣ ਕਾਰਨ ਇਸ ਪਾਣੀ ਨੇ ਹੁਣ ਮੁਹੱਲੇ ਦੀਆਂ ਗਲੀਆਂ ਵੱਲ ਰੁਖ਼ ਕਰ ਲਿਆ ਹੈ। 
ਮੁਹੱਲਾ ਵਾਸੀਆਂ ਵੱਲੋਂ ਆਪਣੀਆਂ ਗਲੀਆਂ ਦੇ ਆਸੇ-ਪਾਸੇ ਮਿੱਟੀ ਸੁੱਟ ਕੇ ਪਾਣੀ ਨੂੰ ਗਲੀਆਂ ਵਿਚ ਜਾਣ ਤੋਂ ਰੋਕਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ। ਤੇਜ਼ੀ ਨਾਲ ਆ ਰਹੇ ਪਾਣੀ ਤੋਂ ਲੱਗਦਾ ਹੈ ਕਿ ਆਉਣ ਵਾਲੇ ਦਿਨਾਂ ’ਚ ਇਹ ਪਾਣੀ ਕੋਟਕਪੂਰਾ-ਮੋਗਾ ਮੁੱਖ ਸਡ਼ਕ ’ਤੇ ਵੀ ਆ ਜਾਵੇਗਾ। ਮੁਹੱਲਾ ਵਾਸੀਅਾਂ ਅਸ਼ੋਕ ਦਿਓਡ਼ਾ, ਜਗਦੀਸ਼ ਮਹਿਤਾ, ਮਾ. ਜੋਗਿੰਦਰ ਸਿੰਘ, ਬਿੱਟੂ ਦਿਓਡ਼ਾ, ਅੰਮ੍ਰਿਤਪਾਲ ਸੇਤੀਆ, ਵਿਜੈ ਮੋਂਗਾ, ਸੁਮਿਤ ਅਰੋਡ਼ਾ, ਧਰਮਪਾਲ ਵਿਨੋਚਾ, ਸ਼ਾਦੀ ਰਾਮ ਦਿਓਡ਼ਾ, ਸੰਨੀ ਅਰੋਡ਼ਾ, ਤਰਸੇਮ ਸਿੰਘ, ਵਿਨੈ ਅਰੋਡ਼ਾ, ਮਈਆ ਦਾਸ, ਬੀਰਬਲ ਦਾਸ ਆਦਿ ਨੇ ਦੱਸਿਆ ਕਿ ਮੁਹੱਲਾ ਵਾਸੀ ਇਸ ਸਮੱਸਿਆ ਸਬੰਧੀ ਕਈ ਵਾਰ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨੂੰ ਮਿਲ ਚੁੱਕੇ ਹਨ ਪਰ ਕੋਈ ਸੁਣਵਾਈ ਨਹੀਂ ਹੋਈ। 
ਜ਼ਿਕਰਯੋਗ ਹੈ ਕਿ ਕੁਝ ਦਿਨਾਂ ’ਚ ਹੀ ਸਾਈਕਲ ਚਲਾ ਰਿਹਾ ਇਕ ਬੱਚਾ, ਅਖਬਾਰਾਂ ਵੰਡ ਰਿਹਾ ਵਿਅਕਤੀ ਤੇ ਇਕ ਹੋਰ ਮੁਹੱਲਾ ਵਾਸੀ ਇਸ ਛੱਪਡ਼ ’ਚ ਡਿੱਗ ਚੁੱਕੇ ਹਨ  ਪਰ ਸਮੇਂ ਸਿਰ ਪਤਾ ਲੱਗਣ ’ਤੇ ਇਨ੍ਹਾਂ ਦਾ ਬਚਾਅ ਹੋ ਗਿਆ। ਸਥਾਨਕ ਵਾਸੀਆਂ ਨੇ ਪ੍ਰਸ਼ਾਸਨ ਨੂੰ ਅਪੀਲ ਕੀਤੀ ਕਿ ਉਨ੍ਹਾਂ ਦੀ ਸਮੱਸਿਆ ਦੀ ਗੰਭੀਰਤਾ ਨੂੰ ਸਮਝਦਿਅਾਂ ਇਸ ਦਾ ਹੱਲ ਪਹਿਲ ਦੇ ਆਧਾਰ ’ਤੇ ਕੀਤਾ ਜਾਵੇ। ਉਨ੍ਹਾਂ ਚਿਤਾਵਨੀ ਦਿੱਤੀ ਕਿ ਉਨ੍ਹਾਂ ਦੀ ਸਮੱਸਿਆ ਦਾ ਹੱਲ ਤੁਰੰਤ ਨਾ ਕੀਤਾ ਗਿਆ ਤਾਂ ਸਮੂਹ ਮੁਹੱਲਾ ਵਾਸੀ ਸੰਘਰਸ਼ ਕਰਨ ਵਾਸਤੇ ਮਜਬੂਰ ਹੋਣਗੇ।