ਵਾਸ਼ਿੰਗਟਨ ਦੇ ਸਿੱਖ ਭਾਰਤ ''ਚ ਲਗਾਉਣਗੇ ''100 ਪਵਿੱਤਰ ਜੰਗਲ''

ਵਾਸ਼ਿੰਗਟਨ ( ਰਾਜ ਗੋਗਨਾ): ਅਮਰੀਕਾ ਦੇ ਸਿੱਖ ਭਾਈਚਾਰੇ ਦੇ ਮੈਂਬਰਾਂ ਨੇ ਪੰਜਾਬ ਅਤੇ ਭਾਰਤ ਦੇ ਹੋਰਨਾਂ ਹਿੱਸਿਆਂ ਵਿੱਚ ਈਕੋਸਿੱਖ ਸੰਸਥਾ ਨਾਂ ਦੀ ਸੰਸਥਾ ਵੱਲੋਂ ਗੁਰੂ ਨਾਨਕ ਪਵਿੱਤਰ ਜੰਗਲ ਲਗਾਉਣ ਦੇ ਕਾਰਜ ਦਾ ਸਮਰਥਨ ਦੇਣ ਦਾ ਕਦਮ ਚੁੱਕਿਆ ਹੈ। ਈਕੋਸਿੱਖ ਦੇ 7ਵੇਂ ਗਾਲਾ ਡਿਨਰ ਸਮਾਗਮ ਵਿੱਚ 250 ਤੋਂ ਵੱਧ ਲੋਕ ਸ਼ਾਮਲ ਹੋਏ ਅਤੇ ਸੰਗਠਨ ਦੀ 10ਵੀਂ ਵਰ੍ਹੇਗੰਢ ਮਨਾਉਂਦਿਆਂ ਪੰਜਾਬ ਅਤੇ ਵਿਸ਼ਵ ਦੀਆਂ ਹੋਰ ਥਾਵਾਂ 'ਤੇ ਜੰਗਲ ਲਗਾ ਕੇ ਮੌਸਮੀ ਤਬਦੀਲੀ ਦਾ ਮੁਕਾਬਲਾ ਕਰਨ ਲਈ ਇਸ ਸੰਸਥਾ ਦੇ ਏਜੰਡੇ ਦਾ ਸਮਰਥਨ ਕੀਤਾ।  ਮਹਿਮਾਨਾਂ ਨੇ ਬੜੇ ਉਤਸ਼ਾਹ ਨਾਲ ਇਸ ਸੰਸਥਾ ਨੂੰ ਦਾਨ ਦਿੱਤਾ। ਈਕੋਸਿੱਖ ਨੇ ਗੁਰੂ ਨਾਨਕ ਦੇਵ ਜੀ ਦੇ 550ਵੇਂ ਜਨਮ ਦਿਵਸ ਦੇ ਸਨਮਾਨ ਵਿੱਚ 10 ਲੱਖ ਰੁੱਖ ਲਗਾਉਣ ਦਾ ਉਪਰਾਲਾ ਸ਼ੁਰੂ ਕੀਤਾ ਹੈ ਅਤੇ ਇਹ 550 ਦੇਸੀ ਜਾਤੀ ਦੇ ਰੁੱਖਾਂ ਦੇ ਮਿੰਨੀ ਜੰਗਲ ਲਗਾਏ ਜਾ ਰਹੇ ਹਨ। ਜਿੰਨਾਂ 'ਚ ਪੰਜਾਬ, ਹਰਿਆਣਾ, ਰਾਜਸਥਾਨ, ਮਹਾਰਾਸ਼ਟਰ, ਗੁਜਰਾਤ, ਦਿੱਲੀ, ਜੰਮੂ ਅਤੇ ਚੰਡੀਗੜ੍ਹ ਵਿੱਚ 120 ਜੰਗਲ ਪਿਛਲੇ ਦਸ ਮਹੀਨਿਆਂ ਵਿਚ ਲਗਾਏ ਹਨ।

ਫੋਰੈਸਟ ਦੇ ਸ਼ੁਭੇਂਦੂ ਸ਼ਰਮਾ ਨੇ ਆਪਣੇ ਭਾਸ਼ਣ ਨਾਲ ਸਰੋਤਿਆਂ ਨੂੰ ਪ੍ਰਭਾਵਿਤ ਕੀਤਾ। ਤਰਲੋਕ ਸਿੰਘ ਚੁੱਘ ਦੇ ਮਜ਼ਾਕ ਭਰੇ ਚੁਟਕਲਿਆਂ ਨੇ ਲੋਕਾਂ ਨੂੰ ਮੋਹਿਆ। ਡੈਲਸ, (ਟੈਕਸਾਸ) ਦੀ ਇਕ ਗਾਇਕਾ ਗੁਰਲੀਨ ਕੌਰ ਨੇ ਸ਼ਾਮ ਦੀ ਸ਼ੁਰੂਆਤ ਗੁਰੂ ਨਾਨਕ ਦੇਵ ਜੀ ਦੇ ਸ਼ਬਦ ‘ਪਵਨ ਗੁਰੂ, ਪਾਣੀ ਪਿਤਾ’ ਨਾਲ ਕੀਤੀ ਅਤੇ ਆਪਣੇ ਗੀਤਾਂ ਨਾਲ ਦਰਸ਼ਕਾਂ ਦਾ ਮਨੋਰੰਜਨ ਕੀਤਾ।ਇਸ ਸਮਾਰੋਹ ਦੇ ਮੁੱਖ ਭਾਸ਼ਨ ਕਾਰ ਸ਼ੁਭੇਂਧੁ ਸ਼ਰਮਾ ਨੇ ਕਿਹਾ,“ਮੈਨੂੰ ਵਿਸ਼ੇਸ਼ ਅਧਿਕਾਰ ਹੈ ਕਿ ਮੈਂ ਇਸ ਪ੍ਰਾਜੈਕਟ ਨਾਲ ਜੁੜ ਕੇ ਪੰਜਾਬ ਅਤੇ ਭਾਰਤ ਦੇ ਹੋਰਨਾਂ ਹਿੱਸਿਆਂ ਵਿਚ ਪਵਿੱਤਰ ਜੰਗਲ ਲਗਾ ਕੇ ਕੁਦਰਤ ਦੀ ਅਸੰਤੁਲਨ ਨੂੰ ਬਹਾਲ ਕਰਾਂਗਾ। ਸਾਡੇ ਸਾਂਝੇ ਭਵਿੱਖ ਲਈ ਇਹ ਸਰਬੋਤਮ ਨਿਵੇਸ਼ ਹੈ।” 

ਈਕੋਸਿੱਖ ਦੇ ਗਲੋਬਲ ਪ੍ਰਧਾਨ ਡਾ: ਰਾਜਵੰਤ ਸਿੰਘ ਨੇ ਕਿਹਾ,“ਮੌਸਮ ਵਿੱਚ ਤਬਦੀਲੀ ਹੋਣਾ ਵਿਸ਼ਵ ਦਾ ਸਭ ਤੋਂ ਵੱਡਾ ਖ਼ਤਰਾ ਹੈ ਅਤੇ ਇਸ ਸੰਕਟ ਦੇ ਹੱਲ ਲਈ ਵਿਸ਼ਵ ਧਰਮਾਂ ਦੀ ਵੱਡੀ ਭੂਮਿਕਾ ਹੈ। ਈਕੋਸਿੱਖ ਗੁਰੂ ਨਾਨਕ ਦੇਵ ਜੀ ਦੇ ਉਪਦੇਸ਼ਾਂ ਨੂੰ ਜਾਰੀ ਰੱਖਣ ਲਈ ਵਚਨਬੱਧ ਹੈ ਅਤੇ ਵਿਸ਼ਵ ਭਾਈਚਾਰੇ ਨਾਲ ਜਲਵਾਯੂ ਦੇ ਮੁੱਦਿਆਂ 'ਤੇ ਕੰਮ ਕਰੇਗਾ। ਅਸੀਂ ਮਹਿਸੂਸ ਕਰਦੇ ਹਾਂ ਕਿ ਸਾਡੇ ਵਿਹੜੇ, ਸਕੂਲ, ਕਾਲਜ ਅਤੇ ਗੁਰਦੁਆਰਿਆਂ ਵਿਚ ਜੰਗਲ ਲਗਾਉਣਾ ਸਾਡੇ ਆਲੇ-ਦੁਆਲੇ ਨੂੰ ਸ਼ੁੱਧ ਕਰਨ ਵਿੱਚ ਸਹਾਈ ਹੋ ਸਕਦਾ ਹੈ ਅਤੇ ਕਾਰਬਨ ਵੱਖ-ਵੱਖ ਥਾਵਾਂ 'ਤੇ ਘਟਾ ਸਕਦਾ ਹੈ ਜਿਸ ਕਾਰਨ ਤਾਪਮਾਨ ਵੱਧ ਰਿਹਾ ਹੈ।” ਉਸਨੇ ਅੱਗੇ ਕਿਹਾ, “ਅਸੀਂ ਪਿਛਲੇ ਦਸ ਸਾਲਾਂ ਤੋਂ ਈਕੋਸਿੱਖ ਦਾ ਸਮਰਥਨ ਕਰਨ ਲਈ ਵਾਸ਼ਿੰਗਟਨ ਦੇ ਭਾਈਚਾਰੇ ਦੇ ਬਹੁਤ ਸ਼ੁਕਰਗੁਜ਼ਾਰ ਹਾਂ ਅਤੇ ਇਹ ਇਕੋ ਇਕ ਅਜਿਹਾ ਸ਼ਹਿਰ ਹੈ ਜਿਥੇ ਵਾਤਾਵਰਨ ਦੇ ਕੰਮਾਂ ਦਾ ਸਮਰਥਨ ਕਰਨ ਲਈ 7 ਵਾਰ ਫੰਡ ਇਕੱਠਾ ਕਰਨ ਵਾਲੇ ਸਮਾਗਮ ਹੋਏ ਹਨ।”

ਈਕੋਸਿੱਖ ਵਾਸ਼ਿੰਗਟਨ ਟੀਮ ਦੀ ਮੈਂਬਰ ਅਮੀਤਾ ਵੋਹਰਾ ਨੇ ਹਾਜ਼ਰੀਨ ਲ਼ੋਕਾਂ ਦਾ ਧੰਨਵਾਦ ਕਰਦਿਆਂ ਕਿਹਾ,“ਈਕੋਸਿੱਖ ਵਾਸ਼ਿੰਗਟਨ ਭਾਈਚਾਰੇ ਨੂੰ ਯਕੀਨ ਦਿਵਾਉਣ ਵਿਚ ਸਫਲ ਹੋਇਆ ਹੈ ਕਿ ਕਲਾਈਮੇਟ ਇੱਕ ਵੱਡਾ ਮੁੱਦਾ ਹੈ ਅਤੇ ਪੰਜਾਬ 'ਤੇ ਵੀ ਇਸਦਾ ਮਾੜਾ ਅਸਰ ਪੈ ਰਿਹਾ ਹੈ।” ਈਕੋਸਿੱਖ ਵਾਸ਼ਿੰਗਟਨ ਦੇ ਕੋਆਰਡੀਨੇਟਰ ਡਾ. ਗੁਣਪ੍ਰੀਤ ਕੌਰ ਨੇ ਕਿਹਾ,“ਸਾਨੂੰ ਬਹੁਤ ਉਮੀਦ ਹੈ ਕਿ ਅਸੀਂ ਨਵੰਬਰ 2020 ਤੱਕ ਆਪਣੇ ਟੀਚੇ 'ਤੇ ਪਹੁੰਚਣ ਦੇ ਯੋਗ ਹੋਵਾਂਗੇ, ਜਦੋਂ ਅਸੀਂ ਗੁਰੂ ਨਾਨਕ ਦੇਵ ਜੀ ਦਾ 551ਵਾਂ ਜਨਮਦਿਨ ਮਨਾਵਾਂਗੇ।'' ਈਕੋਸਿੱਖ ਟੀਮ ਦੀ ਮੈਂਬਰ, ਰਸਨਾ ਕੌਰ ਲਾਂਬਾ ਨੇ ਕਿਹਾ, “ਲੋਕਾਂ ਨੇ ਪ੍ਰੋਗਰਾਮ ਨੂੰ ਪਸੰਦ ਕੀਤਾ ਜੋ ਕਿ ਜਾਣਕਾਰੀ ਭਰਪੂਰ, ਪ੍ਰੇਰਣਾਦਾਇਕ, ਅਨੰਦਮਈ ਸੀ ਅਤੇ ਲੋਕਾਂ ਨੂੰ ਮਨੋਰੰਜਨ ਭਰਪੂਰ ਵੀ ਸੀ। ਇਸ ਯਾਦਗਾਰੀ ਸ਼ਾਮ ਦਾ ਹਿੱਸਾ ਬਣਨ ਲਈ ਲੋਕਾਂ ਨੇ ਦੂਰੋਂ ਤੋਂ ਯਾਤਰਾ ਕੀਤੀ” 

ਸਿੱਖਸ ਆਫ ਅਮਰੀਕਾ, ਗੁਰੂ ਗੋਬਿੰਦ ਸਿੰਘ ਫਾਉਂਡੇਸ਼ਨ, ਗੁਰਦੁਆਰਾ ਗਿਆਨ ਸਾਗਰ ਅਤੇ ਕਈ ਵਿਅਕਤੀਆਂ ਨੇ ਪੰਜ ਜੰਗਲ ਲਗਾਉਣ ਨੂੰ ਸਪਾਂਸਰ ਕਰਨ ਲਈ ਅੱਗੇ ਆਏ। ਗੁਰਦੁਆਰਾ ਰਾਜ ਖਾਲਸਾ ਅਤੇ ਸਿੱਖ ਹਿਊਮਨ ਡਿਵੈਲਪਮੈਂਟ ਫਾਉਂਡੇਸ਼ਨ ਦੇ ਮੈਂਬਰ ਈਕੋਸਿੱਖ ਦੀ ਹਮਾਇਤ ਕਰਨ ਪਹੁੰਚੇ।ਈਕੋਸਿੱਖ ਟੀਮ ਦੇ ਮੈਂਬਰ ਮੀਨੂੰ ਨੰਦਰਾ ਨੇ ਕਿਹਾ,“ਬਹੁਤ ਸਾਰੇ ਵਲੰਟੀਅਰਾਂ ਦਾ ਧੰਨਵਾਦ ਜਿਨ੍ਹਾਂ ਨੇ ਇਸ ਸ਼ਾਮ ਨੂੰ ਇੱਕ ਵੱਡੀ ਸਫਲਤਾ ਬਣਾਉਣ ਲਈ ਦਿਨ ਰਾਤ ਮਿਹਨਤ ਕੀਤੀ। ਅਸੀਂ ਅਮਰੀਕੀ ਜੰਗਲਾਤ, ਜੋ ਅਮਰੀਕਾ ਦੀ ਸਭ ਤੋਂ ਪੁਰਾਣੀ ਵਾਤਾਵਰਨ ਸੰਸਥਾ ਹੈ, ਵੱਲੋਂ ਈਕੋਸਿੱਖ ਨੂੰ ਸਮਰਥਨ ਦੇਣ ਲਈ ਉਨ੍ਹਾਂ ਦਾ ਧੰਨਵਾਦ ਕਰਦੇ ਹਾਂ।