ਮਰ ਗਈ ਮਮਤਾ! ਪੈਦਾ ਹੁੰਦਿਆਂ ਹੀ ਮਾਂ ਨੇ ਬੱਚੇ ਨੂੰ ਵੇਚਣ ਲਈ ਪਾ''ਤੀ ਆਨਲਾਈਨ ਪੋਸਟ

ਟੈਕਸਾਸ : ਇੱਕ ਮਾਂ ਲਈ, ਉਸਦਾ ਬੱਚਾ ਉਸਦੀ ਜਾਨ ਤੋਂ ਵੱਧ ਪਿਆਰਾ ਹੁੰਦਾ ਹੈ। ਹਾਲਾਤ ਭਾਵੇਂ ਕਿੰਨੇ ਵੀ ਮਾੜੇ ਕਿਉਂ ਨਾ ਹੋ ਜਾਣ, ਮਾਂ ਕਦੇ ਵੀ ਆਪਣੇ ਜਿਗਰ ਦਾ ਟੁਕੜਾ ਆਪਣੇ ਆਪ ਤੋਂ ਦੂਰ ਨਹੀਂ ਕਰ ਸਕਦੀ। ਪਰ, ਅਜਿਹਾ ਹੈਰਾਨ ਕਰਨ ਵਾਲਾ ਮਾਮਲਾ ਅਮਰੀਕਾ ਵਿੱਚ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਮਾਂ ਨੇ ਆਪਣੇ ਨਵਜੰਮੇ ਬੱਚੇ ਨੂੰ ਵੇਚਣ ਦੀ ਕੋਸ਼ਿਸ਼ ਕੀਤੀ।

ਅਮਰੀਕਾ ਦੇ ਟੈਕਸਾਸ 'ਚ ਜੂਨੀਪਰ ਬ੍ਰਾਇਸਨ ਨਾਂ ਦੀ ਔਰਤ 'ਤੇ ਦੋਸ਼ ਲੱਗਾ ਹੈ ਕਿ ਉਸ ਨੇ ਜਨਮ ਦੇਣ ਦੇ ਕੁਝ ਘੰਟਿਆਂ ਬਾਅਦ ਹੀ ਆਪਣੇ ਨਵਜੰਮੇ ਬੱਚੇ ਨੂੰ ਵੇਚਣ ਦੀ ਕੋਸ਼ਿਸ਼ ਕੀਤੀ ਹੈ। ਉਸਨੇ ਸੰਭਾਵੀ ਖਰੀਦਦਾਰਾਂ ਨੂੰ ਗੋਦ ਲੈਣ ਲਈ ਇੱਕ ਆਨਲਾਈਨ ਸਮੂਹ ਵਿੱਚ ਸੋਸ਼ਲ ਮੀਡੀਆ 'ਤੇ ਆਪਣੇ ਬੱਚੇ ਦੀ ਤਸਵੀਰ ਨੂੰ ਪੋਸਟ ਕੀਤਾ ਸੀ।

ਕਈ ਲੋਕਾਂ ਨੇ ਬੱਚੇ ਨੂੰ ਲੈਣ ਦੀ ਇੱਛਾ ਪ੍ਰਗਟਾਈ
ਇੱਥੇ ਕਈ ਸਮਲਿੰਗੀ ਜੋੜਿਆਂ ਅਤੇ ਹੋਰ ਲੋਕਾਂ ਨੇ ਬੱਚਾ ਗੋਦ ਲੈਣ ਦੀ ਇੱਛਾ ਸਾਂਝੀ ਕੀਤੀ, ਪਰ ਉਨ੍ਹਾਂ ਨੂੰ ਇਸ ਗੱਲ ਦੀ ਜਾਣਕਾਰੀ ਨਹੀਂ ਸੀ ਕਿ ਮਾਂ ਬਦਲੇ 'ਚ ਪੈਸੇ ਮੰਗ ਰਹੀ ਹੈ। ਜੂਨੀਪਰ ਬ੍ਰਾਇਸਨ ਨੂੰ ਹੁਣ ਪੁਲਸ ਨੇ ਗ੍ਰਿਫਤਾਰ ਕਰ ਲਿਆ ਹੈ। ਰਿਪੋਰਟ ਮੁਤਾਬਕ ਜੂਨੀਪਰ ਬ੍ਰਾਇਸਨ ਦੀ ਉਮਰ ਸਿਰਫ 21 ਸਾਲ ਹੈ। ਉਸ ਨੇ ਹਾਲ ਹੀ ਵਿੱਚ ਇੱਕ ਬੱਚੇ ਨੂੰ ਜਨਮ ਦਿੱਤਾ ਹੈ।

ਬੱਚੇ ਦੀ ਤਸਵੀਰ ਨਾਲ ਸੋਸ਼ਲ ਮੀਡੀਆ 'ਤੇ ਵੇਚਣ ਦੀ ਅਪੀਲ
ਬ੍ਰਾਇਸਨ ਨੇ ਆਪਣੇ ਬੇਟੇ ਦੀ ਇੱਕ ਫੋਟੋ ਲਈ ਅਤੇ ਉਸਨੂੰ ਗੋਦ ਲੈਣ ਲਈ ਸੋਸ਼ਲ ਮੀਡੀਆ 'ਤੇ ਇੱਕ ਅਪੀਲ ਲਿਖੀ। ਉਸਨੇ ਇੱਕ ਆਨਲਾਈਨ ਗਰੁੱਪ ਵਿੱਚ ਪੋਸਟ ਕੀਤਾ। ਇਸ ਦਾ ਕੈਪਸ਼ਨ ਸੀ- ਜਨਮ ਦੇਣ ਵਾਲੀ ਮਾਂ ਗੋਦ ਲੈਣ ਵਾਲੇ ਮਾਪਿਆਂ ਦੀ ਭਾਲ ਕਰ ਰਹੀ ਹੈ।

ਗੋਦ ਲੈਣ ਦੇ ਬਦਲੇ ਪੈਸੇ ਦੇਣ ਦੀ ਕੀਤੀ ਗੱਲ
ਆਪਣੀ ਪੋਸਟ 'ਚ ਉਸ ਨੇ ਬੱਚੇ ਨੂੰ ਦੇਣ ਦੇ ਬਦਲੇ ਪੈਸਿਆਂ ਦੀ ਮੰਗ ਵੀ ਕੀਤੀ। ਉਹ ਇੱਕ ਅਪਾਰਟਮੈਂਟ ਵਿੱਚ ਜਾਣ ਅਤੇ ਨੌਕਰੀ ਲੈਣ ਲਈ ਪੈਸੇ ਚਾਹੁੰਦੀ ਸੀ। ਤਾਂ ਜੋ ਉਹ ਘਰ ਦਾ ਡਾਊਨ ਪੇਮੈਂਟ ਦੇ ਸਕੇ। ਬ੍ਰਾਇਸਨ ਦੀ ਅਪੀਲ 'ਤੇ ਕੁੱਲ 7 ਪਰਿਵਾਰਾਂ ਨੇ ਬੱਚੇ ਨੂੰ ਗੋਦ ਲੈਣ ਦੀ ਇੱਛਾ ਪ੍ਰਗਟਾਈ। 300 ਮੀਲ ਦੂਰ ਤੋਂ ਇੱਕ ਪਰਿਵਾਰ ਬੱਚੇ ਨੂੰ ਲੈਣ ਆ ਰਿਹਾ ਸੀ। ਬਾਅਦ ਵਿੱਚ ਉਹ ਵਾਪਸ ਆ ਗਏ ਕਿਉਂਕਿ ਜੂਨੀਪਰ ਨੇ ਉਨ੍ਹਾਂ ਤੋਂ ਪੈਸੇ ਮੰਗੇ।

ਪੁਲਸ ਤੱਕ ਪਹੁੰਚਿਆ ਮਾਮਲਾ
ਬਾਅਦ 'ਚ ਇਹ ਖੁਲਾਸਾ ਹੋਇਆ ਕਿ ਵੈਂਡੀ ਵਿਲੀਅਮਜ਼ ਨਾਮਕ ਇੱਕ ਸਥਾਨਕ ਔਰਤ ਬ੍ਰਾਇਸਨ ਦੇ ਜਨਮ ਤੋਂ ਪਹਿਲਾਂ ਉਸ ਦੇ ਬੱਚੇ ਨੂੰ ਗੋਦ ਲੈਣਾ ਚਾਹੁੰਦੀ ਸੀ, ਉਹ ਉਸਨੂੰ ਜਣੇਪੇ ਦੌਰਾਨ ਹਸਪਤਾਲ ਲੈ ਕੇ ਗਈ ਅਤੇ ਜੂਨੀਪਰ ਕੋਲ ਰਹੀ। ਕਈ ਦਿਨ ਉਸ ਨਾਲ ਬਿਤਾਉਣ ਤੋਂ ਬਾਅਦ ਉਹ ਕਾਨੂੰਨੀ ਤੌਰ 'ਤੇ ਬੱਚੇ ਨੂੰ ਆਪਣੇ ਕੋਲ ਰੱਖਣਾ ਚਾਹੁੰਦੀ ਸੀ। ਜਦੋਂ ਉਸਨੇ ਬ੍ਰਾਇਸਨ ਨੂੰ ਇਸ ਬਾਰੇ ਪੁੱਛਿਆ ਤਾਂ ਉਸਨੇ ਵਿਲੀਅਮਜ਼ ਨੂੰ ਹਸਪਤਾਲ ਤੋਂ ਕੱਢਵਾ ਦਿੱਤਾ। ਇਹ ਸਭ ਦੇਖ ਕੇ ਵਿਲੀਅਮਜ਼ ਨੇ ਚਾਈਲਡ ਪ੍ਰੋਟੈਕਸ਼ਨ ਸਰਵਿਸਿਜ਼ ਨੂੰ ਫੋਨ ਕੀਤਾ ਅਤੇ ਬੱਚੇ ਨੂੰ ਵੇਚੇ ਜਾਣ ਦੀ ਜਾਣਕਾਰੀ ਦਿੱਤੀ।