ਸਕੂਲ ਤੋਂ ਛੁੱਟੀ ਕਰ ਲੱਖਾਂ ਬੱਚਿਆਂ ਨੇ ਕੀਤਾ ਜਲਵਾਯੂ ਪਰਿਵਰਤਨ ਖਿਲਾਫ ਪ੍ਰਦਰਸ਼ਨ

ਰੋਮ - ਜਲਵਾਯੂ ਪਰਿਵਰਤਨ ਨਾਲ ਹੋਣ ਵਾਲੀ ਸੰਭਾਵਿਤ ਤਬਾਹੀ ਖਿਲਾਫ ਵਿਸ਼ਵਵਿਆਪੀ ਪ੍ਰਦਰਸ਼ਨ ਦੀ ਦੂਜੀ ਲੜੀ 'ਚ ਸ਼ੁੱਕਰਵਾਰ ਨੂੰ ਲੱਖਾਂ ਬੱਚਿਆਂ ਅਤੇ ਨੌਜਵਾਨਾਂ ਨੇ ਪ੍ਰਦਰਸ਼ਨ ਕੀਤਾ। ਇਟਲੀ ਦੇ ਸ਼ਹਿਰਾਂ 'ਚ ਵੀ ਵੱਡੀ ਗਿਣਤੀ 'ਚ ਵਿਦਿਆਰਥੀ ਨਾਅਰੇ ਲਗਾਉਂਦੇ ਹੋਏ ਅਤੇ ਪੋਸਟਰ 'ਤੇ ਲਿਖੇ ਸੰਦੇਸ਼ ਦੇ ਨਾਲ 'ਭਵਿੱਖ ਲਈ ਸ਼ੁੱਕਰਵਾਰ' ਰੈਲੀ 'ਚ ਸ਼ਾਮਲ ਹੋਏ।

ਆਯੋਜਕਾਂ ਨੇ ਦੱਸਿਆ ਕਿ ਇਕੱਲੇ ਮਿਲਾਨ ਸ਼ਹਿਰ 'ਚ ਕਰੀਬ 2 ਲੱਖ ਲੋਕਾਂ ਨੇ ਪ੍ਰਦਰਸ਼ਨ 'ਚ ਹਿੱਸਾ ਲਿਆ, ਮੱਧ ਰੋਮ 'ਚ ਵੀ ਇਕ ਵੱਡੀ ਰੈਲੀ ਆਯੋਜਿਤ ਕੀਤੀ ਗਈ ਅਤੇ ਇਟਲੀ ਦੇ ਕਰੀਬ 180 ਸ਼ਹਿਰਾਂ 'ਚ ਇਕੱਠੇ ਜਲਵਾਯੂ ਖਿਲਾਫ ਪ੍ਰਦਰਸ਼ਨ ਕੀਤਾ ਗਿਆ। ਇਸ ਦੌਰਾਨ ਉਨ੍ਹਾਂ ਨੇ 'ਯਤਨ ਦਾ ਹਿੱਸਾ ਬਣੋ, ਪ੍ਰਦੂਸ਼ਣ ਦਾ ਨਹੀਂ' ਨਾਅਰੇ ਲਗਾਏ। ਪਿਛਲੇ ਹਫਤੇ ਦੀ ਰੈਲੀ ਦੌਰਾਨ ਦੁਨੀਆ ਭਰ 'ਚ ਦਿਖੀ ਪਰੀਪਾਟੀ ਦੇ ਤਹਿਤ ਇਟਲੀ ਦੇ ਸਕੂਲਾਂ ਨੇ ਵੀ ਵਿਦਿਆਰਥੀਆਂ ਨੂੰ ਇਨਾਂ ਪ੍ਰਦਰਸ਼ਨਾਂ 'ਚ ਸ਼ਾਮਲ ਹੋਣ ਦੀ ਇਜਾਜ਼ਤ ਦਿੱਤੀ।

ਉਨ੍ਹਾਂ ਨੇ ਇਹ ਪ੍ਰਦਰਸ਼ਨ ਸਵੀਡਿਸ਼ ਨਾਬਾਲਿਗ ਕਿਸ਼ੋਰੀ ਗ੍ਰੇਟਾ ਥਨਬਰਗ ਦੀ ਅਪੀਲ 'ਤੇ ਕੀਤਾ ਜੋ ਜਲਵਾਯੂ ਪਰਿਵਰਤਨ ਖਿਲਾਫ ਅੰਦੋਲਨ ਦੀ ਅਗਵਾਈ ਕਰ ਰਹੀ ਹੈ। ਪਿਛਲੇ ਹਫਤੇ ਗ੍ਰੇਟਾ ਨੇ ਦੁਨੀਆ ਦੇ ਵੱਖ-ਵੱਖ ਸ਼ਹਿਰਾਂ 'ਚ ਵੱਡੇ ਪੈਮਾਨੇ 'ਤੇ ਹੋਏ ਪ੍ਰਦਰਸ਼ਨ ਦੀ ਅਗਵਾਈ ਕੀਤੀ ਸੀ। ਗਲੋਬਲ ਤਾਪਮਾਨ 'ਚ ਵਾਧੇ ਨੂੰ ਵਾਤਾਵਰਣ ਵਿਨਾਸ਼ ਲਈ ਜ਼ਿੰਮੇਵਾਰ ਠਹਿਰਾਉਂਦੇ ਹੋਏ ਵਿਗਿਆਨਕਾਂ ਨੇ ਗਲੋਬਲ ਨੇਤਾਵਾਂ ਨੂੰ ਚਿਤਾਇਆ ਹੈ ਕਿ ਇਸ ਨਾਲ ਨਜਿੱਠਣ ਲਈ ਸਮਾਂ ਬਹੁਤ ਤੇਜ਼ੀ ਨਾਲ ਨਿਲਕਦਾ ਜਾ ਰਿਹਾ ਹੈ। ਮੁੱਖ ਆਯੋਜਨ ਕੈਨੇਡਾ ਦੇ ਮਾਂਟਰੀਅਲ 'ਚ ਹੋਣਾ ਹੈ ਜਿਸ 'ਚ ਖੁਦ ਗ੍ਰੇਟਾ ਦੇ ਹਿੱਸਾ ਲੈਣ ਉਥੇ ਪਹੁੰਚ ਗਈ ਹੈ।