ਇਟਲੀ ਨੇ ਸ਼ਰਨਾਰਥੀਆਂ ਨੂੰ ਅਲਬਾਨੀਆ ਭੇਜਣ ਦਾ ਆਪਣਾ ਵਿਵਾਦਪੂਰਨ ਪ੍ਰੋਗਰਾਮ ਮੁੜ ਕੀਤਾ ਸ਼ੁਰੂ

ਰੋਮ (ਏਜੰਸੀ)- ਇਟਲੀ ਨੇ ਭੂਮੱਧ ਸਾਗਰ ਤੋਂ ਚੁੱਕੇ ਗਏ ਸ਼ਰਨਾਰਥੀਆਂ ਨੂੰ ਅਲਬਾਨੀਆ ਭੇਜਣ ਦਾ ਆਪਣਾ ਵਿਵਾਦਪੂਰਨ ਪ੍ਰੋਗਰਾਮ ਮੁੜ ਸ਼ੁਰੂ ਕਰ ਦਿੱਤਾ ਹੈ। ਰੋਮ ਦੇ ਜੱਜਾਂ ਨੇ ਕੁਝ ਮਹੀਨੇ ਪਹਿਲਾਂ ਤਬਾਦਲੇ ਦੇ ਖਿਲਾਫ ਫੈਸਲਾ ਸੁਣਾਇਆ ਸੀ, ਪਰ ਇਟਲੀ ਦੀ ਸਰਕਾਰ ਨੇ ਅਦਾਲਤ ਦੇ ਫੈਸਲੇ ਨੂੰ ਨਜ਼ਰਅੰਦਾਜ਼ ਕਰ ਦਿੱਤਾ ਹੈ ਅਤੇ ਸ਼ਰਨਾਰਥੀਆਂ ਨੂੰ ਅਲਬਾਨੀਆ ਭੇਜਣ ਦਾ ਪ੍ਰੋਗਰਾਮ ਦੁਬਾਰਾ ਸ਼ੁਰੂ ਕਰ ਦਿੱਤਾ ਹੈ। ਐਤਵਾਰ ਨੂੰ ਇੱਕ ਇਤਾਲਵੀ ਜਲ ਸੈਨਾ ਜਹਾਜ਼ ਨੇ 49 ਪੁਰਸ਼ ਸ਼ਰਨਾਰਥੀਆਂ ਨੂੰ ਅਲਬਾਨੀਆ ਪਹੁੰਚਾਇਆ।

ਅਲਬਾਨੀਅਨ ਨਾਲ ਜੁੜਿਆ ਪ੍ਰੋਗਰਾਮ ਇਟਲੀ ਦੀ ਪ੍ਰਧਾਨ ਮੰਤਰੀ ਜੌਰਜੀਆ ਮੇਲੋਨੀ ਦੀ ਇਟਲੀ ਆਉਣ ਵਾਲੇ ਪ੍ਰਵਾਸੀਆਂ ਦੀ ਗਿਣਤੀ ਨੂੰ ਰੋਕਣ ਦੀ ਰਣਨੀਤੀ ਦਾ ਹਿੱਸਾ ਹੈ। ਇਹ ਯੋਜਨਾ ਵਿਵਾਦਪੂਰਨ ਹੈ ਕਿਉਂਕਿ ਅਲਬਾਨੀਆ ਯੂਰਪੀਅਨ ਯੂਨੀਅਨ ਤੋਂ ਬਾਹਰ ਹੈ, ਭਾਵ ਸ਼ਰਨਾਰਥੀਆਂ ਨੂੰ ਯੂਰਪੀਅਨ ਯੂਨੀਅਨ ਦੇ ਸ਼ਰਣ ਨਿਯਮਾਂ ਅਧੀਨ ਸੁਰੱਖਿਅਤ ਨਹੀਂ ਕੀਤਾ ਗਿਆ ਹੈ। ਸ਼ਰਨਾਰਥੀਆਂ ਲਈ ਸੰਯੁਕਤ ਰਾਸ਼ਟਰ ਦੇ ਹਾਈ ਕਮਿਸ਼ਨਰ ਅਨੁਸਾਰ ਸਾਲ 2024 ਵਿੱਚ 66,000 ਤੋਂ ਵੱਧ ਸ਼ਰਣ ਮੰਗਣ ਵਾਲੇ ਇਟਲੀ ਦੇ ਤੱਟਾਂ 'ਤੇ ਪਹੁੰਚੇ, ਜੋ ਇਸ ਤੋਂ ਪਿਛਲੇ ਸਾਲ ਦੇ ਲਗਭਗ 1,58,000 ਨਾਲੋਂ ਬਹੁਤ ਘੱਟ ਹੈ।