ਰੂਹਾਨੀ ਦੇ ਸੱਦੇ ਤੋਂ ਬਾਅਦ ਈਰਾਨ ਜਾਣ ''ਤੇ ਵਿਚਾਰ ਕਰ ਰਹੇ ਹਨ ਫਰਾਂਸ ਦੇ ਰਾਸ਼ਟਰਪਤੀ ਮੈਕਰੋਨ

ਪੈਰਿਸ(ਬਿਊਰੋ)— ਤਹਿਰਾਨ ਨੂੰ ਪਰਮਾਣੁ ਸਮਝੌਤੇ ਲਈ ਦਿੱਤੇ ਗਏ ਸਮਰਥਨ ਨੂੰ ਵਾਪਸ ਲੈਣ ਦੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਫੈਸਲੇ ਤੋਂ ਬਾਅਦ, ਫ਼ਰਾਂਸ ਦੇ ਰਾਸ਼ਟਰਪਤੀ ਅਮੈਨੁਏਲ ਮੈਕਰੋਨ ਈਰਾਨ ਦੌਰੇ ਉੱਤੇ ਜਾਣ ਉੱਤੇ ਵਿਚਾਰ ਕਰ ਰਹੇ ਹਨ। ਫਰਾਂਸ ਦੇ ਰਾਸ਼ਟਰਪਤੀ ਅਮੈਨੁਏਲ ਮੈਕਰੋਨ ਨੇ ਈਰਾਨ ਦੇ ਆਪਣੇ ਹਮਰੁਤਬਾ ਹਸਨ ਰੂਹਾਨੀ (ਈਰਾਨ ਦੇ ਰਾਸ਼ਟਰਪਤੀ) ਨਾਲ ਫੋਨ ਉੱਤੇ ਵੀ ਗੱਲ ਕੀਤੀ, ਜਿਸ ਤੋਂ ਬਾਅਦ ਉਹ ਤਹਿਰਾਨ ਜਾਣ ਉੱਤੇ ਵਿਚਾਰ ਕਰ ਰਹੇ ਹਨ। ਫਰਾਂਸ ਦੇ ਰਾਸ਼ਟਰਪਤੀ ਦੇ ਆਧਿਕਾਰਤ ਆਵਾਸ ਏਲਿਸੀ ਨੇ ਸ਼ਨੀਵਾਰ ਨੂੰ ਦੱਸਿਆ ਕਿ ਮੈਕਰੋਨ ਨੇ ਈਰਾਨੀ ਰਾਸ਼ਟਰਪਤੀ ਨੂੰ ਕਿਹਾ ਕਿ ਫਰਾਂਸ 2015 ਪਰਮਾਣੁ ਸਮਝੌਤੇ ਲਈ ਵਚਨਬੱਧ ਹੈ। ਇਸ ਸਮਝੌਤੇ ਵਿਚ ਅਮਰੀਕਾ ਦੇ ਇਲਾਵਾ ਬ੍ਰਿਟੇਨ, ਚੀਨ,  ਰੂਸ ਅਤੇ ਜਰਮਨੀ ਵੀ ਸ਼ਾਮਿਲ ਹਨ। ਏਲਿਸੀ ਨੇ ਕਿਹਾ, ''ਰਾਸ਼ਟਰਪਤੀ ਰੂਹਾਨੀ ਦੇ ਸੱਦੇ ਤੋਂ ਬਾਅਦ ਮੈਕਰੋਨ ਦੇ ਈਰਾਨ ਯਾਤਰਾ ਉੱਤੇ ਜਾਣ ਉੱਤੇ ਵਿਚਾਰ ਕੀਤਾ ਜਾ ਰਿਹਾ ਹੈ।'' ਈਰਾਨੀ ਰਾਸ਼ਟਰਪਤੀ ਦਫ਼ਤਰ ਦੀ ਵੈਬਸਾਈਟ 'ਤੇ ਕਿਹਾ ਗਿਆ ਹੈ ਕਿ ਮੈਕਰੋਨ ਅਗਲੇ ਸਾਲ ਉਨ੍ਹਾਂ ਦੇ ਦੇਸ਼ ਦਾ ਦੌਰਾ ਕਰਨਗੇ। ਮੈਕਰੋਨ ਨੇ ਕਿਹਾ ਕਿ ਅਮਰੀਕਾ ਦੇ ਫੈਸਲੇ ਨਾਲ ''ਈਰਾਨੀ ਪਰਮਾਣੁ ਸਮਝੌਤਾ ਖ਼ਤਮ ਨਹੀਂ ਹੋਵੇਗਾ ਅਤੇ ਫਰਾਂਸ ਦੇ ਸਾਰੇ ਪੱਖ ਅਤੇ ਉਸ ਦੇ ਯੂਰੋਪੀ ਸਾਂਝੀਦਾਰ ਆਪਣੀ ਵਚਨਬੱਧਤਾ ਉੱਤੇ ਕਾਇਮ ਰਹਿਣਗੇ।'' ਏਲਿਸੀ  ਅਨੁਸਾਰ ਰੂਹਾਨੀ ਨੇ ਮੈਕਰੋਨ ਨੂੰ ਭਰੋਸਾ ਦਿੱਤਾ ਹੈ ਕਿ ਈਰਾਨ ਬਦਲੇ ਵਿਚ ਪਰਮਾਣੁ ਸਮਝੌਤੇ ਲਈ ''ਆਪਣੀ ਵਚਨਬੱਧਤਾ ਜਾਰੀ ਰੱਖੇਗਾ।'' ਫਰਾਂਸੀਸੀ ਨੇਤਾ ਨੇ ਕਿਹਾ ਕਿ ਤਹਿਰਾਨ ਦੇ ਬੈਲਿਸਟਿਕ ਮਿਸਾਇਲ ਪ੍ਰੋਗਰਾਮ ਅਤੇ ਖੇਤਰ ਵਿਚ ਸਥਿਰਤਾ ਸਮੇਤ ਹੋਰ ਰਣਨੀਤੀਕ ਮੁੱਦਿਆਂ ਉੱਤੇ ਈਰਾਨ ਨਾਲ ਗੱਲਬਾਤ ਕਰਨ ਦੀ ਜ਼ਰੂਰਤ ਹੈ। ਮੈਕਰੋਨ ਨੇ ਰੂਹਾਨੀ ਨੂੰ ''ਸੀਰੀਆ ਸੰਕਟ ਦੇ ਰਾਜਨੀਤਕ ਹੱਲ ਲਈ ਈਰਾਨ ਨਾਲ ਕੰਮ ਕਰਨ ਦੀ ਆਪਣੀ ਇੱਛਾ ਤੋਂ ਵੀ ਜਾਣੂ ਕਰਾਇਆ। ਧਿਆਨਦੇਣ ਯੋਗ ਹੈ ਕਿ ਤਹਿਰਾਨ ਰਾਸ਼ਟਰਪਤੀ ਬਸ਼ਰ ਅਲ ਅਸਦ ਦਾ ਸਮਰਥਕ ਹੈ।