ਪਾਰਟੀ ਦੌਰਾਨ ਤਿੱਖੀ ਬਹਿਸ ਹੋਣ ਮਗਰੋਂ ਭਾਰਤੀ-ਅਮਰੀਕੀ ਨੇ ਚਲਾਈਆਂ ਤਾਬੜ-ਤੋੜ ਗੋਲੀਆਂ

ਹਿਊਸਟਨ— ਅਮਰੀਕਾ ਦੇ ਸੂਬੇ ਨਿਊ ਮੈਕਸੀਕੋ 'ਚ ਆਪਣੀ ਸਾਬਕਾ ਪਤਨੀ ਅਤੇ ਉਸ ਦੇ ਪਤੀ ਨੂੰ ਜਾਨਲੇਵਾ ਢੰਗ ਨਾਲ ਗੋਲੀ ਮਾਰਨ ਵਾਲੇ ਭਾਰਤੀ-ਅਮਰੀਕੀ ਸਯੰਤਨ ਘੋਸ਼ ਨੂੰ ਗ੍ਰਿਫਤਾਰ ਕਰ ਲਿਆ ਗਿਆ ਹੈ। ਇਸ ਗੋਲੀਬਾਰੀ 'ਚ ਮਹਿਲਾ ਜ਼ਖਮੀ ਹੋ ਗਈ ਅਤੇ ਉਸ ਦੇ ਪਤੀ ਦੀ ਮੌਤ ਹੋ ਗਈ। ਇਹ ਜਾਣਕਾਰੀ ਪੁਲਸ ਨੇ ਦਿੱਤੀ ਹੈ। ਗਾਲਵੇਸਟਨ ਕਾਊਂਟੀ ਦੇ ਜ਼ਿਲਾ ਅਟਾਰਨੀ ਦੇ ਦਫਤਰ ਮੁਤਾਬਕ ਘੋਸ਼ ਨੂੰ ਕੱਲ ਭਾਵ ਵੀਰਵਾਰ ਨੂੰ ਨਿਊ ਮੈਕਸੀਕੋ ਦੀ ਪੁਲਸ ਚੌਕੀ ਨੇੜੇ ਹਿਰਾਸਤ 'ਚ ਲਿਆ ਗਿਆ। ਇਹ ਘਟਨਾ ਬੀਤੇ ਬੁੱਧਵਾਰ ਦੀ ਰਾਤ ਨੂੰ ਵਾਪਰੀ। 
41 ਸਾਲਾ ਘੋਸ਼ 'ਤੇ ਇਸ ਗੋਲੀਬਾਰੀ ਦੇ ਸਿਲਸਿਲੇ ਵਿਚ ਹੱਤਿਆ ਦਾ ਦੋਸ਼ ਲਾਇਆ ਗਿਆ ਹੈ। ਉਸ ਦੇ ਬਾਂਡ ਦੀ ਰਾਸ਼ੀ 1.5 ਲੱਖ ਡਾਲਰ ਤੈਅ ਕੀਤੀ ਗਈ ਹੈ। ਪੁਲਸ ਨੇ ਕਿਹਾ ਕਿ ਗੋਲੀਬਾਰੀ ਦੀ ਜਾਣਕਾਰੀ ਸਥਾਨਕ ਸਮੇਂ ਅਨੁਸਾਰ ਰਾਤ 9 ਵਜੇ ਮਿਲੀ। ਮੇਹਿਲ ਰਿਜ ਲੇਨ ਦੇ 700 ਬਲਾਕ ਦੇ ਇਕ ਮਕਾਨ 'ਚ ਘੋਸ਼ ਅਤੇ ਦੋ ਨਿਵਾਸੀਆਂ ਦਰਮਿਆਨ ਬਹਿਸ ਤੋਂ ਬਾਅਦ ਗੋਲੀਆਂ ਚਲੀਆਂ। ਪੁਲਸ ਮੁਤਾਬਕ ਅਧਿਕਾਰੀਆਂ ਨੂੰ ਉੱਥੇ 43 ਸਾਲ ਦੇ ਕਲੇਰੇਸ ਵਾਯਨੇ ਹੈਰਿਸ ਦੀ ਲਾਸ਼ ਮਿਲੀ। ਉਸ ਨੂੰ ਕਈ ਗੋਲੀਆਂ ਮਾਰੀਆਂ ਗਈਆਂ ਸਨ। ਪੁਲਸ ਨੇ ਕਿਹਾ ਕਿ 36 ਸਾਲਾ ਅਮਾਂਡਾ ਹੈਰਿਸ ਗੋਲੀ ਲੱਗਣ ਕਾਰਨ ਜ਼ਖਮੀ ਹੋ ਗਈ। ਉਸ ਨੂੰ ਇਲਾਜ ਲਈ ਸਥਾਨਕ ਹਸਪਤਾਲ ਲਿਜਾਇਆ ਗਿਆ। 
ਪੁਲਸ ਮੁਤਾਬਕ ਘੋਸ਼ ਇਸ ਜੋੜੇ ਦੇ ਮਕਾਨ 'ਚ ਪਾਰਟੀ ਲਈ ਆਇਆ ਸੀ ਪਰ ਉੱਥੇ ਜੋੜੇ ਅਤੇ ਘੋਸ਼ ਦਰਮਿਆਨ ਕਿਸੇ ਗੱਲ ਨੂੰ ਤਿੱਖੀ ਬਹਿਸ ਹੋਈ। ਇਸ ਤੋਂ ਬਾਅਦ ਗੋਲੀਆਂ ਚਲੀਆਂ। ਅਮਾਂਡਾ ਨੇ ਕਿਹਾ ਕਿ ਉਸ ਨੇ 9 ਵਜੇ ਤੋਂ ਕੁਝ ਸਮਾਂ ਪਹਿਲਾਂ ਹੀ ਪੁਲਸ ਨੂੰ ਫੋਨ ਕਰ ਦਿੱਤਾ ਸੀ। ਉਸ ਨੇ ਪੁਲਸ ਨੂੰ ਦੱਸਿਆ ਕਿ ਉਸ ਦਾ ਸਾਬਕਾ ਪਤੀ ਘੋਸ਼ ਉਸ ਦੇ ਦਰਵਾਜ਼ੇ 'ਤੇ ਹੀ ਹੈ ਅਤੇ ਉਹ ਉਸ ਨੂੰ ਗ੍ਰਿਫਤਾਰ ਕਰਵਾਉਣਾ ਚਾਹੁੰਦੀ ਹੈ। ਅਮਾਂਡਾ ਨੇ ਦੋਸ਼ ਲਾਇਆ ਕਿ ਘੋਸ਼ ਕਈ ਸਾਲ ਤੋਂ ਉਸ ਦਾ ਪਿੱਛਾ ਕਰ ਰਿਹਾ ਸੀ। ਅਮਾਂਡਾ ਅਤੇ ਉਸ ਦਾ ਪਤੀ ਦੋਵੇਂ ਹੀ ਆਪਣੇ ਕੋਲ ਹਥਿਆਰ ਰੱਖਦੇ ਸਨ। ਫੋਨ ਸੁਣ ਰਹੇ ਪੁਲਸ ਅਧਿਕਾਰੀ ਨੇ ਅਮਾਂਡਾ ਦੀ ਚੀਕ ਸੁਣੀ, ''ਦੂਰ ਹੱਟੋ ਮੇਰੀ ਬੰਦੂਕ ਤੋਂ...''। ਇਸ ਤੋਂ ਬਾਅਦ ਪਿੱਛੋਂ ਗੋਲੀਆਂ ਚੱਲਣ ਅਤੇ ਚੀਕਣ ਦੀਆਂ ਆਵਾਜ਼ਾਂ ਆਈਆਂ। ਪੁਲਸ ਨੇ ਕਿਹਾ ਹੈ ਕਿ ਪੁਲਸ ਦੇ ਪਹੁੰਚਣ ਤੋਂ ਪਹਿਲਾਂ ਹੀ ਘੋਸ਼ ਦੌੜ ਚੁੱਕਾ ਸੀ।