ਪਾਕਿਸਤਾਨ 'ਚ ਮਹਿੰਗਾਈ ਨੇ ਕੱਢੇ ਵੱਟ, ਘਿਓ 208 ਰੁਪਏ ਅਤੇ ਤੇਲ 213 ਰੁਪਏ ਹੋਇਆ ਮਹਿੰਗਾ

ਇਸਲਾਮਾਬਾਦ (ਬਿਊਰੋ): ਪਾਕਿਸਤਾਨ ਸਰਕਾਰ ਨੇ ਘਿਓ ਅਤੇ ਰਸੋਈ ਦੇ ਤੇਲ ਦੀਆਂ ਕੀਮਤਾਂ 'ਚ 208 ਰੁਪਏ ਅਤੇ 213 ਰੁਪਏ ਦਾ ਬੇਮਿਸਾਲ ਵਾਧਾ ਕਰਕੇ ਜਨਤਾ ਨੂੰ ਹੈਰਾਨ ਕਰ ਦਿੱਤਾ ਹੈ। ਇਸ ਨਾਲ ਹੁਣ ਪਾਕਿਸਤਾਨ 'ਚ ਘਿਓ ਦੀ ਕੀਮਤ 555 ਰੁਪਏ ਪ੍ਰਤੀ ਕਿਲੋ ਅਤੇ ਤੇਲ ਦੀ ਕੀਮਤ 605 ਰੁਪਏ ਪ੍ਰਤੀ ਲੀਟਰ ਹੋ ਗਈ ਹੈ। ਕਰਾਚੀ ਵਿੱਚ ਯੂਟੀਲਿਟੀ ਸਟੋਰ ਕਾਰਪੋਰੇਸ਼ਨ (USC) ਦੇ ਇੱਕ ਅਧਿਕਾਰੀ ਨੇ ਡਾਨ ਨੂੰ ਪੁਸ਼ਟੀ ਕੀਤੀ ਕਿ USC ਨੇ 1 ਜੂਨ ਤੋਂ ਲਾਗੂ ਘਿਓ ਅਤੇ ਰਸੋਈ ਦੇ ਤੇਲ ਦੀਆਂ ਕੀਮਤਾਂ ਵਿੱਚ ਇਸ ਭਾਰੀ ਉਛਾਲ ਦਾ ਨੋਟੀਫਿਕੇਸ਼ਨ ਜਾਰੀ ਕੀਤਾ ਹੈ।

ਹਾਲਾਂਕਿ ਅਧਿਕਾਰੀ ਨੇ ਇਸ ਗੱਲ 'ਤੇ ਕੋਈ ਟਿੱਪਣੀ ਨਹੀਂ ਕੀਤੀ ਕਿ ਦਰਾਂ ਨੂੰ ਇੰਨਾ ਕਿਉਂ ਵਧਾਇਆ ਗਿਆ, ਜਿਸ ਨਾਲ ਖਪਤਕਾਰਾਂ 'ਤੇ ਮਾੜਾ ਅਸਰ ਪਵੇਗਾ। ਪ੍ਰਚੂਨ ਬਾਜ਼ਾਰਾਂ ਵਿੱਚ ਮਸ਼ਹੂਰ ਬ੍ਰਾਂਡਾਂ ਦੇ ਘਿਓ ਅਤੇ ਰਸੋਈ ਦੇ ਤੇਲ ਦੀ ਵੱਧ ਤੋਂ ਵੱਧ ਕੀਮਤ ਅਜੇ ਵੀ 540-560 ਰੁਪਏ ਪ੍ਰਤੀ ਕਿਲੋਗ੍ਰਾਮ ਪ੍ਰਤੀ ਲੀਟਰ ਹੈ। ਹਾਲਾਂਕਿ ਪਾਕਿਸਤਾਨ ਵੈਜੀਟੇਬਲ ਮੈਨੂਫੈਕਚਰਰ ਐਸੋਸੀਏਸ਼ਨ (ਪੀਵੀਐਮਏ) ਦੇ ਜਨਰਲ ਸਕੱਤਰ ਉਮਰ ਇਸਲਾਮ ਖਾਨ ਨੇ ਸੰਕੇਤ ਦਿੱਤਾ ਕਿ ਘੀ ਅਤੇ ਰਸੋਈ ਦੇ ਤੇਲ ਦੀਆਂ ਪ੍ਰਚੂਨ ਦਰਾਂ ਜਲਦੀ ਹੀ ਯੂਐਸਸੀ ਕੀਮਤਾਂ ਦੇ ਬਰਾਬਰ ਹੋ ਜਾਣਗੀਆਂ।

ਪੜ੍ਹੋ ਇਹ ਅਹਿਮ ਖ਼ਬਰ- ਚੀਨ 'ਚ 2021 'ਚ ਨਾਬਾਲਗਾਂ ਵਿਰੁੱਧ ਅਪਰਾਧਾਂ ਲਈ 45 ਹਜ਼ਾਰ ਤੋਂ ਵੱਧ ਸ਼ੱਕੀ ਗ੍ਰਿਫਤਾਰ 

ਉਨ੍ਹਾਂ ਕਿਹਾ ਕਿ ਘਿਓ/ਕੁਕਿੰਗ ਆਇਲ ਦੇ ਨਿਰਮਾਤਾਵਾਂ ਨੇ ਯੂਐਸਸੀ ਨੂੰ ਕਰਜ਼ੇ 'ਤੇ ਉਤਪਾਦ ਦੇਣਾ ਬੰਦ ਕਰ ਦਿੱਤਾ ਹੈ ਕਿਉਂਕਿ ਨਿਗਮ ਨੇ ਨਿਰਮਾਤਾਵਾਂ ਨੂੰ 2-3 ਬਿਲੀਅਨ ਰੁਪਏ ਦੇ ਬਕਾਏ ਦਾ ਭੁਗਤਾਨ ਨਹੀਂ ਕੀਤਾ ਹੈ। ਡਾਨ ਦੀ ਰਿਪੋਰਟ ਦੇ ਅਨੁਸਾਰ, ਉਮਰ ਨੇ ਕਿਹਾ ਕਿ ਪਾਮ ਤੇਲ ਦੀ ਸਪਲਾਈ 'ਤੇ ਪ੍ਰਧਾਨ ਮੰਤਰੀ ਦੀ ਟਾਸਕ ਫੋਰਸ ਕਮੇਟੀ, ਸਬੰਧਤ ਮੰਤਰਾਲਿਆਂ ਦੇ ਅਧਿਕਾਰੀਆਂ ਅਤੇ ਪੀਵੀਐਮਏ ਦੇ ਅਹੁਦੇਦਾਰਾਂ ਸਮੇਤ, ਪਾਮ ਤੇਲ ਦੀ ਮੰਗ ਅਤੇ ਸਪਲਾਈ ਦੀ ਸਥਿਤੀ ਦਾ ਵਿਸ਼ਲੇਸ਼ਣ ਕਰਨ ਲਈ ਜ਼ੂਮ ਮੀਟਿੰਗਾਂ ਕਰ ਰਹੀ ਹੈ।

ਇੰਡੋਨੇਸ਼ੀਆ ਨੇ ਹਟਾਈ ਪਾਬੰਦੀ ਪਰ ਨਹੀਂ ਭੇਜੀ ਖੇਪ
ਉਮਰ ਨੇ ਦੱਸਿਆ ਕਿ ਕਰਾਚੀ ਦੀਆਂ ਦੋਵੇਂ ਬੰਦਰਗਾਹਾਂ 'ਤੇ ਕਰੀਬ 1,60,000 ਟਨ ਪਾਮ ਆਇਲ ਦਾ ਭੰਡਾਰ ਹੈ, ਜੋ ਤਿੰਨ ਹਫ਼ਤਿਆਂ ਦੀ ਖਪਤ ਲਈ ਕਾਫੀ ਹੈ। ਇੰਡੋਨੇਸ਼ੀਆ ਵੱਲੋਂ 23 ਮਈ ਨੂੰ ਪਾਮ ਆਇਲ 'ਤੇ ਨਿਰਯਾਤ ਪਾਬੰਦੀਆਂ ਹਟਾਉਣ ਦੇ ਬਾਵਜੂਦ, ਪਾਕਿਸਤਾਨ ਨੂੰ ਸ਼ਿਪਮੈਂਟ ਕਰਨ ਲਈ ਇੱਕ ਵੀ ਲੋਡਿਡ ਜਹਾਜ਼ ਸਮੁੰਦਰ ਜਾਂ ਇੰਡੋਨੇਸ਼ੀਆ ਬੰਦਰਗਾਹ 'ਤੇ ਨਹੀਂ ਸੀ। ਇਮਰਾਨ ਖਾਨ ਦੇ ਜਾਣ ਤੋਂ ਬਾਅਦ ਸੱਤਾ 'ਚ ਆਏ ਸ਼ਾਹਬਾਜ਼ ਸ਼ਰੀਫ ਦੇ ਸਾਹਮਣੇ ਮਹਿੰਗਾਈ ਅਤੇ ਕਮਜ਼ੋਰ ਆਰਥਿਕਤਾ ਵਰਗੀਆਂ ਕਈ ਚੁਣੌਤੀਆਂ ਹਨ। ਵੱਡੇ-ਵੱਡੇ ਵਾਅਦੇ ਕਰਨ ਤੋਂ ਬਾਅਦ ਵੀ ਉਹ ਸਥਿਤੀ 'ਤੇ ਕਾਬੂ ਪਾਉਣ 'ਚ ਅਸਫ਼ਲ ਨਜ਼ਰ ਆ ਰਹੇ ਹਨ।

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।