ਪਾਕਿਸਤਾਨੀ ਸੁਰੱਖਿਆ ਬਲਾਂ ਦਾ ਫਰਜ਼ੀ ਮੁਕਾਬਲਾ! 5 ਨਾਗਰਿਕਾਂ ਦਾ ਕਤਲ, 4 ਨੌਜਵਾਨ ਲਾਪਤਾ

ਕੁਏਟਾ : ਬਲੋਚਿਸਤਾਨ 'ਚ ਪਾਕਿਸਤਾਨੀ ਸੁਰੱਖਿਆ ਬਲਾਂ ਵੱਲੋਂ ਮਨੁੱਖੀ ਅਧਿਕਾਰਾਂ ਦੀਆਂ ਸ਼ਰੇਆਮ ਧੱਜੀਆਂ ਉਡਾਉਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਪ੍ਰਮੁੱਖ ਮਨੁੱਖੀ ਅਧਿਕਾਰ ਸੰਗਠਨਾਂ ਅਨੁਸਾਰ, ਪਾਕਿਸਤਾਨੀ ਸੁਰੱਖਿਆ ਬਲਾਂ ਨੇ ਪੰਜ ਬਲੋਚ ਨਾਗਰਿਕਾਂ ਦਾ ਗੈਰ-ਨਿਆਇਕ ਕਤਲ ਕਰ ਦਿੱਤਾ ਹੈ, ਜਦਕਿ ਚਾਰ ਹੋਰਾਂ ਨੂੰ ਜਬਰੀ ਲਾਪਤਾ ਕਰ ਦਿੱਤਾ ਗਿਆ ਹੈ।

17 ਸਾਲਾ ਵਿਦਿਆਰਥੀ ਦੀ ਗੋਲੀਆਂ ਨਾਲ ਛੱਲਣੀ ਲਾਸ਼ ਬਰਾਮਦ
ਮਨੁੱਖੀ ਅਧਿਕਾਰ ਸੰਸਥਾ 'ਬਲੋਚ ਯਕਜੇਹਤੀ ਕਮੇਟੀ' (BYC) ਅਨੁਸਾਰ, ਪੰਜਗੁਰ ਜ਼ਿਲ੍ਹੇ ਦੇ ਪਾਰੂਮ ਇਲਾਕੇ ਤੋਂ ਫਰੰਟੀਅਰ ਕੋਰ (FC) ਦੇ ਕਰਮਚਾਰੀਆਂ ਵੱਲੋਂ ਅਗਵਾ ਕੀਤੇ ਗਏ 17 ਸਾਲਾ ਵਿਦਿਆਰਥੀ ਹਾਤਿਮ ਬਲੋਚ ਦੀ ਗੋਲੀਆਂ ਨਾਲ ਛੱਲਣੀ ਲਾਸ਼ 16 ਅਪ੍ਰੈਲ ਨੂੰ ਸੁੱਟੀ ਹੋਈ ਮਿਲੀ। ਹਾਤਿਮ ਨੂੰ ਲਗਭਗ 11 ਦਿਨ ਪਹਿਲਾਂ ਹਿਰਾਸਤ 'ਚ ਲਿਆ ਗਿਆ ਸੀ।

ਫਰਜ਼ੀ ਮੁਕਾਬਲੇ ਵਿੱਚ ਚਾਰ ਨਾਗਰਿਕਾਂ ਦੀ ਮੌਤ
BYC ਨੇ ਖੁਲਾਸਾ ਕੀਤਾ ਹੈ ਕਿ ਪਾਕਿਸਤਾਨੀ ਬਲਾਂ ਨੇ ਇੱਕ ਹੋਰ ਘਟਨਾ ਵਿੱਚ ਚਾਰ ਬਲੋਚ ਨਾਗਰਿਕਾਂ ਨੂੰ ਇੱਕ ਫਰਜ਼ੀ ਮੁਕਾਬਲੇ ਵਿੱਚ ਮਾਰ ਦਿੱਤਾ। ਸੁਰੱਖਿਆ ਬਲ ਉਨ੍ਹਾਂ ਦੀਆਂ ਤਸੀਹੇ ਦਿੱਤੀਆਂ ਲਾਸ਼ਾਂ ਨੂੰ ਪੰਜਗੁਰ ਹਸਪਤਾਲ ਲੈ ਕੇ ਆਏ ਅਤੇ ਦਾਅਵਾ ਕੀਤਾ ਕਿ ਉਹ ਇੱਕ ਮੁਕਾਬਲੇ ਦੌਰਾਨ ਮਾਰੇ ਗਏ ਹਨ। ਸੰਗਠਨ ਦਾ ਕਹਿਣਾ ਹੈ ਕਿ ਇਕੱਲੇ ਪੰਜਗੁਰ ਜ਼ਿਲ੍ਹੇ ਵਿੱਚ ਪਿਛਲੇ ਤਿੰਨ ਮਹੀਨਿਆਂ ਵਿੱਚ ਲਗਭਗ 40 ਬਲੋਚ ਨੌਜਵਾਨਾਂ ਦਾ ਬੇਰਹਿਮੀ ਨਾਲ ਕਤਲ ਕਰਕੇ ਉਨ੍ਹਾਂ ਦੀਆਂ ਲਾਸ਼ਾਂ ਸੁੱਟ ਦਿੱਤੀਆਂ ਗਈਆਂ ਹਨ।

ਨੌਜਵਾਨਾਂ ਨੂੰ ਅਗਵਾ ਕਰਨ ਦਾ ਸਿਲਸਿਲਾ ਜਾਰੀ
ਮਨੁੱਖੀ ਅਧਿਕਾਰਾਂ ਦੀ ਉਲੰਘਣਾ ਦੇ ਨਵੇਂ ਮਾਮਲਿਆਂ ਵਿੱਚ, ਸੁਰੱਖਿਆ ਬਲਾਂ ਨੇ ਪੰਜਗੁਰ ਵਿੱਚ ਇੱਕ ਘਰ ਵਿੱਚ ਛਾਪਾ ਮਾਰ ਕੇ ਅਬਦੁਲ ਵਾਹਿਦ ਦਾਦ ਅਤੇ ਅਸ਼ਫਾਕ ਆਦਮ ਨਾਮਕ ਨੌਜਵਾਨਾਂ ਨੂੰ ਜਬਰੀ ਲਾਪਤਾ ਕਰ ਦਿੱਤਾ ਹੈ। ਇਸੇ ਤਰ੍ਹਾਂ, ਗਵਾਦਰ ਜ਼ਿਲ੍ਹੇ ਦੇ ਜੀਵਨੀ ਇਲਾਕੇ ਤੋਂ 19 ਸਾਲਾ ਅਲੀ ਅਸਗਰ ਨੂੰ ਪਾਕਿਸਤਾਨੀ ਮਿਲਟਰੀ ਇੰਟੈਲੀਜੈਂਸ (MI) ਨੇ ਚੁੱਕ ਲਿਆ ਹੈ। ਕੁਏਟਾ ਤੋਂ ਵੀ ਮੇਹਰਾਜ ਨਾਮਕ 19 ਸਾਲਾ ਵਿਦਿਆਰਥੀ ਨੂੰ ਕਾਊਂਟਰ ਟੈਰੋਰਿਜ਼ਮ ਡਿਪਾਰਟਮੈਂਟ (CTD) ਵੱਲੋਂ ਅਗਵਾ ਕੀਤੇ ਜਾਣ ਦੀ ਖ਼ਬਰ ਹੈ। ਇਨ੍ਹਾਂ ਸਾਰੇ ਨੌਜਵਾਨਾਂ ਦਾ ਫਿਲਹਾਲ ਕੋਈ ਪਤਾ ਨਹੀਂ ਲੱਗ ਰਿਹਾ, ਜਿਸ ਕਾਰਨ ਉਨ੍ਹਾਂ ਦੇ ਪਰਿਵਾਰ ਗਹਿਰੀ ਚਿੰਤਾ ਵਿੱਚ ਹਨ।

'ਬਲੋਚ ਨਸਲਕੁਸ਼ੀ' ਦਾ ਦੋਸ਼
BYC ਅਤੇ ਹੋਰ ਸੰਗਠਨਾਂ ਨੇ ਇਨ੍ਹਾਂ ਘਟਨਾਵਾਂ ਦੀ ਸਖ਼ਤ ਨਿਖੇਧੀ ਕਰਦਿਆਂ ਇਸ ਨੂੰ "ਬਲੋਚ ਨਸਲਕੁਸ਼ੀ" ਕਰਾਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਰਾਜ ਵੱਲੋਂ ਲੋਕਾਂ ਵਿੱਚ ਡਰ ਦਾ ਮਾਹੌਲ ਪੈਦਾ ਕੀਤਾ ਜਾ ਰਿਹਾ ਹੈ ਤਾਂ ਜੋ ਸਵਾਲ ਪੁੱਛਣ ਵਾਲਿਆਂ ਦੀ ਆਵਾਜ਼ ਨੂੰ ਦਬਾਇਆ ਜਾ ਸਕੇ। ਸੰਗਠਨਾਂ ਨੇ ਦੋਸ਼ ਲਾਇਆ ਕਿ ਨਾਗਰਿਕ ਆਬਾਦੀ 'ਤੇ ਡਰੋਨ ਹਮਲੇ ਕੀਤੇ ਜਾ ਰਹੇ ਹਨ ਅਤੇ ਆਵਾਜ਼ ਚੁੱਕਣ ਵਾਲਿਆਂ ਨੂੰ ਜੇਲ੍ਹਾਂ ਵਿੱਚ ਡੱਕਿਆ ਜਾ ਰਿਹਾ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e