ਬੇਰਹਿਮ ਮਾਂ ਨੇ ਕਤਲ ਕੀਤਾ ਪੁੱਤ, ਪਿਤਾ ਨੇ ਪੁਲਸ ਅੱਗੇ ਬਿਆਨ ਕੀਤਾ ਦਰਦ

ਮੈਲਬੌਰਨ— ਆਸਟ੍ਰੇਲੀਆ ਦੇ ਸ਼ਹਿਰ ਮੈਲਬੌਰਨ 'ਚ ਇਕ ਬੇਰਹਿਮ ਮਾਂ ਨੇ ਆਪਣੇ 8 ਸਾਲਾ ਬੱਚੇ ਨੂੰ ਮਾਰ ਦਿੱਤਾ। ਪੁਲਸ ਨੂੰ ਬਰੌਡੀ ਮੌਰਨ ਨਾਂ ਦੇ ਬੱਚੇ ਦੀ ਲਾਸ਼ ਟੂਟਗਰੂਕ, ਮੋਰਿੰਗਟਨ ਟਾਪੂ 'ਤੇ 8 ਮਾਰਚ ਦੀ ਦੁਪਹਿਰ ਨੂੰ ਮਿਲੀ। ਇਸ ਘਟਨਾ ਦੇ ਸੰਬੰਧ ਵਿਚ ਪੁਲਸ ਨੇ 41 ਸਾਲਾ ਮਾਂ ਜੋਆਨਾ ਫਿੰਚ ਨੂੰ ਗ੍ਰਿਫਤਾਰ ਕਰ ਲਿਆ ਅਤੇ ਉਸ 'ਤੇ ਆਪਣੇ ਬੱਚੇ ਦੇ ਕਤਲ ਦੇ ਦੋਸ਼ ਲਾਏ ਗਏ ਹਨ। 

ਵੀਰਵਾਰ ਨੂੰ ਮੌਰਨ ਦੇ ਪਿਤਾ ਲੀ ਮੌਰਨ ਨੇ ਵਿਕਟੋਰੀਆ ਪੁਲਸ ਨੂੰ ਦਿੱਤੇ ਬਿਆਨ 'ਚ ਕਿਹਾ ਕਿ ਮੇਰਾ ਬੱਚਾ ਮੇਰੇ ਦਿਲ ਦੇ ਬਹੁਤ ਨੇੜੇ ਸੀ। ਮੈਂ ਉਨ੍ਹਾਂ ਲੋਕਾਂ ਦਾ ਧੰਨਵਾਦ ਕਰਦਾ ਹਾਂ, ਜਿਨ੍ਹਾਂ ਨੇ ਮੇਰੇ ਬੱਚੇ ਲਈ ਹਮਦਰਦੀ ਜ਼ਾਹਰ ਕੀਤੀ ਹੈ। ਬਰੌਡੀ ਬਹੁਤ ਸਾਰੇ ਲੋਕਾਂ ਦੇ ਨੇੜੇ ਸੀ ਅਤੇ ਲੋਕ ਉਸ ਨੂੰ ਬਹੁਤ ਪਿਆਰ ਕਰਦੇ ਸਨ। ਪਿਤਾ ਲੀ ਨੇ ਪੁਲਸ ਅਤੇ ਮੈਡੀਕਲ ਅਧਿਕਾਰੀ ਦਾ ਵੀ ਧੰਨਵਾਦ ਕੀਤਾ। 

ਮੌਰਨ ਲੀ ਨੇ ਦੱਸਿਆ ਕਿ ਉਹ ਅਤੇ ਉਸ ਦੀ ਪਤਨੀ ਫਿੰਚ ਦੋ ਸਾਲ ਪਹਿਲਾਂ ਵੱਖ ਹੋ ਗਏ ਸਨ ਪਰ ਫਿਰ ਵੀ ਉਸ ਨੇ ਆਪਣੇ ਪੁੱਤਰ ਨੂੰ ਪਿਆਰ ਅਤੇ ਆਰਥਿਕ ਸਹਿਯੋਗ ਦੇਣਾ ਬੰਦ ਨਹੀਂ ਕੀਤਾ ਸੀ। ਫਿੰਚ ਨੇ ਉਸ ਨੂੰ ਕਿਉਂ ਮਾਰਿਆ ਇਹ ਗੱਲ ਮੇਰੀ ਸਮਝ ਤੋਂ ਬਾਹਰ ਹੈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਨੂੰ ਇਸ ਗੱਲ ਦਾ ਡੂੰਘਾ ਪਛਤਾਵਾ ਹੈ ਕਿ ਮੈਂ ਆਪਣੇ ਪੁੱਤਰ ਨੂੰ ਬਚਾ ਨਹੀਂ ਸਕਿਆ। ਬਰੌਡੀ ਬਹੁਤ ਹੀ ਪਿਆਰਾ, ਦਿਆਲੂ ਅਤੇ ਧਿਆਨ ਰੱਖਣ ਵਾਲਾ ਬੱਚਾ ਸੀ। ਉਨ੍ਹਾਂ ਅੱਗੇ ਕਿਹਾ ਕਿ ਮੈਂ ਆਪਣੀ ਜ਼ਿੰਦਗੀ ਦੇ 8 ਸਾਲ ਬਰੌਡੀ ਨਾਲ ਬਿਤਾਏ। ਓਧਰ ਬਰੌਡੀ ਦੀ ਮਾਂ ਫਿੰਚ ਨੂੰ ਮੈਲਬੌਰਨ ਮੈਜਿਸਟ੍ਰੇਟ ਕੋਰਟ 'ਚ 10 ਮਾਰਚ ਨੂੰ ਪੇਸ਼ ਕੀਤਾ ਗਿਆ ਸੀ ਤਾਂ ਉਹ ਥੋੜ੍ਹੀ ਭਾਵੁਕ ਹੋਈ ਸੀ। ਪੁਲਸ ਜਾਂਚ ਕਰ ਰਹੀ ਹੈ ਕਿ ਹੋ ਸਕਦਾ ਹੈ ਕਿ ਬਰੌਡੀ ਨੂੰ ਗਲਾ ਘੁੱਟ ਕੇ ਮਾਰਿਆ ਗਿਆ ਹੈ। ਪੁਲਸ ਮੁਤਾਬਕ 29 ਜੂਨ ਤੱਕ ਉਸ ਨੂੰ ਪੁਲਸ ਹਿਰਾਸਤ 'ਚ ਰੱਖਿਆ ਜਾਵੇਗਾ।