ਸ਼੍ਰੀਲੰਕਾ 'ਚ ਗੰਭੀਰ ਊਰਜਾ ਸੰਕਟ, ਹੁਣ 'ਪਾਸ' ਜ਼ਰੀਏ ਮਿਲੇਗਾ ਵਾਹਨਾਂ ਦਾ ਈਂਧਨ

ਕੋਲੰਬੋ (ਭਾਸ਼ਾ)- ਸ੍ਰੀਲੰਕਾ ਸਰਕਾਰ ਨੇ ਆਪਣੇ ਸਭ ਤੋਂ ਖਰਾਬ ਊਰਜਾ ਸੰਕਟ ਦੌਰਾਨ ਲੋਕਾਂ ਨੂੰ ਯੋਜਨਾਬੱਧ ਤਰੀਕੇ ਨਾਲ ਬਾਲਣ ਮੁਹੱਈਆ ਕਰਵਾਉਣ ਦੇ ਉਦੇਸ਼ ਨਾਲ ‘ਫਿਊਲ ਪਾਸ’ ਦੀ ਸ਼ੁਰੂਆਤ ਕੀਤੀ ਹੈ। ਇਹ ਪਾਸ ਹਰ ਵਾਹਨ ਮਾਲਕ ਨੂੰ ਹਫ਼ਤਾਵਾਰੀ ਕੋਟੇ ਦੀ ਗਾਰੰਟੀ ਦੇਵੇਗਾ। ਸ੍ਰੀਲੰਕਾ 1948 ਵਿੱਚ ਆਜ਼ਾਦੀ ਤੋਂ ਬਾਅਦ ਆਪਣੇ ਸਭ ਤੋਂ ਖਰਾਬ ਆਰਥਿਕ ਸੰਕਟ ਦਾ ਸਾਹਮਣਾ ਕਰ ਰਿਹਾ ਹੈ। ਵਿਦੇਸ਼ੀ ਮੁਦਰਾ ਸੰਕਟ ਕਾਰਨ ਦੇਸ਼ ਆਪਣੇ ਜ਼ਰੂਰੀ ਆਯਾਤ, ਬਾਲਣ, ਭੋਜਨ ਅਤੇ ਦਵਾਈਆਂ ਦਾ ਭੁਗਤਾਨ ਕਰਨ ਵਿੱਚ ਅਸਮਰੱਥ ਹੈ। ਲੋਕ ਬਾਲਣ, ਰਸੋਈ ਗੈਸ ਅਤੇ ਕਈ-ਕਈ ਘੰਟੇ ਬਿਜਲੀ ਦੇ ਕੱਟਾਂ ਦੀ ਸਮੱਸਿਆ ਨਾਲ ਜੂਝ ਰਹੇ ਹਨ। 

ਊਰਜਾ ਮੰਤਰੀ ਕੰਚਨਾ ਵਿਜੇਸੇਕਰਾ ਨੇ ਸ਼ਨੀਵਾਰ 16 ਜੁਲਾਈ ਨੂੰ ਇਸ ਪਹਿਲਕਦਮੀ ਦੀ ਸ਼ੁਰੂਆਤ ਤੋਂ ਬਾਅਦ ਕਿਹਾ ਕਿ ਅੱਜ ਅਸੀਂ ‘ਨੈਸ਼ਨਲ ਫਿਊਲ ਪਾਸ’ ਪੇਸ਼ ਕੀਤਾ ਹੈ। ਇਹ ਹਰੇਕ ਵਾਹਨ ਲਈ ਹਫ਼ਤਾਵਾਰੀ ਕੋਟੇ ਦੀ ਗਾਰੰਟੀ ਦੇਵੇਗਾ। ਕੋਲੰਬੋ ਪੇਜ ਦੇ ਅਨੁਸਾਰ, ਨੈਸ਼ਨਲ ਫਿਊਲ ਪਾਸ ਨੂੰ ਪ੍ਰਮੁੱਖ ਤਕਨੀਕੀ ਕੰਪਨੀਆਂ ਅਤੇ ਸ਼੍ਰੀਲੰਕਾ ਵਿੱਚ ਸੰਚਾਰ ਅਤੇ ਸੂਚਨਾ ਤਕਨਾਲੋਜੀ ਸੰਸਥਾ (ICTA) ਦੇ ਸਹਿਯੋਗ ਨਾਲ ਸਿਲੋਨ ਪੈਟਰੋਲੀਅਮ ਕਾਰਪੋਰੇਸ਼ਨ (CPC) ਜਾਂ ਸਰਕਾਰ ਨੂੰ ਬਿਨਾਂ ਕਿਸੇ ਕੀਮਤ ਦੇ ਵਿਕਸਤ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਜਨਤਾ ਨੂੰ ਸਲਾਹ ਦਿੱਤੀ ਜਾਂਦੀ ਹੈ ਕਿ ਉਹ ਆਪਣੀ ਨਿੱਜੀ ਪਛਾਣ ਦੇ ਨਾਲ ਫਿਊਲ ਪਾਸ ਵੈੱਬਸਾਈਟ 'foodpass.gov.ik' 'ਤੇ ਰਜਿਸਟਰ ਕਰਾਉਣ। 

ਪੜ੍ਹੋ ਇਹ ਅਹਿਮ ਖ਼ਬਰ- ਹੈਰਾਨੀਜਨਕ! ਚਿਲੀ 'ਚ ਮਿਲੀ 16 ਫੁੱਟ ਲੰਬੀ 'ਮੱਛੀ', ਕ੍ਰੇਨ ਨਾਲ ਕੱਢੀ ਗਈ ਬਾਹਰ (ਵੀਡੀਓ)

ਅਧਿਕਾਰੀਆਂ ਮੁਤਾਬਕ ਕੋਈ ਵੀ ਵਿਅਕਤੀ ਆਪਣੇ ਰਾਸ਼ਟਰੀ ਪਛਾਣ ਪੱਤਰ ਨੰਬਰ, ਪਾਸਪੋਰਟ ਨੰਬਰ ਜਾਂ ਕਾਰੋਬਾਰੀ ਰਜਿਸਟ੍ਰੇਸ਼ਨ ਨੰਬਰ ਦੇ ਤਹਿਤ ਵਾਹਨ ਨੂੰ ਰਜਿਸਟਰ ਕਰ ਸਕਦਾ ਹੈ। ਇਸ ਤੋਂ ਇਲਾਵਾ ਕੁਝ ਹੋਰ ਜਾਣਕਾਰੀ ਜਿਵੇਂ ਕਿ ਨਾਮ, ਪਤਾ, ਫ਼ੋਨ ਨੰਬਰ, ਵਰਤੇ ਗਏ ਵਾਹਨ ਆਦਿ ਵੀ ਜਮ੍ਹਾਂ ਕਰਵਾਉਣੀ ਚਾਹੀਦੀ ਹੈ। ਰਜਿਸਟ੍ਰੇਸ਼ਨ ਤੋਂ ਬਾਅਦ ਪ੍ਰਾਪਤ QR ਕੋਡ ਨੂੰ ਈਂਧਨ ਪ੍ਰਾਪਤ ਕਰਨ ਲਈ ਜਮ੍ਹਾ ਕਰਨਾ ਪੈਂਦਾ ਹੈ। QR ਕੋਡ ਨੂੰ ਕਿਸੇ ਦੇ ਮੋਬਾਈਲ ਫੋਨ 'ਤੇ ਸਕ੍ਰੀਨਸ਼ੌਟ ਦੇ ਰੂਪ ਵਿੱਚ ਸੁਰੱਖਿਅਤ ਕੀਤਾ ਜਾ ਸਕਦਾ ਹੈ। ਜਿਨ੍ਹਾਂ ਕੋਲ ਸਮਾਰਟਫੋਨ ਨਹੀਂ ਹੈ, ਉਹ ਆਪਣੇ ਕੋਲ QR ਕੋਡ ਦੀ ਕਾਪੀ ਰੱਖ ਸਕਦੇ ਹਨ। ਵਿਜੇਸੇਕਰਾ ਨੇ ਕਿਹਾ ਕਿ ਸਰਕਾਰ ਈਂਧਨ ਦੀ ਸਪਲਾਈ ਲਈ ਆਦੇਸ਼ ਦੇਣ ਦੇ ਯੋਗ ਨਹੀਂ ਹੈ। ਇਸ ਦੇ ਨਾਲ ਹੀ ਬਾਲਣ ਦੀ ਖਪਤ 30 ਫੀਸਦੀ ਵਧੀ ਹੈ। ਸਰਕਾਰ ਨੇ 27 ਜੂਨ ਨੂੰ ਈਂਧਨ ਦੀ ਸਪਲਾਈ ਬੰਦ ਕਰ ਦਿੱਤੀ ਸੀ ਅਤੇ ਇਸ ਨੂੰ ਸਿਰਫ਼ ਜ਼ਰੂਰੀ ਸੇਵਾਵਾਂ ਤੱਕ ਸੀਮਤ ਕਰ ਦਿੱਤਾ ਸੀ।

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।