ਗੈਜੇਟ ਡੈਸਕ- ਸੋਸ਼ਲ ਮੀਡੀਆ ਪਲੇਟਫਾਰਮ ਇੰਸਟਾਗ੍ਰਾਮ ਦੀ ਸਰਵਿਸ ਬੁੱਧਵਾਰ ਸਵੇਰੇ ਅਚਾਨਕ ਠੱਪ ਹੋ ਗਈ, ਜਿਸ ਕਾਰਨ ਭਾਰਤ ਸਮੇਤ ਦੁਨੀਆ ਭਰ ਦੇ ਹਜ਼ਾਰਾਂ ਯੂਜ਼ਰਸ ਨੂੰ ਭਾਰੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਯੂਜ਼ਰਸ ਨੇ ਸ਼ਿਕਾਇਤ ਕੀਤੀ ਕਿ ਉਹ ਨਾ ਤਾਂ ਆਪਣੀ ਫੀਡ ਦੇਖ ਪਾ ਰਹੇ ਸਨ ਅਤੇ ਨਾ ਹੀ ਨਵੀਆਂ ਪੋਸਟਾਂ ਲੋਡ ਹੋ ਰਹੀਆਂ ਸਨ।

ਸਵੇਰੇ 9 ਵਜੇ ਸ਼ੁਰੂ ਹੋਈ ਸਮੱਸਿਆ 

ਆਊਟੇਜ ਨੂੰ ਟ੍ਰੈਕ ਕਰਨ ਵਾਲੀ ਵੈੱਬਸਾਈਟ 'ਡਾਊਨਡਿਟੈਕਟਰ' (Downdetector) ਦੇ ਅੰਕੜਿਆਂ ਮੁਤਾਬਕ, ਇਹ ਸਮੱਸਿਆ ਸਵੇਰੇ ਕਰੀਬ 9 ਵਜੇ ਦੇ ਆਸ-ਪਾਸ ਸ਼ੁਰੂ ਹੋਈ। ਇਸ ਤੋਂ ਬਾਅਦ ਹੌਲੀ-ਹੌਲੀ ਕਈ ਦੇਸ਼ਾਂ ਤੋਂ ਸ਼ਿਕਾਇਤਾਂ ਆਉਣ ਲੱਗੀਆਂ। ਯੂਜ਼ਰਸ ਨੇ ਦੱਸਿਆ ਕਿ ਐਪ ਅਤੇ ਵੈੱਬ ਪੋਰਟਲ ਦੋਵੇਂ ਹੀ ਠੀਕ ਤਰ੍ਹਾਂ ਕੰਮ ਨਹੀਂ ਕਰ ਰਹੇ ਸਨ। ਕਈਆਂ ਲਈ ਐਪ ਖੁੱਲ੍ਹ ਤਾਂ ਰਹੀ ਸੀ, ਪਰ ਫੀਡ ਰਿਫ੍ਰੈਸ਼ ਨਹੀਂ ਹੋ ਰਹੀ ਸੀ ਅਤੇ ਪੁਰਾਣੀਆਂ ਪੋਸਟਾਂ ਹੀ ਦਿਖਾਈ ਦੇ ਰਹੀਆਂ ਸਨ।

ਭਾਰਤ ਅਤੇ ਅਮਰੀਕਾ 'ਚ ਸਭ ਤੋਂ ਵੱਧ ਅਸਰ

ਇਸ ਤਕਨੀਕੀ ਖਰਾਬੀ ਦਾ ਅਸਰ ਗਲੋਬਲ ਪੱਧਰ 'ਤੇ ਦੇਖਿਆ ਗਿਆ। ਸਭ ਤੋਂ ਵੱਧ ਸ਼ਿਕਾਇਤਾਂ ਅਮਰੀਕਾ ਤੋਂ ਆਈਆਂ, ਜਿੱਥੇ ਲਗਭਗ 12,000 ਯੂਜ਼ਰਸ ਪ੍ਰਭਾਵਿਤ ਹੋਏ। ਭਾਰਤ 'ਚ ਵੀ ਕਰੀਬ 1,000 ਯੂਜ਼ਰਸ ਨੇ ਸਮੱਸਿਆ ਦੀ ਰਿਪੋਰਟ ਦਰਜ ਕਰਵਾਈ। ਇਸ ਤੋਂ ਇਲਾਵਾ ਯੂਕੇ (UK) 'ਚ ਵੀ ਲੋਕਾਂ ਨੂੰ ਇਸੇ ਤਰ੍ਹਾਂ ਦੀਆਂ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪਿਆ।

ਸੋਸ਼ਲ ਮੀਡੀਆ 'ਤੇ ਨਿਕਲਿਆ ਗੁੱਸਾ

ਜਦੋਂ ਇੰਸਟਾਗ੍ਰਾਮ ਡਾਊਨ ਹੋਇਆ, ਤਾਂ ਯੂਜ਼ਰਸ ਨੇ ਮਾਈਕ੍ਰੋ-ਬਲੌਗਿੰਗ ਪਲੇਟਫਾਰਮ 'X' (ਪਹਿਲਾਂ ਟਵਿੱਟਰ) 'ਤੇ ਆਪਣੀ ਭੜਾਸ ਕੱਢਣੀ ਸ਼ੁਰੂ ਕਰ ਦਿੱਤੀ। ਕਈ ਯੂਜ਼ਰਸ ਨੇ ਮਜ਼ਾਕੀਆ ਮੀਮਜ਼ ਸਾਂਝੇ ਕੀਤੇ, ਜਦਕਿ ਕੁਝ ਨੇ ਪਲੇਟਫਾਰਮ ਦੇ ਮਾਲਕ ਮਾਰਕ ਜ਼ੁਕਰਬਰਗ ਦੀ ਆਲੋਚਨਾ ਕੀਤੀ।

ਕੰਪਨੀ ਦਾ ਪੱਖ

ਹਾਲਾਂਕਿ ਸੇਵਾਵਾਂ ਸਵੇਰੇ ਕਰੀਬ 10:30 ਵਜੇ ਹੌਲੀ-ਹੌਲੀ ਆਮ ਵਾਂਗ ਹੋਣੀਆਂ ਸ਼ੁਰੂ ਹੋ ਗਈਆਂ ਸਨ, ਪਰ ਇਸ ਦੌਰਾਨ ਕੰਪਨੀ ਵੱਲੋਂ ਕੋਈ ਅਧਿਕਾਰਤ ਬਿਆਨ ਸਾਹਮਣੇ ਨਹੀਂ ਆਇਆ ਕਿ ਇਹ ਖਰਾਬੀ ਕਿਉਂ ਆਈ ਸੀ।