ਅਮਰੀਕੀ ਟੈਕ ਕੰਪਨੀਆਂ ਨੂੰ ਵੱਡਾ ਝਟਕਾ: ਫਰਾਂਸ ਸਰਕਾਰ ਹੁਣ ਨਹੀਂ ਕਰੇਗੀ Microsoft Windows ਦੀ ਵਰਤੋਂ

ਪੈਰਿਸ : ਤਕਨਾਲੋਜੀ ਦੀ ਦੁਨੀਆ ਵਿੱਚ ਇੱਕ ਬਹੁਤ ਵੱਡਾ ਬਦਲਾਅ ਦੇਖਣ ਨੂੰ ਮਿਲ ਰਿਹਾ ਹੈ, ਜਿਸ ਦੀ ਸ਼ੁਰੂਆਤ ਯੂਰਪ ਤੋਂ ਹੋਈ ਹੈ। ਫਰਾਂਸ ਸਰਕਾਰ ਨੇ ਅਮਰੀਕੀ ਟੈਕ ਕੰਪਨੀਆਂ ਨੂੰ ਵੱਡਾ ਝਟਕਾ ਦਿੰਦਿਆਂ ਫੈਸਲਾ ਕੀਤਾ ਹੈ ਕਿ ਹੁਣ ਸਰਕਾਰੀ ਵਿਭਾਗਾਂ ਵਿੱਚ ਮਾਈਕ੍ਰੋਸਾਫਟ ਵਿੰਡੋਜ਼ (Microsoft Windows) ਕੰਪਿਊਟਰਾਂ ਦੀ ਵਰਤੋਂ ਨਹੀਂ ਕੀਤੀ ਜਾਵੇਗੀ। ਇਸ ਦੀ ਬਜਾਏ, ਫਰਾਂਸ ਹੁਣ ਆਪਣੇ ਸਰਕਾਰੀ ਕੰਪਿਊਟਰਾਂ ਨੂੰ ਲਿਨਕਸ (Linux) 'ਤੇ ਸ਼ਿਫਟ ਕਰਨ ਦੀ ਤਿਆਰੀ ਕਰ ਰਿਹਾ ਹੈ।

ਫਰਾਂਸ ਦਾ ਇਹ ਫੈਸਲਾ ਸਿਰਫ ਸਾਫਟਵੇਅਰ ਬਦਲਣ ਤੱਕ ਸੀਮਿਤ ਨਹੀਂ ਹੈ, ਸਗੋਂ ਇਸ ਦਾ ਮੁੱਖ ਮਕਸਦ 'ਡਿਜੀਟਲ ਪ੍ਰਭੂਸੱਤਾ' (Digital Sovereignty) ਹਾਸਲ ਕਰਨਾ ਹੈ। ਫਰਾਂਸ ਚਾਹੁੰਦਾ ਹੈ ਕਿ ਉਹ ਆਪਣੀ ਡਿਜੀਟਲ ਦੁਨੀਆ 'ਤੇ ਖੁਦ ਦਾ ਕੰਟਰੋਲ ਰੱਖੇ ਅਤੇ ਅਮਰੀਕੀ ਟੈਕ ਕੰਪਨੀਆਂ 'ਤੇ ਆਪਣੀ ਨਿਰਭਰਤਾ ਨੂੰ ਘਟਾਏ। ਸਰਕਾਰੀ ਅਧਿਕਾਰੀਆਂ ਅਨੁਸਾਰ, ਦੇਸ਼ ਲਈ ਆਪਣੇ ਡੇਟਾ ਅਤੇ ਡਿਜੀਟਲ ਸਿਸਟਮ 'ਤੇ ਖੁਦ ਦਾ ਅਧਿਕਾਰ ਬਣਾਉਣਾ ਹੁਣ ਬਹੁਤ ਜ਼ਰੂਰੀ ਹੋ ਗਿਆ ਹੈ। 

ਫਰਾਂਸ ਦੀ ਡਿਜੀਟਲ ਏਜੰਸੀ DINUM ਨੇ ਇਸ ਬਦਲਾਅ ਦੀ ਪੁਸ਼ਟੀ ਕੀਤੀ ਹੈ। ਯੋਜਨਾ ਦੇ ਮੁਤਾਬਕ, ਸਰਕਾਰ ਦੇ ਸਾਰੇ ਵਿਭਾਗਾਂ ਨੂੰ ਹੌਲੀ-ਹੌਲੀ ਵਿੰਡੋਜ਼ ਤੋਂ ਲਿਨਕਸ 'ਤੇ ਸ਼ਿਫਟ ਕੀਤਾ ਜਾਵੇਗਾ, ਜਿਸ ਦੇ ਲਈ ਹਰ ਮੰਤਰਾਲੇ ਨੂੰ 2026 ਤੱਕ ਆਪਣੀ ਯੋਜਨਾ ਤਿਆਰ ਕਰਨ ਲਈ ਕਿਹਾ ਗਿਆ ਹੈ। ਇਸ ਬਦਲਾਅ ਵਿੱਚ ਸਿਰਫ ਕੰਪਿਊਟਰ ਹੀ ਨਹੀਂ, ਸਗੋਂ ਡੇਟਾਬੇਸ, ਨੈੱਟਵਰਕ, ਸਾਈਬਰ ਸੁਰੱਖਿਆ ਅਤੇ AI ਟੂਲਸ ਵੀ ਸ਼ਾਮਲ ਹੋਣਗੇ।

ਇਹ ਕੋਈ ਪਹਿਲਾ ਮੌਕਾ ਨਹੀਂ ਹੈ ਜਦੋਂ ਫਰਾਂਸ ਨੇ ਅਜਿਹਾ ਕਦਮ ਚੁੱਕਿਆ ਹੈ। ਪਿਛਲੇ ਕੁਝ ਸਮੇਂ ਤੋਂ ਫਰਾਂਸ ਲਗਾਤਾਰ ਅਮਰੀਕੀ ਟੈਕ ਕੰਪਨੀਆਂ ਤੋਂ ਦੂਰੀ ਬਣਾ ਰਿਹਾ ਹੈ। ਇਸ ਤੋਂ ਪਹਿਲਾਂ ਫਰਾਂਸ ਨੇ Microsoft Teams ਅਤੇ Zoom ਵਰਗੇ ਪਲੇਟਫਾਰਮਾਂ ਨੂੰ ਹਟਾ ਕੇ ਉਨ੍ਹਾਂ ਦੀ ਜਗ੍ਹਾ ਆਪਣੇ ਦੇਸ਼ ਵਿੱਚ ਬਣੇ ਵੀਡੀਓ ਕਾਲਿੰਗ ਟੂਲ ਵਰਤਣ ਦੀ ਯੋਜਨਾ ਬਣਾਈ ਸੀ।

ਰਿਪੋਰਟਾਂ ਅਨੁਸਾਰ, ਫਰਾਂਸ ਦੇ ਲੱਖਾਂ ਸਰਕਾਰੀ ਕੰਪਿਊਟਰ ਇਸ ਬਦਲਾਅ ਦਾ ਹਿੱਸਾ ਹੋਣਗੇ, ਜੋ ਇਸ ਨੂੰ ਦੁਨੀਆ ਦੇ ਸਭ ਤੋਂ ਵੱਡੇ ਸਾਫਟਵੇਅਰ ਮਾਈਗ੍ਰੇਸ਼ਨਾਂ ਵਿੱਚੋਂ ਇੱਕ ਬਣਾਉਂਦਾ ਹੈ। ਹਾਲਾਂਕਿ, ਇਹ ਰਸਤਾ ਚੁਣੌਤੀਆਂ ਭਰਿਆ ਹੋਵੇਗਾ ਕਿਉਂਕਿ ਇਸ ਦੇ ਲਈ ਪੂਰੇ ਸਿਸਟਮ, ਕਰਮਚਾਰੀਆਂ ਦੀ ਟ੍ਰੇਨਿੰਗ ਅਤੇ ਵਰਕਫਲੋ ਨੂੰ ਬਦਲਣਾ ਪਵੇਗਾ। ਫਰਾਂਸ ਦਾ ਇਹ ਕਦਮ ਦੁਨੀਆ ਲਈ ਇਕ ਵੱਡਾ ਸੁਨੇਹਾ ਹੈ ਕਿ ਟੈਕਨਾਲੋਜੀ ਹੁਣ ਸਿਰਫ ਸਹੂਲਤ ਨਹੀਂ, ਸਗੋਂ ਨੈਸ਼ਨਲ ਸੁਰੱਖਿਆ ਅਤੇ ਰਾਜਨੀਤੀ ਨਾਲ ਵੀ ਜੁੜੀ ਹੋਈ ਹੈ।