ਐਲੋਨ ਮਸਕ ਨੇ OpenAI ਤੇ ਉਸਦੇ CEO 'ਤੇ ਕੀਤਾ ਮੁਕੱਦਮਾ, ਜਾਣੋ ਵਜ੍ਹਾ

ਗੈਜੇਟ ਡੈਸਕ- ਟੈਸਲਾ ਅਤੇ ਸਪੇਸਐਕਸ ਦੇ ਸੀ.ਈ.ਓ. ਐਲੋਨ ਮਸਕ ਨੇ ਓਪਨ ਏ.ਆਈ. ਅਤੇ ਉਸਦੇ ਸੀ.ਈ.ਓ. 'ਸੈਮ ਆਲਟਮੈਨ' 'ਤੇ ਏ.ਆਈ. ਨਾਲ ਜੁੜੇ ਮੂਲ ਇਕਰਾਰਨਾਮੇ ਦੀ ਉਲੰਘਣਾ ਦਾ ਦੋਸ਼ ਲਗਾਉਂਦੇ ਹੋਏ ਮੁਕੱਦਮਾ ਦਾਇਰ ਕੀਤਾ ਹੈ। ਅਮਰੀਕਾ 'ਚ ਸੈਨ ਫਰਾਂਸਿਸਕੋ ਦੀ ਇੱਕ ਅਦਾਲਤ ਵਿੱਚ ਦਾਇਰ ਮੁਕੱਦਮਾ, ਓਪਨ ਏ.ਆਈ. ਦੇ ਨਵੀਨਤਮ ਕੁਦਰਤੀ ਭਾਸ਼ਾ ਮਾਡਲ GPT-4 ਦੇ ਦੁਆਲੇ ਕੇਂਦਰਿਤ ਹੈ। 

ਮਸਕ ਨੇ ਦੋਸ਼ ਲਗਾਇਆ ਹੈ ਕਿ ਓਪਨ ਏ.ਆਈ. ਅਤੇ ਮਾਈਕ੍ਰੋਸਾਫਟ (ਜਿਸਨੇ ਸੈ ਆਲਟਮੈਨ ਦੁਆਰਾ ਚਲਾਈ ਜਾਂਦੀ ਕੰਪਨੀ ਵਿੱਚ ਅਰਬਾਂ ਡਾਲਰ ਦਾ ਨਿਵੇਸ਼ ਕੀਤਾ ਹੈ) ਨੇ ਇਸ ਗੱਲ 'ਤੇ ਸਹਿਮਤ ਹੋਣ ਦੇ ਬਾਵਜੂਦ ਕਿ ਆਰਟੀਫਿਸ਼ੀਅਲ ਜਨਰਲ ਇੰਟੈਲੀਜੈਂਸ (ਏ.ਜੀ.ਆਈ.) ਸਮਰੱਥਾਵਾਂ "ਗੈਰ-ਮੁਨਾਫ਼ਾ ਅਤੇ ਮਨੁੱਖਤਾ ਨੂੰ ਸਮਰਪਿਤ" ਰਹਿਣਗੀਆਂ, ਗਲਤ ਤਰੀਕੇ ਨਾਲ ਜੀਪੀਟੀ-4 ਨੂੰ ਲਾਇਸੈਂਸ ਦਿੱਤਾ ਗਿਆ ਹੈ।

ਦਾਇਰ ਮੁਕੱਦਮੇ ਵਿੱਚ ਕਿਹਾ ਗਿਆ ਹੈ, "ਮਸਕ ਲੰਬੇ ਸਮੇਂ ਤੋਂ ਮੰਨਦੇ ਹਨ ਕਿ ਏ.ਜੀ.ਆਈ. ਮਨੁੱਖਤਾ ਲਈ ਇੱਕ ਗੰਭੀਰ ਖ਼ਤਰਾ ਹੈ - ਸ਼ਾਇਦ ਅੱਜ ਦੇ ਦੌਰ 'ਚ ਹੋਂਦ ਸੰਬੰਧੀ ਸਭ ਤੋਂ ਵੱਡਾ ਖਤਰਾ।'' ਮਸਕ ਦੇ ਮੁਕੱਦਮੇ ਵਿੱਚ ਇਕਰਾਰਨਾਮੇ ਦੀ ਉਲੰਘਣਾ, ਦੂਜੀ ਧਿਰ ਦੇ ਸਰਵੋਤਮ ਹਿੱਤਾਂ ਵਿੱਚ ਕੰਮ ਕਰਨ ਲਈ ਫਰਜ਼ ਦੀ ਉਲੰਘਣਾ ਅਤੇ ਅਨੁਚਿਤ ਵਪਾਰਕ ਅਭਿਆਸਾਂ ਦੀਆਂ ਸ਼ਿਕਾਇਤਾਂ ਦਾ ਵੇਰਵਾ ਦਿੱਤਾ ਗਿਆ ਹੈ।

ਮਸਕ 2018 ਤੱਕ ਓਪਨ ਏ.ਆਈ. ਦੇ ਇੱਕ ਮੂਲ ਬੋਰਡ ਮੈਂਬਰ ਸਨ। ਮੁਕੱਦਮੇ ਦੇ ਅਨੁਸਾਰ, ਓਪਨ ਏ.ਆਈ. ਦੀ ਸ਼ੁਰੂਆਤੀ ਖੋਜ ਇੱਕ "ਖੁੱਲ੍ਹੇ, ਡਿਜ਼ਾਈਨ, ਮਾਡਲਾਂ ਅਤੇ ਕੋਡ ਤੱਕ ਮੁਫਤ ਅਤੇ ਜਨਤਕ ਪਹੁੰਚ ਪ੍ਰਦਾਨ ਕਰਨ" 'ਚ ਕੀਤੀ ਗਈ ਸੀ। ਜਦੋਂ ਓਪਨ ਏ.ਆਈ. ਖੋਜਕਰਤਾਵਾਂ ਨੇ ਖੋਜ ਕੀਤੀ ਕਿ "ਟਰਾਂਸਫਾਰਮਰ" ਨਾਮਕ ਇੱਕ ਐਲਗੋਰਿਦਮ, ਜੋ ਕਿ ਅਸਲ ਵਿੱਚ ਗੂਗਲ ਦੁਆਰਾ ਖੋਜਿਆ ਗਿਆ ਸੀ, ਬਿਨਾਂ ਕਿਸੇ ਸਪੱਸ਼ਟ ਸਿਖਲਾਈ ਦੇ ਬਹੁਤ ਸਾਰੇ ਕੁਦਰਤੀ ਭਾਸ਼ਾ ਦੇ ਕੰਮ ਕਰ ਸਕਦਾ ਹੈ, "ਪੂਰਾ ਭਾਈਚਾਰਾ OpenAI ਦੁਆਰਾ ਜਾਰੀ ਕੀਤੇ ਗਏ ਮਾਡਲਾਂ ਨੂੰ ਵਧਾਉਣ ਅਤੇ ਵਿਸਤਾਰਿਤ ਕਰਨ ਲਈ ਅੱਗੇ ਆਇਆ।"

ਆਲਟਮੈਨ 2019 ਵਿੱਚ ਓਪਨ.ਏ.ਆਈ. ਦੇ ਸੀ.ਈ.ਓ. ਬਣੇ। ਓਪਨ ਏ.ਆਈ. ਨੇ 22 ਸਤੰਬਰ 2020 ਨੂੰ ਮਾਈਕ੍ਰੋਸਾਫਟ ਦੇ ਨਾਲ ਸਮਝੌਤਾ ਕੀਤਾ, ਜਿਸ ਵਿਚ ਵਿਸ਼ੇਸ਼ ਤੌਰ 'ਤੇ ਮਾਈਕ੍ਰੋਸਾਫਟ ਨੂੰ ਉਸਦੇ ਜਨਰੇਟਿਵ ਪ੍ਰੀਟ੍ਰੇਂਡ ਟ੍ਰਾਂਸਫਾਰਮਰ (GPT)-3 ਭਾਸ਼ਾ ਮਾਡਲ ਦਾ ਲਾਇਸੈਂਸ ਦਿੱਤਾ ਗਿਆ। 

ਮੁਕੱਦਮੇ 'ਚ ਕਿਹਾ ਗਿਆ ਹੈ, "ਸਭ ਤੋਂ ਗੰਭੀਰ ਗੱਲ ਇਹ ਹੈ ਕਿ ਮਾਈਕ੍ਰੋਸਾੱਫਟ ਲਾਇਸੈਂਸ ਸਿਰਫ ਓਪਨ ਏ.ਆਈ. ਦੀ ਪ੍ਰੀ-ਏਜੀਆਈ ਤਕਨਾਲੋਜੀ 'ਤੇ ਲਾਗੂ ਹੁੰਦਾ ਹੈ। ਮਾਈਕ੍ਰੋਸਾਫਟ ਨੂੰ ਏ.ਜੀ.ਆਈ. 'ਤੇ ਕੋਈ ਅਧਿਕਾਰ ਨਹੀਂ ਮਿਲਿਆ ਅਤੇ  ਓਪਨ ਏ.ਆਈ. ਕਦੋਂ ਏ.ਜੀ.ਆਈ. ਦੇ ਪੜਾਅ 'ਤੇ ਪਹੁੰਚ ਗਿਆ ਇਹ ਤੈਅ ਕਰਨਾ ਓਪਨ ਏ.ਆਈ. ਦੇ ਗੈਰ-ਲਾਭਕਾਰੀ ਬੋਰਡ 'ਤੇ ਨਿਰਭਰ ਕਰਦਾ ਸੀ, ਨਾ ਕਿ ਮਾਈਕ੍ਰੋਸਾਫਟ 'ਤੇ।"