ਗੈਜੇਟ ਡੈਸਕ - ਦੁਨੀਆ ਭਰ 'ਚ ਆਪਣੀਆਂ ਇਲੈਕਟ੍ਰਿਕ ਕਾਰਾਂ (EV) ਦਾ ਲੋਹਾ ਮਨਵਾਉਣ ਵਾਲੀ ਦਿੱਗਜ ਕੰਪਨੀ ਟੈਸਲਾ ਨੂੰ ਭਾਰਤੀ ਬਾਜ਼ਾਰ 'ਚ ਵੱਡੀ ਚੁਣੌਤੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਪਿਛਲੇ ਸਾਲ ਜੁਲਾਈ 'ਚ ਬੜੇ ਜੋਰ-ਸ਼ੋਰ ਨਾਲ ਭਾਰਤ 'ਚ ਐਂਟਰੀ ਕਰਨ ਵਾਲੀ ਇਸ ਕੰਪਨੀ ਦੀ ਰਫ਼ਤਾਰ ਹੁਣ ਸੁਸਤ ਪੈਂਦੀ ਨਜ਼ਰ ਆ ਰਹੀ ਹੈ।

ਹਰ ਮਹੀਨੇ ਸਿਰਫ਼ 43 ਕਾਰਾਂ ਦੀ ਵਿਕਰੀ 

ਫੈਡਰੇਸ਼ਨ ਆਫ ਆਟੋਮੋਬਾਈਲ ਡੀਲਰਜ਼ ਐਸੋਸੀਏਸ਼ਨ ਦੇ ਤਾਜ਼ਾ ਅੰਕੜਿਆਂ ਅਨੁਸਾਰ, ਟੈਸਲਾ ਨੇ ਸਤੰਬਰ 2025 ਤੋਂ ਮਾਰਚ 2026 ਤੱਕ ਦੇ 7 ਮਹੀਨਿਆਂ 'ਚ ਸਿਰਫ਼ 342 ਕਾਰਾਂ ਵੇਚੀਆਂ ਹਨ। ਇਸ ਹਿਸਾਬ ਨਾਲ ਦੇਸ਼ ਭਰ 'ਚ ਔਸਤਨ ਹਰ ਮਹੀਨੇ ਸਿਰਫ਼ 43 ਕਾਰਾਂ ਹੀ ਵਿਕ ਸਕੀਆਂ ਹਨ। ਦਿਲਚਸਪ ਗੱਲ ਇਹ ਹੈ ਕਿ ਭਾਰਤ 'ਚ ਸਮੁੱਚਾ ਇਲੈਕਟ੍ਰਿਕ ਪੈਸੈਂਜਰ ਵਹੀਕਲ ਸੈਗਮੈਂਟ 83.63% ਦੀ ਤੇਜ਼ੀ ਨਾਲ ਵਧਿਆ ਹੈ ਅਤੇ ਸਾਲਾਨਾ ਵਿਕਰੀ ਲਗਭਗ 2 ਲੱਖ ਯੂਨਿਟਾਂ ਤੱਕ ਪਹੁੰਚ ਗਈ ਹੈ, ਪਰ ਟੈਸਲਾ ਇਸ ਉਛਾਲ ਦਾ ਫਾਇਦਾ ਚੁੱਕਣ 'ਚ ਨਾਕਾਮ ਰਹੀ ਹੈ।

ਟੈਸਲਾ ਦੀ ਅਸਫਲਤਾ ਦੇ ਮੁੱਖ ਕਾਰਨ :-

ਭਾਰੀ ਕੀਮਤ
- ਭਾਰਤ 'ਚ ਟੈਸਲਾ ਦੀ Model Y ਦੀ ਸ਼ੁਰੂਆਤੀ ਕੀਮਤ ਲਗਭਗ 59.89 ਲੱਖ ਰੁਪਏ (ਐਕਸ-ਸ਼ੋਰੂਮ) ਹੈ। ਭਾਰੀ ਇੰਪੋਰਟ ਡਿਊਟੀ (70% ਤੋਂ 100%) ਕਾਰਨ ਇਹ ਕਾਰ ਅਮਰੀਕਾ ਦੇ ਮੁਕਾਬਲੇ ਭਾਰਤ ਵਿੱਚ 70% ਮਹਿੰਗੀ ਹੈ।

ਮੇਕ ਇਨ ਇੰਡੀਆ ਦੀ ਕਮੀ
- ਟੈਸਲਾ ਦੀਆਂ ਕਾਰਾਂ ਚੀਨ ਦੀ ਸ਼ੰਘਾਈ ਫੈਕਟਰੀ ਤੋਂ ਇੰਪੋਰਟ ਕੀਤੀਆਂ ਜਾਂਦੀਆਂ ਹਨ। ਸਥਾਨਕ ਪੱਧਰ 'ਤੇ ਉਤਪਾਦਨ ਨਾ ਹੋਣ ਕਾਰਨ ਇਸ ਨੂੰ 'ਮੇਕ ਇਨ ਇੰਡੀਆ' ਦੇ ਫਾਇਦੇ ਨਹੀਂ ਮਿਲ ਰਹੇ।

ਭਾਰਤੀ ਸੜਕਾਂ ਅਤੇ ਨਿਯਮ
- ਟੈਸਲਾ ਦਾ ਸਭ ਤੋਂ ਖਾਸ ਫੀਚਰ 'ਫੁਲੀ ਸੈਲਫ ਡਰਾਈਵ' (FSD) ਭਾਰਤ 'ਚ ਵਰਤਣ ਦੀ ਇਜਾਜ਼ਤ ਨਹੀਂ ਹੈ। ਇਸ ਤੋਂ ਇਲਾਵਾ, ਕਾਰ ਦੀ ਗਰਾਊਂਡ ਕਲੀਅਰੈਂਸ (167 ਮਿਲੀਮੀਟਰ) ਭਾਰਤੀ ਸੜਕਾਂ ਦੇ ਲਿਹਾਜ਼ ਨਾਲ ਕਾਫੀ ਘੱਟ ਮੰਨੀ ਜਾ ਰਹੀ ਹੈ।

ਸੀਮਤ ਵਿਕਲਪ
- ਟੈਸਲਾ ਕੋਲ ਭਾਰਤ 'ਚ ਸਿਰਫ਼ ਇਕ ਹੀ ਮਾਡਲ (Model Y) ਹੈ, ਜਦੋਂ ਕਿ ਟਾਟਾ ਮੋਟਰਜ਼, ਮਹਿੰਦਰਾ, BYD ਅਤੇ ਹੁੰਡਈ ਵਰਗੀਆਂ ਕੰਪਨੀਆਂ ਕੋਲ ਵੱਡਾ ਪੋਰਟਫੋਲੀਓ ਹੈ ਜੋ ਟੈਸਲਾ ਤੋਂ ਸਸਤੀਆਂ ਅਤੇ ਜ਼ਿਆਦਾ ਫੀਚਰਾਂ ਵਾਲੀਆਂ ਕਾਰਾਂ ਪੇਸ਼ ਕਰਦੀਆਂ ਹਨ।

ਫਿਲਹਾਲ ਟੈਸਲਾ ਦਿੱਲੀ, ਮੁੰਬਈ, ਗੁਰੂਗ੍ਰਾਮ ਅਤੇ ਬੈਂਗਲੁਰੂ ਵਰਗੇ ਵੱਡੇ ਸ਼ਹਿਰਾਂ 'ਚ ਆਪਣਾ ਨੈੱਟਵਰਕ ਵਧਾਉਣ ਦੀ ਕੋਸ਼ਿਸ਼ ਕਰ ਰਹੀ ਹੈ, ਪਰ ਮਾਹਰਾਂ ਦਾ ਮੰਨਣਾ ਹੈ ਕਿ ਜਦੋਂ ਤੱਕ ਕੰਪਨੀ ਭਾਰਤ'ਚ ਆਪਣਾ ਪਲਾਂਟ ਲਗਾ ਕੇ ਕੀਮਤਾਂ ਘੱਟ ਨਹੀਂ ਕਰਦੀ, ਉਦੋਂ ਤੱਕ ਇਸ ਲਈ 'ਮਾਸ ਮਾਰਕੀਟ' 'ਚ ਜਗ੍ਹਾ ਬਣਾਉਣੀ ਮੁਸ਼ਕਲ ਹੋਵੇਗੀ।