Canon ’ਤੇ ਹੋਇਆ ਸਾਈਬਰ ਹਮਲਾ, ਸਰਵਰ ਠੱਪ, 10GB ਡਾਟਾ ਚੋਰੀ
8/7/2020 2:14:44 PM
ਗੈਜੇਟ ਡੈਸਕ– ਪ੍ਰਮੁੱਖ ਕੈਮਰਾ ਨਿਰਮਾਤਾ ਕੰਪਨੀ ਕੈਨਨ ਸਾਈਬਰ ਹਮਲੇ ਦਾ ਸ਼ਿਕਾਰ ਹੋ ਗਈ ਹੈ। ਇਸ ਸਾਈਬਰ ਹਮਲੇ ਤੋਂ ਬਾਅਦ ਕੈਨਨ ਦੀ image.conon ਕਲਾਊਡ ਸਟੋਰੇਜ ਸੇਵਾ ਠੱਪ ਹੋ ਗਈ ਹੈ। ਇਸ ਤੋਂ ਇਲਾਵਾ ਇਸ ਹੈਕਿੰਗ ਤੋਂ ਬਾਅਦ ਕੰਪਨੀ ਦੀ ਅਮਰੀਕੀ ਵੈੱਬਸਾਈਟ ਅਤੇ ਕਈ ਇੰਟਰਨਲ ਐਪਲੀਕੇਸ਼ਨਾਂ ਵੀ ਬੰਦ ਹੋ ਗਈਆਂ ਹਨ। ਕੈਨਨ ਨੇ ਇਸ ਹੈਕਿੰਗ ਬਾਰੇ ਅਜੇ ਤਕ ਵਿਸਤਾਰ ਨਾਲ ਕੋਈ ਜਾਣਕਾਰੀ ਨਹੀਂ ਦਿੱਤੀ ਪਰ ਕੁਝ ਰਿਪੋਰਟਾਂ ਮੁਤਾਬਕ, ਕੈਨਨ ’ਤੇ ਮੇਜ਼ ਰੈਨਸਮਵੇਅਰ (Maze Ransonmware) ਹਮਲਾ ਹੋਇਆ ਹੈ। ਇਸ ਸਾਈਬਰ ਹਮਲੇ ਤੋਂ ਬਾਅਦ ਕੈਨਨ ਨੇ image.canon ਵੈੱਬਸਾਈਟ ’ਤੇ ਇਕ ਨੋਟ ਵੀ ਪਬਲਿਸ਼ ਕੀਤਾ ਹੈ।
ਨੋਟ ’ਚ ਲਿਖਿਆ ਹੈ ਕਿ 30 ਜੁਲਾਈ ਨੂੰ ਹਮਲਾ ਹੋਇਆ ਹੈ ਜਿਸ ਵਿਚ 10 ਜੀ.ਬੀ. ਸਟੋਰੇਜ ਪ੍ਰਭਾਵਿਤ ਹੋਈ ਹੈ। ਇਸ 10 ਜੀ.ਬੀ. ਸਟੋਰੇਜ ’ਚ ਯੂਜ਼ਰਜਸ ਦੀਆਂ ਤਸਵੀਰਾਂ ਅਤੇ ਵੀਡੀਓਜ਼ ਕਲਾਊਡ ’ਤੇ ਸੇਵ ਸਨ। ਕੰਪਨੀ ਨੇ ਕਿਹਾ ਹੈ ਕਿ ਇਸ ਹੈਕਿੰਗ ’ਚ 10 ਜੀ.ਬੀ. ਡਾਟਾ ਚੋਰੀ ਹੋਇਆ ਹੈ। ਹਾਲਾਂਕਿ ਚੋਰੀ ਹੋਇਆ ਡਾਟਾ 16 ਜੂਨ ਤੋਂ ਪਹਿਲਾਂ ਦਾ ਹੈ। ਕੰਪਨੀ ਨੇ ਅਜੇ ਤਕ ਰੈਨਸਮਵੇਅਰ ਹਮਲੇ ਦੀ ਪੁਸ਼ਟੀ ਨਹੀਂ ਕੀਤੀ। ਇਸ ਹੈਕਿੰਗ ’ਚ ਕੈਨਨ ਦੇ ਕਰੀਬ ਦੋ ਦਰਜਨ ਡੋਮੇਨ ਪ੍ਰਭਾਵਿਤ ਹੋਏ ਹਨ।
ਮੇਜ਼ ਗੈਂਗ ਦੇ ਸਾਈਬਰ ਹਮਲੇ ਦਾ ਇਹ ਪਹਿਲਾ ਮਾਮਲਾ ਨਹੀਂ ਹੈ। ਇਸ ਤੋਂ ਪਹਿਲਾਂ ਐੱਲ.ਜੀ. ਅਤੇ ਜੇਰਾਕਸ ਵਰਗੀਆਂ ਕੰਪਨੀਾਂ ਨੂੰ ਵੀ ਇਹ ਗੈਂਗ ਸ਼ਿਕਾਰ ਬਣਾ ਚੁੱਕਾ ਹੈ। ਇਸ ਗੈਂਗ ਨੇ ਇਸ ਤੋਂ ਪਹਿਲਾਂ Cognizant ਨੂੰ ਵੀ ਆਪਣਾ ਸ਼ਿਕਾਰ ਬਣਾਇਆ ਹੈ।
ਦੱਸ ਦੇਈਏ ਕਿ ਇਸ ਤੋਂ ਪਹਿਲਾਂ ਹਾਲਹੀ ’ਚ ਪ੍ਰਮੁੱਖ ਫਿਟਨੈੱਸ ਅਤੇ ਸਮਾਰਟ ਵਾਚ ਨਿਰਮਾਤਾ ਕੰਪਨੀ ਗਾਰਮਿਨ ’ਤੇ ਰੈਨਸਮਵੇਅਰ ਹਮਲਾ ਹੋਇਆ ਸੀ ਜਿਸ ਤੋਂ ਬਾਅਦ ਕੰਪਨੀ ਨੂੰ ਲੱਖਾਂ ਡਾਲਰ ਫਿਰੌਤੀ ਦੇ ਤੌਰ ’ਤੇ ਦੇਣੇ ਪਏ। ਇਸ ਹੈਕਿੰਗ ਤੋਂ ਬਾਅਦ ਕਰੀਬ 20 ਘੰਟਿਆਂ ਤਕ ਕੰਪਨੀ ਦਾ ਸਰਵਰ ਡਾਊਨ ਰਿਹਾ ਅਤੇ ਸਮਾਰਟ ਵਾਚਿਸ ਬੰਦ ਰਹੀਆਂ।
