‘ਕੇਸਰੀ ਵੀਰ’ ''ਚ ਜੰਗ ਦੇ ਦ੍ਰਿਸ਼ਾਂ ਨੂੰ ਫਿਲਮਾਉਣ ਲਈ 500 ਘੋੜਿਆਂ ਤੇ 1,000 ਤੋਂ ਵੱਧ ਲੋਕਾਂ ਦੀ ਕੀਤੀ ਗਈ ਵਰਤੋਂ

ਮੁੰਬਈ- ਫਿਲਮ ‘ਕੇਸਰੀ ਵੀਰ’ ਹਮੀਰਜੀ ਗੋਹਿਲ ਦੀ ਕਹਾਣੀ ਦੱਸਦੀ ਹੈ, ਜੋ ਇਕ ਬਹਾਦਰ ਨੇਤਾ ਸਨ, ਜਿਨ੍ਹਾਂ ਨੇ ਸੋਮਨਾਥ ਮੰਦਰ ਦੀ ਰੱਖਿਆ ਕਰਦੇ ਹੋਏ ਆਪਣੀ ਜਾਨ ਕੁਰਬਾਨ ਕਰ ਦਿੱਤੀ ਸੀ। ਇਹ ਇਕ ਵੱਡੇ ਪੱਧਰ ਦੀ ਇਤਿਹਾਸਕ ਫਿਲਮ ਹੈ, ਜਿਸ ਨੂੰ ਨਾਇਕ ਦੀ ਵਿਰਾਸਤ ਵਾਂਗ ਮਹਾਕਾਵਿ ਵਰਗਾ ਮਹਿਸੂਸ ਕਰਵਾਇਆ ਗਿਆ ਹੈ। ਟੀਮ ਨੇ ਵਿਸ਼ਾਲ ਜੰਗ ਦੇ ਦ੍ਰਿਸ਼ਾਂ ਨੂੰ ਫਿਲਮਾਉਣ ਲਈ 500 ਘੋੜਿਆਂ ਅਤੇ 1,000 ਤੋਂ ਵੱਧ ਲੋਕਾਂ ਦੀ ਵਰਤੋਂ ਕੀਤੀ। ਸ਼ੂਟਿੰਗ ਕਈ ਮਹੀਨੇ ਚੱਲੀ ਅਤੇ ਇਹ ਗੁਜਰਾਤ, ਰਾਜਸਥਾਨ ਅਤੇ ਮੱਧ ਪ੍ਰਦੇਸ਼ ’ਚ ਹੋਈ। ਧੀਮਾਨ ਦਾ ਕਹਿਣਾ ਹੈ ਕਿ ਅਸੀਂ ਇਸ ਨੂੰ ਕੰਪਿਊਟਰ ਗ੍ਰਾਫਿਕਸ ਨਾਲ ਨਹੀਂ ਬਣਾਉਣਾ ਚਾਹੁੰਦੇ ਸੀ। ਅਸੀਂ ਅਸਲੀ ਜਗ੍ਹਾ, ਘੋੜਿਆਂ ਤੇ ਲੋਕਾਂ ਦੀ ਵਰਤੋਂ ਕੀਤੀ। ਸੈੱਟ ਬਣਾਉਣ ਦੀ ਬਜਾਏ ਟੀਮ ਨੇ ਭੁਜ, ਜੂਨਾਗੜ੍ਹ ਅਤੇ ਮਾਂਡੂ ਵਰਗੀਆਂ ਥਾਵਾਂ ’ਤੇ ਅਸਲੀ ਕਿਲਿਆਂ, ਪਿੰਡਾਂ ਅਤੇ ਜੰਗ ਦੇ ਮੈਦਾਨਾਂ ’ਚ ਫਿਲਮਾਂਕਣ ਕੀਤਾ।

ਇਤਿਹਾਸਕਾਰਾਂ ਅਤੇ ਸਥਾਨਕ ਕਾਰੀਗਰਾਂ ਨੇ ਉਨ੍ਹਾਂ ਨੂੰ ਹਰ ਚੀਜ਼ ਨੂੰ ਬਿਲਕੁਲ ਉਸੇ ਤਰ੍ਹਾਂ ਦੁਬਾਰਾ ਬਣਾਉਣ ਵਿਚ ਮਦਦ ਕੀਤੀ ਜਿਵੇਂ ਇਹ 14ਵੀਂ ਸਦੀ ’ਚ ਹੁੰਦੀ ਸੀ। ਧੀਮਾਨ ਨੇ ਕਿਹਾ ਕਿ ਇਹ ਕਹਾਣੀ ਸਿਰਫ਼ ਦਿਖਾਵੇ ਲਈ ਨਹੀਂ ਹੈ। ਇਹ ਇਕ ਅਜਿਹੇ ਨਾਇਕ ਬਾਰੇ ਹੈ, ਜਿਸ ਬਾਰੇ ਬਹੁਤ ਘੱਟ ਲੋਕ ਜਾਣਦੇ ਹਨ। ਅਸੀਂ ਚਾਹੁੰਦੇ ਸੀ ਕਿ ਇਹ ਅਸਲੀ ਅਤੇ ਸਤਿਕਾਰਯੋਗ ਲੱਗੇ। ਜੰਗ ਦੇ ਦ੍ਰਿਸ਼ ਸਭ ਤੋਂ ਮੁਸ਼ਕਲ ਸਨ। ਘੋੜਿਆਂ ਨੂੰ ਮਾਰਵਾੜ ਤੋਂ ਲਿਆਂਦਾ ਗਿਆ ਸੀ ਅਤੇ ਜੰਗ ਦੇ ਦ੍ਰਿਸ਼ਾਂ ਲਈ ਸਮੂਹਾਂ ’ਚ ਚੱਲਣ ਲਈ ਵਿਸ਼ੇਸ਼ ਤੌਰ ’ਤੇ ਸਿਖਲਾਈ ਦਿੱਤੀ ਗਈ ਸੀ।