ਸਾਬਕਾ ਪਤੀ ਨੇ ਸ਼ਵੇਤਾ ਤਿਵਾੜੀ ’ਤੇ ਲਾਏ ਬੱਚਾ ਲੈ ਕੇ ਭੱਜਣ ਦੇ ਇਲਜ਼ਾਮ, ਸਬੂਤ ਵਜੋਂ ਸਾਂਝੀਆਂ ਕੀਤੀਆਂ ਵੀਡੀਓਜ਼
Tuesday, Nov 10, 2020 - 02:57 PM (IST)
ਜਲੰਧਰ (ਬਿਊਰੋ)– ਮਸ਼ਹੂਰ ਟੀ. ਵੀ. ਅਦਾਕਾਰਾ ਸ਼ਵੇਤਾ ਤਿਵਾੜੀ ਦੇ ਸਾਬਕਾ ਪਤੀ ਅਭਿਨਵ ਕੋਹਲੀ ਨੇ ਇੰਸਟਾਗ੍ਰਾਮ ’ਤੇ ਇਕ ਵੀਡੀਓ ਸਾਂਝੀ ਕੀਤੀ ਹੈ। ਸ਼ਵੇਤਾ ਵੀਡੀਓ ’ਚ ਆਪਣੇ ਸਾਬਕਾ ਪਤੀ ਨੂੰ ਘਰ ਦਾਖਲ ਹੋਣ ਤੋਂ ਰੋਕ ਰਹੀ ਹੈ। ਸ਼ਵੇਤਾ ਤੇ ਅਭਿਨਵ ਘਰ ਨੇੜੇ ਬਹਿਸ ਕਰਦੇ ਨਜ਼ਰ ਆ ਰਹੇ ਹਨ। ਇਸ ਦੌਰਾਨ ਦੋਵਾਂ ਵਿਚਾਲੇ ਧੱਕਾ-ਮੁੱਕੀ ਵੀ ਹੋਈ।
ਅਭਿਨਵ ਨੇ ਇਕ ਨਹੀਂ, ਦੋ ਨਹੀਂ, ਸਗੋਂ 5 ਵੀਡੀਓਜ਼ ਇੰਸਟਾਗ੍ਰਾਮ ’ਤੇ ਸ਼ੇਅਰ ਕੀਤੀਆਂ ਹਨ। ਹਰ ਵੀਡੀਓ ’ਚ ਉਸ ਨੇ ਆਪਣੇ ਪੱਖ ਨੂੰ ਬਿਆਨ ਕੀਤਾ ਹੈ ਤੇ ਸੱਚਾਈ ਸਾਹਮਣੇ ਲਿਆਉਣ ਦੀ ਕੋਸ਼ਿਸ਼ ਕੀਤੀ ਹੈ।
ਪਹਿਲੀ ਵੀਡੀਓ ਸਾਂਝੀ ਕਰਦਿਆਂ ਅਭਿਨਵ ਲਿਖਦੇ ਹਨ, ‘ਕਿਸੇ ਹੋਰ ਦੇ ਨਾਂ ਤੋਂ ਰੂਮ ਲਿਆ ਹੋਇਆ ਸੀ। ਦੁੱਖ ਦੀ ਗੱਲ ਹੈ ਕਿ ਇਕ ਪਿਤਾ ਨੂੰ ਪੁਲਸ ਉਸ ਦੇ ਬੱਚੇ ਨਾਲ ਦੋ ਪਲ ਲਈ ਵੀ ਨਹੀਂ ਮਿਲਵਾ ਸਕੀ। ਹੁਣ ਤਾਂ ਉਹ ਉਥੋਂ ਵੀ ਭੱਜ ਚੁੱਕੀ ਹੋਵੇਗੀ, ਇੰਨੀ ਮੁਸ਼ਕਿਲ ਨਾਲ ਲੱਭਿਆ ਸੀ। ਉਧਵ ਠਾਕਰੇ ਜੀ ਕਿਰਪਾ ਕਰਕੇ ਇਸ ਮਾਮਲੇ ’ਤੇ ਧਿਆਨ ਦਿਓ। ਇਕ ਪਿਓ ਹੋਣ ਦੇ ਨਾਅਤੇ ਮੈਨੂੰ ਦੁੱਖ ਝੱਲਣੇ ਪੈ ਰਹੇ ਹਨ। ਮੈਨੂੰ ਮੇਰੇ ਬੱਚੇ ਨਾਲ ਮਿਲਵਾਉਣ ’ਚ ਮਦਦ ਕੀਤੀ ਜਾਵੇ।’
ਦੂਜੀ ਵੀਡੀਓ ’ਚ ਅਭਿਨਵ ਨੇ ਲਿਖਿਆ, ‘ਜਿਸ ਦਿਨ ਬੱਚੇ ਨੂੰ ਮੇਰੇ ਨਾਲ ਥੋੜ੍ਹੀ ਦੇਰ ਲਈ ਮਿਲਵਾਇਆ ਤੇ ਫਿਰ ਗਾਇਬ ਹੋ ਗਈ ਤੇ ਮੈਂ ਦਰਵਾਜ਼ੇ ’ਤੇ ਘੰਟੀ ਵਜਾਉਂਦਾ ਰਿਹਾ। ਇਹ ਉਸ ਦੁਪਹਿਰ ਦੀ ਵੀਡੀਓ ਹੈ ਤੇ ਬੱਚਾ ਬੋਲ ਰਿਹਾ ਹੈ ਤੁਸੀਂ ਹੋਟਲ ਨਹੀਂ ਆਏ।’
ਅਭਿਨਵ ਨੇ ਤੀਜੀ ਵੀਡੀਓ ਸ਼ੇਅਰ ਕਰਦਿਆਂ ਲਿਖਿਆ, ‘ਉਸੇ ਦਿਨ।’ ਯਾਨੀ ਕਿ ਇਹ ਉਸੇ ਦਿਨ ਦੀ ਵੀਡੀਓ ਹੈ, ਜਦੋਂ ਉਸ ਨੂੰ ਬੱਚੇ ਨਾਲ ਮਿਲਵਾਇਆ ਗਿਆ।
ਚੌਥੀ ਵੀਡੀਓ ਦੀ ਸ਼ੁਰੂਆਤ ’ਚ ਅਭਿਨਵ ਨੇ ਲਿਖਿਆ, ‘ਧੋਖਾ, ਮੈਨੂੰ ਘਰ ਆਉਣ ਦਿੱਤਾ, ਜਦੋਂ ਬੱਚਾ ਮਨ੍ਹਾ ਕਰ ਰਿਹਾ ਸੀ। ਜਿੰਨੀ ਦੇਰ ਚਾਹਿਆ ਉਨੀ ਦੇਰ ਮੈਂ ਸਮਝਾਉਂਦਾ ਰਿਹਾ। ਬੱਚੇ ਦੇ ਸੌਣ ਤਕ ਤੂੰ ਰਹਿੰਦੀ ਸੀ ਤੇ ਮੇਰੇ ਨਾਲ ਕੀ ਕੀਤਾ ਘਰ ’ਚ ਦਾਖਲ ਨਹੀਂ ਹੋਣ ਦਿੱਤਾ ਤੇ ਫਿਰ ਬੱਚਾ ਲੈ ਕੇ ਭੱਜ ਗਈ ਤਾਂ ਕਿ ਉਹ ਮੈਨੂੰ ਮਿਲ ਨਾ ਸਕੇ ਤੇ ਸੋਚੇ ਕਿ ਮੈਂ ਹੀ ਮਿਲਣ ਨਹੀਂ ਆ ਰਿਹਾ।’
ਪੰਜਵੀਂ ਤੇ ਆਖਰੀ ਵੀਡੀਓ ’ਚ ਅਭਿਨਵ ਨੇ ਇਲਜ਼ਾਮ ਲਗਾਏ ਤੇ ਲਿਖਿਆ, ‘ਮੇਰੀ ਚੰਗਿਆਈ ਦਾ ਫਾਇਦਾ ਚੁੱਕਿਆ। ਮਈ ਤੋਂ ਸਤੰਬਰ ਤਕ ਦੂਰ ਰੱਖਿਆ। ਕੋਰੋਨਾ ਹੋਇਆ ਤਾਂ ਬੱਚਾ ਦੇ ਦਿੱਤਾ, ਜਦੋਂ ਬੱਚਾ ਨਹੀਂ ਆਉਣਾ ਚਾਹੁੰਦਾ ਸੀ, ਉਦੋਂ ਮੈਂ ਕਿਹਾ ਆ ਕੇ ਉਸ ਨੂੰ ਸਮਝਾਓ ਤੇ ਪਿਆਰ ਨਾਲ ਲੈ ਜਾਓ ਤੇ ਮੈਨੂੰ ਕੀ ਮਿਲਿਆ, ਬੱਚੇ ਕੋਲੋਂ ਦੂਰ ਕਰ ਦਿੱਤਾ।’
