ਪੂਰਨ ਸ਼ਾਹਕੋਟੀ ਦੇ ਦੇਹਾਂਤ ਨਾਲ ਇੰਡਸਟਰੀ 'ਚ ਸੋਗ; ਪਰਿਵਾਰ ਨਾਲ ਦੁੱਖ ਵੰਡਾਉਣ ਪਹੁੰਚੇ ਜਸਬੀਰ ਜੱਸੀ ਤੇ ਫਿਰੋਜ਼ (ਵੀਡੀ

ਜਲੰਧਰ- ਪੰਜਾਬੀ ਸੰਗੀਤ ਜਗਤ ਲਈ ਇਹ ਖ਼ਬਰ ਬੇਹੱਦ ਦੁਖਦਾਈ ਸਾਬਤ ਹੋਈ ਹੈ। ਸੂਫੀ ਗਾਇਕੀ ਅਤੇ ਸੰਗੀਤ ਦੀ 'ਯੂਨੀਵਰਸਿਟੀ' ਮੰਨੇ ਜਾਣ ਵਾਲੇ ਉਸਤਾਦ ਜਨਾਬ ਪੂਰਨ ਸ਼ਾਹਕੋਟੀ ਜੀ ਦੇ ਅਕਾਲ ਚਲਾਣੇ ਨਾਲ ਸੰਗੀਤ ਦੇ ਇੱਕ ਮਹਾਨ ਯੁੱਗ ਦਾ ਅੰਤ ਹੋ ਗਿਆ ਹੈ। ਉਨ੍ਹਾਂ ਦੇ ਦਿਹਾਂਤ ਦੀ ਖ਼ਬਰ ਸੁਣਦਿਆਂ ਹੀ ਪੂਰੀ ਮਨੋਰੰਜਨ ਇੰਡਸਟਰੀ ਵਿੱਚ ਸੋਗ ਦੀ ਲਹਿਰ ਦੌੜ ਗਈ ਹੈ ਅਤੇ ਕਲਾਕਾਰਾਂ ਦੀਆਂ ਅੱਖਾਂ ਨਮ ਹਨ।
ਵੱਡੇ-ਵੱਡੇ ਸਿਤਾਰਿਆਂ ਦੇ ਮਾਰਗਦਰਸ਼ਕ ਸਨ ਉਸਤਾਦ ਜੀ
ਸਰੋਤਾਂ ਅਨੁਸਾਰ ਪੂਰਨ ਸ਼ਾਹਕੋਟੀ ਜੀ ਨੇ ਸੰਗੀਤ ਜਗਤ ਨੂੰ ਬਹੁਤ ਵੱਡੇ-ਵੱਡੇ ਸਟਾਰ ਕਲਾਕਾਰ ਦਿੱਤੇ ਹਨ। ਉਨ੍ਹਾਂ ਨੇ ਮਸ਼ਹੂਰ ਗਾਇਕ ਹੰਸ ਰਾਜ ਹੰਸ ਵਰਗੇ ਹੀਰਿਆਂ ਨੂੰ ਆਪਣੇ ਗੋਡੀਂ ਬਿਠਾ ਕੇ ਤਰਾਸ਼ਿਆ ਸੀ। ਉਨ੍ਹਾਂ ਦੇ ਆਪਣੇ ਪਰਿਵਾਰ ਵਿੱਚ ਹੀ 'ਸੱਤ ਸੁਰਾਂ' ਵਾਂਗ ਸੱਤ ਗਾਇਕ ਪੈਦਾ ਹੋਏ ਹਨ, ਜੋ ਉਨ੍ਹਾਂ ਦੀ ਵਿਰਾਸਤ ਨੂੰ ਅੱਗੇ ਵਧਾ ਰਹੇ ਹਨ। ਉਨ੍ਹਾਂ ਦਾ ਪਹਿਲਾ ਮਸ਼ਹੂਰ ਗੀਤ 'ਫੱਕਰਾਂ ਦੀ ਕੁੱਲੀ ਚ ਰੱਖਦਾ ਐਵੇਂ ਭੈਣ' ਅੱਜ ਵੀ ਲੋਕਾਂ ਦੇ ਜ਼ਿਹਨ ਵਿੱਚ ਵਸਿਆ ਹੋਇਆ ਹੈ।
ਕਲਾਕਾਰਾਂ ਨੇ ਵੰਡਾਇਆ ਮਾਸਟਰ ਸਲੀਮ ਨਾਲ ਦੁੱਖ
ਇਸ ਦੁਖਦਾਈ ਘੜੀ ਵਿੱਚ ਪੰਜਾਬੀ ਗਾਇਕ ਜਸਬੀਰ ਜੱਸੀ, ਫਿਰੋਜ਼ ਖਾਨ ਅਤੇ ਕਈ ਹੋਰ ਨਾਮੀ ਹਸਤੀਆਂ ਉਸਤਾਦ ਜੀ ਦੇ ਘਰ ਪਹੁੰਚੀਆਂ ਅਤੇ ਉਨ੍ਹਾਂ ਦੇ ਸਪੁੱਤਰ ਮਾਸਟਰ ਸਲੀਮ ਤੇ ਪਰਿਵਾਰ ਨਾਲ ਦੁੱਖ ਸਾਂਝਾ ਕੀਤਾ। ਜਸਬੀਰ ਜੱਸੀ ਨੇ ਭਾਵੁਕ ਹੁੰਦਿਆਂ ਕਿਹਾ ਕਿ ਪਿਛਲੇ ਕੁਝ ਸਾਲਾਂ ਵਿੱਚ ਅਸੀਂ ਚਰਨਜੀਤ ਅਹੂਜਾ, ਸ਼ੌਕਤ ਅਲੀ ਮਤੋਈ ਅਤੇ ਸਰਦੂਲ ਸਿਕੰਦਰ ਵਰਗੇ ਕਈ ਮਹਾਨ ਕਲਾਕਾਰਾਂ ਨੂੰ ਖੋ ਦਿੱਤਾ ਹੈ ਅਤੇ ਹੁਣ ਉਸਤਾਦ ਜੀ ਦਾ ਜਾਣਾ ਇੱਕ ਵੱਡਾ ਘਾਟਾ ਹੈ।

ਪਿਆਰੇ ਸੁਭਾਅ ਅਤੇ ਸੂਝਵਾਨ ਸ਼ਖਸੀਅਤ ਦੇ ਮਾਲਕ
ਉਸਤਾਦ ਪੂਰਨ ਸ਼ਾਹਕੋਟੀ ਜੀ ਬਹੁਤ ਹੀ ਮਿੱਠਬੋਲੜੇ ਅਤੇ ਪਿਆਰੇ ਸੁਭਾਅ ਦੇ ਇਨਸਾਨ ਸਨ। ਉਹ ਇੰਨੇ ਸੂਝਵਾਨ ਸਨ ਕਿ ਉਨ੍ਹਾਂ ਨੇ ਆਪਣੇ ਬੇਟੇ ਨੂੰ ਆਪਣਾ ਸ਼ਗਿਰਦ ਨਹੀਂ ਬਣਾਇਆ, ਕਿਉਂਕਿ ਉਨ੍ਹਾਂ ਦਾ ਮੰਨਣਾ ਸੀ ਕਿ ਬੱਚੇ ਆਪਣੇ ਪਿਤਾ ਨਾਲੋਂ ਬਾਹਰ ਦੇ ਉਸਤਾਦ ਦੀ ਗੱਲ ਜ਼ਿਆਦਾ ਮੰਨਦੇ ਹਨ। ਉਨ੍ਹਾਂ ਦੇ ਘਰ ਦਾ ਮਾਹੌਲ ਹਮੇਸ਼ਾ ਖੁਸ਼ਗਵਾਰ ਰਹਿੰਦਾ ਸੀ, ਜਿੱਥੇ ਗਾਇਕੀ ਦੇ ਰਿਆਜ਼ ਦੇ ਨਾਲ-ਨਾਲ ਹਾਸਾ-ਠੱਠਾ ਵੀ ਚੱਲਦਾ ਰਹਿੰਦਾ ਸੀ।
ਰਹਿੰਦੀ ਦੁਨੀਆ ਤੱਕ ਰਹੇਗਾ ਨਾਮ
ਇੰਡਸਟਰੀ ਦੇ ਕਲਾਕਾਰਾਂ ਦਾ ਕਹਿਣਾ ਹੈ ਕਿ ਭਾਵੇਂ ਉਹ ਸਰੀਰਕ ਤੌਰ 'ਤੇ ਸਾਡੇ ਵਿੱਚ ਨਹੀਂ ਰਹੇ, ਪਰ ਉਨ੍ਹਾਂ ਦੀ ਆਵਾਜ਼ ਅਤੇ ਉਨ੍ਹਾਂ ਦੁਆਰਾ ਤਿਆਰ ਕੀਤੇ ਗਏ ਕਲਾਕਾਰ ਹਮੇਸ਼ਾ ਉਨ੍ਹਾਂ ਦੀ ਯਾਦ ਤਾਜ਼ਾ ਰੱਖਣਗੇ। ਰਹਿੰਦੀ ਦੁਨੀਆ ਤੱਕ ਪੂਰਨ ਸ਼ਾਹਕੋਟੀ ਜੀ ਦਾ ਨਾਮ ਸੰਗੀਤ ਦੇ ਇਤਿਹਾਸ ਵਿੱਚ ਸੁਨਹਿਰੀ ਅੱਖਰਾਂ ਵਿੱਚ ਲਿਖਿਆ ਰਹੇਗਾ।