''ਹੋਵੇ ਤੁੱਤਾਂ ਵਾਲੀ ਠੰਢੀ-ਠੰਢੀ ਛਾਂ ਦੋਸਤੋ'' ਗਾਣੇ ਨਾਲ ਮਸ਼ਹੂਰ ਹੋਇਆ ਪੰਜਾਬੀ ਮਾਡਲ ਬਣਿਆ ਡਿਲਿਵਰੀ ਬੁਆਏ
Tuesday, Dec 30, 2025 - 12:10 PM (IST)
ਪਟਿਆਲਾ: ਪੰਜਾਬੀ ਮਿਊਜ਼ਿਕ ਇੰਡਸਟਰੀ ਵਿੱਚ ਕਿਸੇ ਸਮੇਂ ਆਪਣੀ ਅਦਾਕਾਰੀ ਅਤੇ ਭੰਗੜੇ ਨਾਲ ਧੂਮ ਮਚਾਉਣ ਵਾਲੇ ਮਸ਼ਹੂਰ ਮਾਡਲ ਸੋਨੂ ਬਖਸ਼ੀ (ਕਮਲਪ੍ਰੀਤ ਸਿੰਘ) ਅੱਜ ਗੁੰਮਨਾਮੀ ਅਤੇ ਆਰਥਿਕ ਤੰਗੀ ਦੀ ਜ਼ਿੰਦਗੀ ਜੀਅ ਰਹੇ ਹਨ। ਇੱਕ ਸਮਾਂ ਸੀ ਜਦੋਂ ਪੰਜਾਬੀ ਮਿਊਜ਼ਿਕ ਵੀਡੀਓਜ਼ ਉਨ੍ਹਾਂ ਤੋਂ ਬਿਨਾਂ ਅਧੂਰੀਆਂ ਮੰਨੀਆਂ ਜਾਂਦੀਆਂ ਸਨ, ਪਰ ਅੱਜ ਉਹ ਪਟਿਆਲਾ ਦੀਆਂ ਸੜਕਾਂ 'ਤੇ ਸਵਿਗੀ (Swiggy) ਰਾਈਡਰ ਵਜੋਂ 12-12 ਘੰਟੇ ਮੋਟਰਸਾਈਕਲ ਚਲਾ ਕੇ ਆਪਣੇ ਪਰਿਵਾਰ ਦਾ ਗੁਜ਼ਾਰਾ ਕਰ ਰਹੇ ਹਨ।
ਸਫਲਤਾ ਦਾ ਸੁਨਹਿਰੀ ਦੌਰ
ਸੋਨੂ ਬਖਸ਼ੀ ਨੇ ਆਪਣੇ ਕਰੀਅਰ ਦੀ ਸ਼ੁਰੂਆਤ ਪਟਿਆਲਾ ਦੇ ਖਾਲਸਾ ਕਾਲਜ ਦੀ ਭੰਗੜਾ ਟੀਮ ਤੋਂ ਕੀਤੀ ਸੀ। ਸਾਲ 1997 ਤੋਂ 2005/2007 ਤੱਕ ਉਨ੍ਹਾਂ ਦਾ ਸੁਨਹਿਰੀ ਦੌਰ ਰਿਹਾ, ਜਿਸ ਵਿੱਚ ਉਨ੍ਹਾਂ ਨੇ 'ਹੋਵੇ ਤੁੱਤਾਂ ਵਾਲੀ ਠੰਢੀ-ਠੰਢੀ ਛਾਂ ਦੋਸਤੋ', 'ਮਣਕੇ ਟੁੱਟਦੇ ਜਾਂਦੇ' ਵਰਗੇ ਕਈ ਸੁਪਰਹਿੱਟ ਗੀਤਾਂ ਵਿੱਚ ਮਾਡਲਿੰਗ ਕੀਤੀ। ਉਨ੍ਹਾਂ ਨੇ ਰਿੰਪੀ ਪ੍ਰਿੰਸ ਵਰਗੇ ਵੱਡੇ ਵੀਡੀਓ ਨਿਰਦੇਸ਼ਕਾਂ ਅਤੇ ਸਤਵਿੰਦਰ ਬੁੱਗਾ, ਅਮਰ ਅਰਸ਼ੀ ਤੇ ਦੀਪਕ ਢਿੱਲੋਂ ਵਰਗੇ ਨਾਮੀ ਗਾਇਕਾਂ ਨਾਲ ਕੰਮ ਕੀਤਾ।
ਇਹ ਵੀ ਪੜ੍ਹੋ: ਜਾਣੋ ਕੌਣ ਸੀ 26 ਸਾਲਾ ਅਦਾਕਾਰਾ ਨੰਦਿਨੀ ਸੀਐਮ, ਜਿਸ ਨੇ ਛੋਟੀ ਉਮਰੇ ਚੁੱਕ ਲਿਆ ਵੱਡਾ ਕਦਮ
ਬਦਲਦੇ ਦੌਰ ਅਤੇ ਨਿੱਜੀ ਮੁਸ਼ਕਲਾਂ
ਇੰਡਸਟਰੀ ਵਿੱਚ ਆਏ ਬਦਲਾਅ, ਜਿੱਥੇ ਗਾਇਕ ਖੁਦ ਹੀ ਮਾਡਲ ਅਤੇ ਐਕਟਰ ਬਣਨ ਲੱਗੇ, ਕਾਰਨ ਸੋਨੂ ਵਰਗੇ ਕਲਾਕਾਰਾਂ ਦਾ ਕੰਮ ਘਟ ਗਿਆ। ਕੰਮ ਦੀ ਘਾਟ ਕਾਰਨ ਉਹ ਮਾਨਸਿਕ ਪ੍ਰੇਸ਼ਾਨੀ (ਡਿਪਰੈਸ਼ਨ) ਦਾ ਸ਼ਿਕਾਰ ਹੋ ਗਏ ਅਤੇ ਨਸ਼ਿਆਂ ਦੀ ਦਲਦਲ ਵਿੱਚ ਫਸ ਗਏ। ਇਸ ਦੌਰਾਨ ਉਨ੍ਹਾਂ 'ਤੇ ਕਾਰ ਚੋਰੀ ਵਰਗੇ ਇਲਜ਼ਾਮ ਵੀ ਲੱਗੇ ਅਤੇ ਉਨ੍ਹਾਂ ਨੂੰ ਜੇਲ੍ਹ ਵੀ ਜਾਣਾ ਪਿਆ, ਹਾਲਾਂਕਿ ਉਨ੍ਹਾਂ ਨੇ ਇਨ੍ਹਾਂ ਇਲਜ਼ਾਮਾਂ ਨੂੰ ਇੱਕ ਗਲਤਫਹਿਮੀ ਦੱਸਿਆ ਹੈ।
ਇਹ ਵੀ ਪੜ੍ਹੋ: 'ਕੁੜੀਆਂ ਨਾਲ ਵੀ ਰਹੇ 'ਨਿੱਜੀ' ਸਬੰਧ..!'; Titanic ਫੇਮ ਅਦਾਕਾਰਾ ਨੇ ਕੀਤਾ ਵੱਡਾ ਖੁਲਾਸਾ
ਪਰਿਵਾਰ ਲਈ ਵਾਪਸੀ ਅਤੇ ਨਵੀਂ ਸ਼ੁਰੂਆਤ
ਆਪਣੀਆਂ ਦੋ ਧੀਆਂ, ਪਤਨੀ ਅਤੇ ਮਾਂ ਦੀ ਖ਼ਾਤਰ ਸੋਨੂ ਬਖਸ਼ੀ ਨੇ ਨਸ਼ਿਆਂ ਨੂੰ ਤਿਆਗ ਕੇ ਸਮਾਜ ਦੀ ਮੁੱਖ ਧਾਰਾ ਵਿੱਚ ਵਾਪਸੀ ਕੀਤੀ। ਹੁਣ ਉਹ ਬਿਨਾਂ ਕਿਸੇ ਸ਼ਰਮ ਦੇ ਮਿਹਨਤ ਦੀ ਕਮਾਈ ਕਰ ਰਹੇ ਹਨ। ਉਹ ਮਿਊਜ਼ੀਕਲ ਸ਼ੋਅਜ਼ ਵਿੱਚ ਐਂਕਰਿੰਗ ਵੀ ਕਰਦੇ ਹਨ ਅਤੇ ਖਾਲੀ ਸਮੇਂ ਵਿੱਚ ਡਿਲੀਵਰੀ ਬੁਆਏ ਵਜੋਂ ਕੰਮ ਕਰਦੇ ਹਨ ਤਾਂ ਜੋ ਘਰ ਦੀਆਂ ਜ਼ਿੰਮੇਵਾਰੀਆਂ ਪੂਰੀਆਂ ਕਰ ਸਕਣ।
ਇਹ ਵੀ ਪੜ੍ਹੋ: ਹਾਲੀਵੁੱਡ 'ਚ ਪਸਰਿਆ ਮਾਤਮ, ਘਰ 'ਚੋਂ ਮਿਲੀ ਮਸ਼ਹੂਰ ਅਦਾਕਾਰਾ ਦੀ ਲਾਸ਼; ਕੀਤੇ ਸਨ 4 ਵਿਆਹ
ਇੰਡਸਟਰੀ ਨੂੰ ਗੁਹਾਰ
ਸੋਨੂ ਬਖਸ਼ੀ ਨੇ ਪੰਜਾਬੀ ਫਿਲਮ ਜਗਤ ਦੇ ਦਿੱਗਜਾਂ ਜਿਵੇਂ ਦਿਲਜੀਤ ਦੋਸਾਂਝ, ਬਿਨੂ ਢਿੱਲੋਂ, ਦੇਵ ਖਰੋੜ ਅਤੇ ਮਨਕੀਰਤ ਔਲਖ ਨੂੰ ਅਪੀਲ ਕੀਤੀ ਹੈ ਕਿ ਉਨ੍ਹਾਂ ਨੂੰ ਫਿਲਮਾਂ ਜਾਂ ਵੈੱਬ ਸੀਰੀਜ਼ ਵਿੱਚ ਕੰਮ ਕਰਨ ਦਾ ਇੱਕ ਮੌਕਾ ਦਿੱਤਾ ਜਾਵੇ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਉਹ ਕਿਸੇ ਤੋਂ ਪੈਸਾ ਨਹੀਂ, ਸਗੋਂ ਸਿਰਫ਼ ਕੰਮ ਮੰਗ ਰਹੇ ਹਨ ਤਾਂ ਜੋ ਉਹ ਮੁੜ ਆਪਣੇ ਪੈਰਾਂ 'ਤੇ ਖੜ੍ਹੇ ਹੋ ਸਕਣ।
ਇਹ ਵੀ ਪੜ੍ਹੋ: ਐਕਟਿੰਗ ਛੱਡ Fulltime ਸਿਆਸਤਦਾਨ ਬਣਨਗੇ ਵਿਜੇ; ਇਸ ਦਿਨ ਰਿਲੀਜ਼ ਹੋਵੇਗੀ ਆਖਰੀ ਫਿਲਮ
