ਹਵਨ ਤੇ ਕੰਜਕ ਪੂਜਨ ਦੇ ਨਾਲ ਪੂਰੀ ਹੋਈ ਪਾਇਲ ਮਲਿਕ ਦੀ ਧਾਰਮਿਕ ਸਜ਼ਾ

ਐਂਟਰਟੇਨਮੈਂਟ ਡੈਸਕ- ਹਰਿਆਣਾ ਦੇ ਮਸ਼ਹੂਰ ਯੂਟਿਊਬਰ ਅਰਮਾਨ ਮਲਿਕ ਦੀ ਪਤਨੀ ਪਾਇਲ ਮਲਿਕ ਨੇ ਪਟਿਆਲਾ ਦੇ ਕਾਲੀ ਮਾਤਾ ਮੰਦਰ ਵਿੱਚ ਆਪਣੀ ਧਾਰਮਿਕ ਸਜ਼ਾ ਪੂਰੀ ਕਰ ਲਈ ਹੈ। ਇਸ ਦੌਰਾਨ ਪਿਛਲੇ ਦਿਨ ਅਰਮਾਨ ਮਲਿਕ ਆਪਣੀਆਂ ਦੋਵੇਂ ਪਤਨੀਆਂ - ਪਾਇਲ-ਕ੍ਰਿਤਿਕਾ ਮਲਿਕ ਅਤੇ ਆਪਣੇ ਚਾਰੋਂ ਬੱਚਿਆਂ ਨਾਲ ਮੰਦਰ ਪਹੁੰਚੇ। ਸਾਰਿਆਂ ਨੇ ਮਿਲ ਕੇ ਮੰਦਰ ਵਿੱਚ ਹਵਨ ਕੀਤਾ ਅਤੇ ਫਿਰ ਕੰਜਕ ਪੂਜਾ ਵੀ ਕਰਵਾਈ। ਪਾਇਲ ਆਪਣੀ ਗਲਤੀ ਲਈ ਲਗਾਤਾਰ ਪਛਤਾਵਾ ਕਰ ਰਹੀ ਹੈ।

ਦਰਅਸਲ ਸਾਰਾ ਮਾਮਲਾ ਉਦੋਂ ਸ਼ੁਰੂ ਹੋਇਆ ਜਦੋਂ ਪਾਇਲ ਮਲਿਕ ਨੇ ਮਾਂ ਕਾਲੀ ਦਾ ਰੂਪ ਧਾਰਨ ਕਰਕੇ ਸੋਸ਼ਲ ਮੀਡੀਆ 'ਤੇ ਇੱਕ ਵੀਡੀਓ ਪੋਸਟ ਕੀਤੀ। ਇਸ ਵੀਡੀਓ ਨੂੰ ਲੈ ਕੇ ਧਾਰਮਿਕ ਭਾਵਨਾਵਾਂ ਨੂੰ ਠੇਸ ਪਹੁੰਚਾਉਣ ਦੀ ਗੱਲ ਚੱਲ ਰਹੀ ਸੀ। ਇਸ ਤੋਂ ਬਾਅਦ ਪਾਇਲ ਖੁਦ ਪਟਿਆਲਾ ਦੇ ਕਾਲੀ ਮਾਤਾ ਮੰਦਰ ਪਹੁੰਚੀ ਅਤੇ ਮੁਆਫੀ ਮੰਗੀ ਅਤੇ ਧਾਰਮਿਕ ਸਜ਼ਾ ਵਜੋਂ 7 ਦਿਨਾਂ ਲਈ ਮੰਦਰ ਦੀ ਸਫਾਈ ਕਰਨ ਦਾ ਪ੍ਰਣ ਲਿਆ।

ਸ਼ਿਵ ਸੈਨਾ ਹਿੰਦ ਦੇ ਰਾਸ਼ਟਰੀ ਜਨਰਲ ਸਕੱਤਰ ਦੀਪਾਂਸ਼ੂ ਸੂਦ ਨੇ ਮੋਹਾਲੀ ਦੇ ਢਕੋਲੀ ਪੁਲਸ ਸਟੇਸ਼ਨ ਵਿੱਚ ਸ਼ਿਕਾਇਤ ਦਰਜ ਕਰਵਾਈ ਸੀ। ਪਾਇਲ ਨੇ ਆਪਣੀ ਗਲਤੀ ਮੰਨਦੇ ਹੋਏ 22 ਜੁਲਾਈ ਨੂੰ ਪਟਿਆਲਾ ਦੇ ਕਾਲੀ ਮਾਤਾ ਮੰਦਰ ਵਿੱਚ ਜਨਤਕ ਤੌਰ 'ਤੇ ਮੁਆਫੀ ਮੰਗੀ। 

ਅਗਲੇ ਦਿਨ 23 ਜੁਲਾਈ ਨੂੰ ਉਹ ਮੋਹਾਲੀ ਦੇ ਖਰੜ ਵਿੱਚ ਕਾਲੀ ਮਾਤਾ ਮੰਦਰ ਪਹੁੰਚੀ ਅਤੇ ਉੱਥੇ ਵੀ ਮੁਆਫੀ ਮੰਗੀ। ਮੰਦਰ ਦੇ ਮੁਖੀ ਨਿਸ਼ਾਂਤ ਸ਼ਰਮਾ ਨੇ ਪਾਇਲ ਨੂੰ ਸਲਾਹ ਦਿੱਤੀ ਕਿ ਉਹ ਸੱਤ ਦਿਨ ਸੇਵਾ ਪੂਰੀ ਕਰਨ ਤੋਂ ਬਾਅਦ ਕੰਜਕ ਪੂਜਨ ਕਰੇ ਅਤੇ ਫਿਰ ਹਰਿਦੁਆਰ ਜਾ ਕੇ ਸੰਤਾਂ ਤੋਂ ਅਸ਼ੀਰਵਾਦ ਲਵੇ। ਪਾਇਲ ਨੇ ਇਸ ਸਲਾਹ 'ਤੇ ਅਮਲ ਕਰਦਿਆਂ ਸੱਤ ਦਿਨ ਮੰਦਰ ਦੀ ਸਫਾਈ ਕੀਤੀ ਅਤੇ ਫਿਰ ਸ਼ਨੀਵਾਰ ਨੂੰ ਕੰਜਕ ਪੂਜਨ ਕੀਤਾ। ਇਸ ਤੋਂ ਬਾਅਦ ਉਹ ਉਤਰਾਖੰਡ ਦੇ ਹਰਿਦੁਆਰ ਗਈ ਅਤੇ ਨਿਰੰਜਨੀ ਅਖਾੜੇ ਦੇ ਆਚਾਰੀਆ ਮਹਾਮੰਡਲੇਸ਼ਵਰ ਕੈਲਾਸ਼ਾਨੰਦ ਗਿਰੀ ਨੂੰ ਮਿਲੀ, ਆਸ਼ੀਰਵਾਦ ਲਿਆ ਅਤੇ ਪੂਜਾ ਕੀਤੀ।