ਪਹਿਲਗਾਮ ਹਮਲੇ ਕਾਰਨ ਅਮਰੀਕੀ ਅਦਾਕਾਰ ਕੇਵਿਨ ਹਾਰਟ ਦਾ ਭਾਰਤ ''ਚ ਕਾਮੇਡੀ ਸ਼ੋਅ ਰੱਦ

ਲਾਸ ਏਂਜਲਸ (ਏਜੰਸੀ)- ਅਮਰੀਕੀ ਅਦਾਕਾਰ ਅਤੇ ਕਾਮੇਡੀਅਨ ਕੇਵਿਨ ਹਾਰਟ ਨੇ ਪਹਿਲਗਾਮ ਅੱਤਵਾਦੀ ਹਮਲੇ ਦੇ ਮੱਦੇਨਜ਼ਰ ਪ੍ਰਭਾਵਿਤ ਲੋਕਾਂ ਨਾਲ ਇਕਜੁੱਟਤਾ ਦਿਖਾਉਣ ਲਈ ਭਾਰਤ ਵਿੱਚ ਆਪਣਾ ਸ਼ੋਅ 'ਐਕਟਿੰਗ ਮਾਈ ਏਜ' ਰੱਦ ਕਰ ਦਿੱਤਾ ਹੈ। 'ਗੇਟ ਹਾਰਡ', 'ਦਿ ਵੈਡਿੰਗ ਰਿੰਗਰ' ਅਤੇ 'ਰਾਈਡ ਅਲੌਂਗ' ਵਰਗੀਆਂ ਫਿਲਮਾਂ ਵਿੱਚ ਆਪਣੀਆਂ ਭੂਮਿਕਾਵਾਂ ਲਈ ਜਾਣੇ ਜਾਂਦੇ ਹਾਰਟ 30 ਅਪ੍ਰੈਲ ਨੂੰ ਦਿੱਲੀ ਵਿੱਚ ਸ਼ੋਅ ਕਰਨ ਵਾਲੇ ਸਨ।

ਇਹ ਦੇਸ਼ ਵਿੱਚ ਹਾਰਟ ਦਾ ਪਹਿਲਾ ਪ੍ਰੋਗਰਾਮ ਹੋਣਾ ਸੀ। ਐਤਵਾਰ ਨੂੰ ਇੰਸਟਾਗ੍ਰਾਮ 'ਤੇ ਸਾਂਝੇ ਕੀਤੇ ਗਏ ਇੱਕ ਬਿਆਨ ਵਿੱਚ ਸ਼ੋਅ ਦੇ ਪ੍ਰਬੰਧਕ 'ਡਿਸਟ੍ਰਿਕਟ ਬਾਏ ਜ਼ੋਮੈਟੋ' ਨੇ ਕਿਹਾ, "ਮਹੱਤਵਪੂਰਨ ਜਾਣਕਾਰੀ: ਹਾਲ ਹੀ ਵਿੱਚ ਵਾਪਰੀ ਦੁਖਦਾਈ ਘਟਨਾ ਦੇ ਮੱਦੇਨਜ਼ਰ, ਅਸੀਂ, ਕੇਵਿਨ ਹਾਰਟ ਦੀ ਟੀਮ ਦੇ ਨਾਲ, 30 ਅਪ੍ਰੈਲ ਨੂੰ ਹੋਣ ਵਾਲੇ ਦਿੱਲੀ ਸ਼ੋਅ ਨੂੰ ਰੱਦ ਕਰਨ ਦਾ ਫੈਸਲਾ ਕੀਤਾ ਹੈ। ਅਸੀਂ ਇੱਕ ਨਵੇਂ ਸ਼ਡਿਊਲ 'ਤੇ ਕੇਵਿਨ ਹਾਰਟ ਦੀ ਟੀਮ ਨਾਲ ਮਿਲ ਕੇ ਕੰਮ ਕਰ ਰਹੇ ਹਾਂ ਅਤੇ ਜਲਦੀ ਹੀ ਵੇਰਵੇ ਸਾਂਝੇ ਕਰਾਂਗੇ।"

ਪੋਸਟ ਦੀ ਕੈਪਸ਼ਨ ਵਿੱਚ ਲਿਖਿਆ ਸੀ, "ਅਸੀਂ ਤੁਹਾਨੂੰ ਸਾਰਿਆਂ ਨੂੰ ਮਿਲਣ ਦੀ ਉਤਸੁਕ ਹਾਂ, ਸਾਡਾ ਮੰਨਣਾ ਹੈ ਕਿ ਪ੍ਰਭਾਵਿਤ ਲੋਕਾਂ ਨਾਲ ਏਕਤਾ ਦਿਖਾਉਣਾ ਮਹੱਤਵਪੂਰਨ ਹੈ।" 'ਡਿਸਟ੍ਰਿਕਟ ਬਾਏ ਜ਼ੋਮੈਟੋ' ਨੇ ਕਿਹਾ ਕਿ ਲੋਕਾਂ ਦੇ ਪੈਸੇ ਵਾਪਸ ਕਰ ਦਿੱਤੇ ਜਾਣਗੇ। ਪਿਛਲੇ ਮੰਗਲਵਾਰ ਜੰਮੂ-ਕਸ਼ਮੀਰ ਦੇ ਪਹਿਲਗਾਮ ਵਿੱਚ ਇੱਕ ਅੱਤਵਾਦੀ ਹਮਲੇ ਵਿੱਚ 26 ਲੋਕ ਮਾਰੇ ਗਏ ਸਨ, ਜਿਨ੍ਹਾਂ ਵਿੱਚੋਂ ਜ਼ਿਆਦਾਤਰ ਸੈਲਾਨੀ ਸਨ। ਹਾਰਟ ਤੋਂ ਇਲਾਵਾ, ਗਾਇਕ ਅਰਿਜੀਤ ਸਿੰਘ, ਸ਼੍ਰੇਆ ਘੋਸ਼ਾਲ, ਏਪੀ ਢਿੱਲੋਂ ਅਤੇ ਪਾਪੋਨ ਨੇ ਵੀ ਪਹਿਲਗਾਮ ਹਮਲੇ ਤੋਂ ਬਾਅਦ ਆਪਣੇ ਪ੍ਰੋਗਰਾਮਾਂ ਦੀਆਂ ਤਰੀਕਾਂ ਬਦਲ ਦਿੱਤੀਆਂ ਹਨ।