18 ਮਹੀਨੇ ਘਰ ’ਚ ਬੰਦ ਰਹੇ ਸਨ ਹਨੀ ਸਿੰਘ, ਸਫ਼ਲਤਾ ਦੇ ਮੁਕਾਮ ’ਤੇ ਪਹੁੰਚ ਸਿਹਤ ਨੇ ਦੇ ਦਿੱਤਾ ਸੀ ਧੋਖਾ
Monday, Mar 15, 2021 - 01:42 PM (IST)
ਮੁੰਬਈ (ਬਿਊਰੋ)– ਗਾਇਕ, ਰੈਪਰ ਹਨੀ ਸਿੰਘ ਅੱਜ ਆਪਣਾ ਜਨਮਦਿਨ ਮਨਾ ਰਹੇ ਹਨ। ਹਨੀ ਸਿੰਘ ਆਪਣੇ ਗੀਤਾਂ ਦੇ ਨਾਲ-ਨਾਲ ਆਪਣੀ ਨਿੱਜੀ ਜ਼ਿੰਦਗੀ ਕਾਰਨ ਵੀ ਚਰਚਾ ’ਚ ਰਹਿੰਦੇ ਹਨ। ਹਨੀ ਸਿੰਘ ਦਾ ਅਸਲੀ ਨਾਂ ਹਿਰਦੇਸ਼ ਸਿੰਘ ਹੈ।
ਹਨੀ ਸਿੰਘ ਐਲਬਮਜ਼ ਲਈ ਸਾਲ 2005-06 ਤੋਂ ਗੀਤ ਗਾ ਰਹੇ ਹਨ। ਹਿੰਦੀ ਫ਼ਿਲਮਾਂ ’ਚ ਉਨ੍ਹਾਂ ਦੇ ਗੀਤਾਂ ਦੀ ਸ਼ੁਰੂਆਤ ਸਾਲ 2012 ਤੋਂ ਹੋਈ ਸੀ। ਸਭ ਤੋਂ ਪਹਿਲਾਂ ਫ਼ਿਲਮ ‘ਕਾਕਟੇਲ’ ’ਚ ਹਨੀ ਸਿੰਘ ਨੇ ‘ਮੈਂ ਸ਼ਰਾਬੀ’ ਗੀਤ ਗਾਇਆ ਸੀ।
‘ਕਾਕਟੇਲ’ ਫ਼ਿਲਮ ਦਾ ਇਕ ਹੋਰ ਗੀਤ ‘ਅੰਗਰੇਜ਼ੀ ਬੀਟ’ ਬੇਹੱਦ ਹਿੱਟ ਹੋਇਆ ਸੀ। ਇਸ ਗੀਤ ਨੂੰ ਵੀ ਹਨੀ ਸਿੰਘ ਨੇ ਗਾਇਆ ਸੀ। ਇਸ ਤੋਂ ਬਾਅਦ ‘ਸੰਨ ਆਫ ਸਰਦਾਰ’ ’ਚ ਹਨੀ ਸਿੰਘ ਨੇ ‘ਰਾਣੀ ਤੂੰ ਮੈਂ ਰਾਜਾ’ ਗੀਤ ਗਾਇਆ ਸੀ, ਜੋ ਕਾਫੀ ਪ੍ਰਸਿੱਧ ਹੋਇਆ ਸੀ।
ਹਨੀ ਸਿੰਘ ਦੀ ਨਿੱਜੀ ਜ਼ਿੰਦਗੀ ਦੀ ਗੱਲ ਕਰੀਏ ਤਾਂ ਹਨੀ ਨੇ ਸ਼ਾਲਿਨੀ ਤਲਵਾਰ ਨਾਲ ਵਿਆਹ ਕਰਵਾਇਆ ਹੈ। ਸ਼ਾਲਿਨੀ ਤੇ ਹਨੀ ਇਕੋ ਕਲਾਸ ’ਚ ਪੜ੍ਹਦੇ ਸਨ। ਹਨੀ ਸਿੰਘ ਸ਼ਾਲਿਨੀ ਨੂੰ ਦੇਖਦੇ ਹੀ ਉਸ ਨੂੰ ਪਸੰਦ ਕਰਨ ਲੱਗੇ ਸਨ ਤੇ ਕਈ ਸਾਲ ਦੋਵਾਂ ਨੇ ਆਪਣੇ ਰਿਸ਼ਤੇ ਨੂੰ ਸਭ ਤੋਂ ਲੁਕੋ ਕੇ ਰੱਖਿਆ।
ਹਨੀ ਸਿੰਘ ਪੜ੍ਹਾਈ ਲਈ ਇੰਗਲੈਂਡ ਚਲੇ ਗਏ। ਇਸ ਦੌਰਾਨ ਵੀ ਦੋਵੇਂ ਰਿਲੇਸ਼ਨਸ਼ਿਪ ’ਚ ਰਹੇ। ਇਸ ਤੋਂ ਬਾਅਦ ਦੋਵਾਂ ਨੇ ਆਪਣੇ ਪਰਿਵਾਰਾਂ ਨੂੰ ਆਪਣੇ ਰਿਸ਼ਤੇ ਬਾਰੇ ਦੱਸਿਆ ਤੇ ਦੋਵੇਂ ਵਿਆਹ ਦੇ ਬੰਧਨ ’ਚ ਬੱਝ ਗਏ।
ਹਨੀ ਸਿੰਘ ਇਕ ਸਮਾਂ ਡਿਪ੍ਰੈਸ਼ਨ ’ਚ ਚਲੇ ਗਏ ਸਨ। ਉਨ੍ਹਾਂ ਨੇ ਇਕ ਇੰਟਰਵਿਊ ਦੌਰਾਨ ਦੱਸਿਆ ਸੀ ਕਿ ਉਹ ਬਾਏਪੋਲਰ ਡਿਸਆਰਡਰ ਦਾ ਸ਼ਿਕਾਰ ਰਹੇ ਸਨ। ਸ਼ਾਹਰੁਖ ਖ਼ਾਨ ਤੇ ਦੀਪਿਕਾ ਪਾਦੁਕੋਣ ਨੇ ਇਸ ਦੌਰਾਨ ਹਨੀ ਦੀ ਬਹੁਤ ਮਦਦ ਕੀਤੀ ਸੀ।
ਹਨੀ ਸਿੰਘ ਨੇ ਦੱਸਿਆ ਕਿ 18 ਮਹੀਨੇ ਮੇਰੀ ਜ਼ਿੰਦਗੀ ਦੇ ਸਭ ਤੋਂ ਖਰਾਬ ਰਹੇ ਸਨ। ਉਨ੍ਹਾਂ ਕਿਹਾ ਕਿ ਮੇਰੇ ਬਾਰੇ ਖ਼ਬਰਾਂ ਆਈਆਂ ਕਿ ਮੈਂ ਰਿਹੈਬ ’ਚ ਹਾਂ ਪਰ ਉਸ ਦੌਰਾਨ ਮੈਂ ਨੋਇਡਾ ’ਚ ਆਪਣੇ ਘਰ ’ਚ ਸੀ।
ਨੋਟ– ਹਨੀ ਸਿੰਘ ਦੇ ਜਨਮਦਿਨ ਮੌਕੇ ਤੁਸੀਂ ਕੀ ਕਹਿਣਾ ਚਾਹੋਗੇ? ਕੁਮੈਂਟ ਕਰਕੇ ਜ਼ਰੂਰ ਦੱਸੋ।
