''ਹੀ-ਮੈਨ'' ਧਰਮਿੰਦਰ ਦੀ ਆਖਰੀ ਇੰਸਟਾਗ੍ਰਾਮ ਪੋਸਟ ਹੋਈ ਵਾਇਰਲ, ਦੇਖ ਫੈਨਜ਼ ਦੀਆਂ ਅੱਖਾਂ ਹੋਈਆਂ ਨਮ

ਮੁੰਬਈ- ਬਾਲੀਵੁੱਡ ਦੇ ਦਿੱਗਜ ਅਦਾਕਾਰ ਧਰਮਿੰਦਰ ਦਾ 89 ਸਾਲ ਦੀ ਉਮਰ ਵਿੱਚ ਦਿਹਾਂਤ ਹੋਣ ਤੋਂ ਬਾਅਦ, ਉਨ੍ਹਾਂ ਦੇ ਪ੍ਰਸ਼ੰਸਕਾਂ ਅਤੇ ਫਿਲਮ ਜਗਤ ਵਿੱਚ ਸੋਗ ਦੀ ਲਹਿਰ ਹੈ। 'ਹੀ-ਮੈਨ' ਵਜੋਂ ਪਿਆਰ ਕੀਤੇ ਜਾਣ ਵਾਲੇ ਧਰਮਿੰਦਰ ਦੀ ਆਖਰੀ ਇੰਸਟਾਗ੍ਰਾਮ ਪੋਸਟ ਸੋਸ਼ਲ ਮੀਡੀਆ 'ਤੇ ਖੂਬ ਵਾਇਰਲ ਹੋ ਰਹੀ ਹੈ, ਜਿਸ ਨੂੰ ਦੇਖ ਕੇ ਪ੍ਰਸ਼ੰਸਕ ਮਾਯੂਸ ਹੋ ਰਹੇ ਹਨ।
ਸੋਮਵਾਰ (24 ਨਵੰਬਰ 2025) ਨੂੰ ਆਖਰੀ ਸਾਹ ਲੈਣ ਵਾਲੇ ਧਰਮਿੰਦਰ ਸੋਸ਼ਲ ਮੀਡੀਆ 'ਤੇ ਵੀ ਕਾਫ਼ੀ ਸਰਗਰਮ ਸਨ। ਉਨ੍ਹਾਂ ਦੇ ਇੰਸਟਾਗ੍ਰਾਮ 'ਤੇ 2.8 ਮਿਲੀਅਨ ਫਾਲੋਅਰਜ਼ ਸਨ ਅਤੇ ਉਨ੍ਹਾਂ ਨੇ ਹੁਣ ਤੱਕ 756 ਪੋਸਟਾਂ ਸਾਂਝੀਆਂ ਕੀਤੀਆਂ ਸਨ। ਫੈਨਜ਼ ਉਨ੍ਹਾਂ ਦੀ ਹਰ ਪੋਸਟ ਨੂੰ ਲਾਈਕ ਅਤੇ ਕਮੈਂਟ ਦੇ ਜ਼ਰੀਏ ਪਸੰਦ ਕਰਦੇ ਸਨ।
ਆਖਰੀ ਪੋਸਟ ਵਿੱਚ ਸੀ ਆਖਰੀ ਫਿਲਮ ਦਾ ਜ਼ਿਕਰ
ਧਰਮਿੰਦਰ ਨੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ 'ਤੇ ਆਖਰੀ ਪੋਸਟ 29 ਅਕਤੂਬਰ 2025 ਨੂੰ ਕੀਤੀ ਸੀ। ਇਹ ਪੋਸਟ ਉਨ੍ਹਾਂ ਦੀ ਆਉਣ ਵਾਲੀ ਆਖਰੀ ਫਿਲਮ “IKKIS (ਇੱਕੀਸ)” ਦਾ ਟ੍ਰੇਲਰ ਸੀ। ਫਿਲਮ 'ਇੱਕੀਸ' 25 ਦਸੰਬਰ 2025 ਨੂੰ ਰਿਲੀਜ਼ ਹੋਣ ਵਾਲੀ ਸੀ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ 2 ਅਕਤੂਬਰ 2025 ਨੂੰ ਵੀ ਇੱਕ ਵੀਡੀਓ ਪੋਸਟ ਕੀਤੀ ਸੀ, ਜਿਸ ਵਿੱਚ ਉਹ ਤਿੰਨ ਪਹੀਆਂ ਵਾਲੇ ਰਿਕਸ਼ਾ (ਥ੍ਰੀ-ਵ੍ਹੀਲਰ) ਵਿੱਚ ਆਪਣੇ ਸਾਥੀਆਂ ਨਾਲ ਨਜ਼ਰ ਆਏ ਸਨ।

'ਜ਼ਿੰਦਾਦਿਲ' ਸ਼ਖਸੀਅਤ ਦੀ ਝਲਕ
ਧਰਮਿੰਦਰ ਅਕਸਰ ਸੋਸ਼ਲ ਮੀਡੀਆ 'ਤੇ ਆਪਣੀ ਖੁਸ਼ਮਿਜ਼ਾਜ ਅਤੇ ਜ਼ਿੰਦਾਦਿਲ ਜੀਵਨਸ਼ੈਲੀ ਦੀ ਝਲਕ ਦਿਖਾਉਂਦੇ ਸਨ। ਉਹ ਆਪਣੇ ਇੰਸਟਾਗ੍ਰਾਮ 'ਤੇ ਆਪਣੇ ਫਾਰਮ ਹਾਊਸ, ਜੀਵਨ ਦੇ ਖੁਸ਼ਹਾਲ ਪਲ, ਸ਼ਾਇਰੀ ਅਤੇ ਗਾਣੇ ਵਰਗੀਆਂ ਕਈ ਯਾਦਾਂ ਸਾਂਝੀਆਂ ਕਰਦੇ ਰਹਿੰਦੇ ਸਨ।
ਦੱਸਣਯੋਗ ਹੈ ਕਿ 'ਹੀ-ਮੈਨ' ਨੂੰ ਅੰਤਿਮ ਵਿਦਾਈ ਦੇਣ ਲਈ ਬਾਲੀਵੁੱਡ ਅਦਾਕਾਰ ਸੰਜੇ ਦੱਤ ਵੀ ਉਨ੍ਹਾਂ ਦੇ ਅੰਤਿਮ ਸੰਸਕਾਰ 'ਤੇ ਪਹੁੰਚੇ ਸਨ।