ਟਰੱਕ ਚਾਲਕਾਂ ਦੇ ਪੱਖ ’ਚ ਬੋਲੇ ਗਡਕਰੀ, ਪਾਇਲਟਾਂ ਵਾਂਗ ਡਰਾਈਵਿੰਗ ਦੇ ਘੰਟੇ ਹੋਣ ਤੈਅ

ਨਵੀਂ ਦਿੱਲੀ, (ਭਾਸ਼ਾ)– ਕੇਂਦਰੀ ਸੜਕ ਟ੍ਰਾਂਸਪੋਰਟ ਅਤੇ ਰਾਜਮਾਰਗ ਮੰਤਰੀ ਨਿਤਿਨ ਗਡਕਰੀ ਨੇ ਟਰੱਕ ਚਾਲਕਾਂ ਅਤੇ ਸੜਕ ਹਾਦਸਿਆ ’ਚ ਕਮੀ ਲਿਆਉਣ ਲਈ ਗੱਡੀ ਚਲਾਉਣ ਦਾ ਸਮਾਂ ਤੈਅ ਕੀਤੇ ਜਾਣ ਦੀ ਵਕਾਲਤ ਕੀਤੀ ਹੈ। ਇਸ ਤੋਂ ਇਲਾਵਾ ਉਨ੍ਹਾਂ ਨੇ ਕਮਰਸ਼ੀਅਲ ਵਾਹਨਾਂ ’ਚ ਚਾਲਕ ਨੂੰ ਨੀਂਦ ਆਉਣ ਦਾ ਪਤਾ ਲਗਾਉਣ ਵਾਲੇ ਸੈਂਸਰ ਲਗਾਉਣ ’ਤੇ ਵੀ ਜ਼ੋਰ ਦਿੱਤਾ।

Have directed officers to work on a policy to include On-Board Sleep Detection Sensors in Commercial Vehicles, at par with European standards. pic.twitter.com/rRyl27g97c

— Nitin Gadkari (@nitin_gadkari) September 21, 2021

ਗਡਕਰੀ ਨੇ ਕਈ ਟਵੀਟ ਕਰ ਕੇ ਕਿਹਾ ਕਿ ਪਾਇਲਟਾਂ ਵਾਂਗ ਟਰੱਕ ਚਾਲਕਾਂ ਲਈ ਵੀ ਡਰਾਈਵਿੰਗ ਦੇ ਘੰਟੇ ਨਿਸ਼ਚਿਤ ਹੋਣੇ ਚਾਹੀਦੇ ਹਨ। ਇਸ ਨਾਲ ਥਕਾਵਟ ਕਾਰਨ ਹੋਣ ਵਾਲੇ ਹਾਦਸਿਆਂ ’ਚ ਕਮੀ ਆਵੇਗੀ। ਉਨ੍ਹਾਂ ਨੇ ਟਵੀਟ ਕਰ ਕੇ ਕਿਹਾ ਕਿ ਮੈਂ ਅਧਿਕਾਰੀਆ ਨਾਲ ਯੂਰਪੀ ਮਾਪਦੰਡਾਂ ਮੁਤਾਬਕ ਕਮਰਸ਼ੀਅਲ ਵਾਹਨਾਂ ’ਚ ਵਾਹਨ ਚਲਾਉਂਦੇ ਸਮੇਂ ਨੀਂਦ ਆਉਣ ਦਾ ਪਤਾ ਲਗਾਉਣ ਵਾਲੇ ਸੈਂਸਰ ਨੂੰ ਲੈ ਕੇ ਨੀਤੀ ’ਤੇ ਕੰਮ ਕਰਨ ਨੂੰ ਕਿਹਾ ਹੈ। 

ਉਨ੍ਹਾਂ ਨੇ ਕਿਹਾ ਕਿ ਉਹ ਜ਼ਿਲਾ ਸੜਕ ਕਮੇਟੀਆ ਦੀ ਨਿਯਮਿਤ ਬੈਠਕ ਸੱਦਣ ਲਈ ਮੁੱਖ ਮੰਤਰੀਆਂ ਅਤੇ ਜ਼ਿਲਾ ਕਲੈਕਟਰਾਂ ਨੂੰ ਚਿੱਠੀ ਲਿਖਣਗੇ। ਇਸ ਤੋਂ ਪਹਿਲਾਂ ਗਡਕਰੀ ਰਾਸ਼ਟਰੀ ਸੜਕ ਸੁਰੱਖਿਆ ਪਰਿਸ਼ਦ (ਐੱਨ. ਆਰ. ਐੱਸ. ਸੀ.) ਵਿਚ ਨਾਮਜ਼ਦ ਨਵੇਂ ਮੈਂਬਰਾਂ ਨਾਲ ਬੈਠਕ ’ਚ ਸ਼ਾਮਲ ਹੋਏ। ਮੰਤਰੀ ਨੇ ਦੱਸਿਆ ਕਿ ਪਰਿਸ਼ਦ ਦੀ ਬੈਠਕ ਹਰ ਦੋ ਮਹੀਨਿਆਂ ’ਚ ਇਕ ਵਾਰ ਆਯੋਜਿਤ ਕਰਨ ਦਾ ਨਿਰਦੇਸ਼ ਦਿੱਤਾ ਹੈ।