ਸ਼ੇਅਰ ਬਾਜ਼ਾਰ ਨੇ ਲਗਾਤਾਰ ਤੀਜੇ ਦਿਨ ਮਾਰੀ ਪਲਟੀ: ਸੈਂਸੈਕਸ 500 ਤੋਂ ਵਧ ਅੰਕ ਚੜ੍ਹਿਆ, IT ਸਟਾਕ ਵਧੇ

ਬਿਜ਼ਨੈੱਸ ਡੈਸਕ : ਘਰੇਲੂ ਸਟਾਕ ਮਾਰਕੀਟ ਲਗਾਤਾਰ ਤੀਜੇ ਦਿਨ ਗਿਰਾਵਟ ਤੋਂ ਬਾਅਦ ਮੁੜ ਤੇਜ਼ੀ ਨਾਲ ਉਭਰਿਆ ਹੈ। ਸ਼ੁਰੂਆਤੀ ਕਾਰੋਬਾਰ ਵਿੱਚ, ਬੀਐਸਈ ਸੈਂਸੈਕਸ 700 ਅੰਕਾਂ ਤੋਂ ਵੱਧ ਡਿੱਗ ਗਿਆ, ਜਦੋਂ ਕਿ ਨੈਸ਼ਨਲ ਸਟਾਕ ਐਕਸਚੇਂਜ ਦਾ ਨਿਫਟੀ 50 ਇੰਡੈਕਸ 22,750 ਤੋਂ ਹੇਠਾਂ ਆ ਗਿਆ। ਹਾਲਾਂਕਿ, ਦੁਪਹਿਰ ਤੋਂ ਬਾਅਦ ਸ਼ੇਅਰ ਬਾਜ਼ਾਰ ਨੇ ਪਲਟੀ ਮਾਰੀ ਅਤੇ ਵਾਧਾ ਦਰਜ ਕੀਤਾ। ਸੈਂਸੈਕਸ 250 ਅੰਕਾਂ ਤੋਂ ਵੱਧ ਵਧਿਆ। ਦੁਪਹਿਰ 1:55 ਵਜੇ, ਸੈਂਸੈਕਸ 263.87 ਅੰਕ ਜਾਂ 0.36% ਵਧ ਕੇ 74,370.72 'ਤੇ ਕਾਰੋਬਾਰ ਕਰਦਾ ਦੇਖਿਆ ਗਿਆ। ਇਸ ਦੇ ਨਾਲ ਹੀ ਨਿਫਟੀ 60.75 ਅੰਕ ਜਾਂ 0.26% ਵਧ ਕੇ 23,029 'ਤੇ ਪਹੁੰਚ ਗਿਆ। 

ਮੌਜੂਦਾ ਸਮੇਂ ਸੈਂਸੈਕਸ 509.73 ਅੰਕ ਭਾਵ 0.69% ਦੇ ਵਾਧੇ ਨਾਲ 74,616.58 ਦੇ ਪੱਧਰ 'ਤੇ ਬੰਦ ਹੋਇਆ ਹੈ। ਸੈਂਸੈਕਸ ਦੇ 19 ਸਟਾਕ ਵਾਧੇ ਨਾਲ ਅਤੇ 11 ਸਟਾਕ ਗਿਰਾਵਟ ਨਾਲ ਕਾਰੋਬਾਰ ਕਰਦੇ ਦੇਖੇ ਗਏ।

ਦੂਜੇ ਪਾਸੇ ਨਿਫਟੀ ਵੀ 155.40 ਅੰਕ ਭਾਵ 0.68% ਦੇ ਵਾਧੇ ਨਾਲ 23,123.65 ਦੇ ਪੱਧਰ ਤੇ ਬੰਦ ਹੋਇਆ ਹੈ। 

ਇਸ ਤੋਂ ਪਹਿਲਾਂ, ਸੈਂਸੈਕਸ ਦੇ ਸਾਰੇ 30 ਸਟਾਕ ਡਿੱਗ ਗਏ। ਜ਼ੋਮੈਟੋ ਦੀ ਮੂਲ ਕੰਪਨੀ, ਈਟਰਨਲ, ਦੇ ਸ਼ੇਅਰ 2.11% ਡਿੱਗੇ, ਜਦੋਂ ਕਿ ਇੰਡੀਗੋ ਦੇ ਸ਼ੇਅਰ 1.91% ਡਿੱਗੇ। ਮਹਿੰਦਰਾ ਐਂਡ ਮਹਿੰਦਰਾ, ਲਾਰਸਨ ਐਂਡ ਟੂਬਰੋ, ਏਸ਼ੀਅਨ ਪੇਂਟਸ, ਬਜਾਜ ਫਿਨਸਰਵ, ਐਕਸਿਸ ਬੈਂਕ, ਮਾਰੂਤੀ ਅਤੇ ਐਸਬੀਆਈ ਵਿੱਚ ਵੀ ਗਿਰਾਵਟ ਆਈ। ਵਿਆਪਕ ਬਾਜ਼ਾਰਾਂ ਵਿੱਚ, ਨਿਫਟੀ ਮਿਡਕੈਪ 1.47% ਡਿੱਗਿਆ, ਅਤੇ ਨਿਫਟੀ ਸਮਾਲਕੈਪ 0.88% ਡਿੱਗਿਆ। ਸੈਕਟਰਲ ਤੌਰ 'ਤੇ, ਨਿਫਟੀ ਆਟੋ 2% ਡਿੱਗਿਆ। ਨਿਫਟੀ ਬੈਂਕ ਅਤੇ ਨਿਫਟੀ ਪੀਐਸਯੂ ਵਿੱਚ ਵੀ ਗਿਰਾਵਟ ਆਈ। ਇਸ ਦੌਰਾਨ, ਨਿਫਟੀ ਮੈਟਲ ਅਤੇ ਨਿਫਟੀ ਮੀਡੀਆ ਵਿੱਚ ਵਾਧਾ ਹੋਇਆ।

ਬੀਤੇ ਦਿਨ ਬਾਜ਼ਾਰ ਨੇ ਕੀਤੀ ਜ਼ਬਰਦਸਤ ਵਾਪਸੀ

ਏਸ਼ੀਆਈ ਬਾਜ਼ਾਰਾਂ ਤੋਂ ਪਾਜ਼ੇਟਿਵ ਰੁਖ ਦਰਮਿਆਨ ਭਾਰਤੀ ਸ਼ੇਅਰ ਬਾਜ਼ਾਰ ਹਫ਼ਤੇ ਦੇ ਪਹਿਲੇ ਟ੍ਰੇਡਿੰਗ ਸੈਸ਼ਨ ਭਾਵ ਸੋਮਵਾਰ ਨੂੰ ਸਪਾਟ ਖੁੱਲ੍ਹਣ ਤੋਂ ਬਾਅਦ ਜ਼ਬਰਦਸਤ ਵਾਧੇ ਨਾਲ ਬੰਦ ਹੋਏ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਐਤਵਾਰ ਨੂੰ ਧਮਕੀ ਦਰਮਿਆਨ ਨਿਵੇਸ਼ਕ ਸ਼ੁਰੂਆਤੀ ਕਾਰੋਬਾਰ ’ਚ ਚੌਕਸ ਨਜ਼ਰ ਆਏ। ਹਾਲਾਂਕਿ, ਭੂ-ਸਿਆਸੀ ਤਣਾਅ ਘੱਟ ਹੋਣ ਦੀ ਉਮੀਦ ਨਾਲ ਬਾਜ਼ਾਰ ਦਾ ਮਾਹੌਲ ਬਿਹਤਰ ਹੋਇਆ। ਤਿਮਾਹੀ ਨਤੀਜਿਆਂ ਤੋਂ ਪਹਿਲਾਂ ਵਿੱਤੀ ਸੇਵਾਵਾਂ ਅਤੇ ਬੈਂਕਿੰਗ ਸ਼ੇਅਰਾਂ ’ਚ ਤੇਜ਼ ਖਰੀਦਦਾਰੀ ਨਾਲ ਬਾਜ਼ਾਰ ’ਚ ਜ਼ਬਰਦਸਤ ਰਿਕਵਰੀ ਦੇਖਣ ਨੂੰ ਮਿਲੀ।

30 ਸ਼ੇਅਰਾਂ ਵਾਲਾ ਬੰਬੇ ਸਟਾਕ ਐਕਸਚੇਂਜ (ਬੀ. ਐੱਸ. ਈ.) ਸੈਂਸੈਕਸ ਮਾਮੂਲੀ ਗਿਰਾਵਟ ਨਾਲ 73,477 ਅੰਕ ’ਤੇ ਖੁੱਲ੍ਹਿਆ। ਸ਼ੁਰੂਆਤੀ ਮਿੰਟਾਂ ’ਚ ਕੋਈ ਪਾਜ਼ੇਟਿਵ ਟ੍ਰਿਗਰ ਨਾ ਮਿਲਣ ਤੋਂ ਬਾਅਦ ਇੰਡੈਕਸ ’ਚ ਗਿਰਾਵਟ ਵਧ ਗਈ। ਕਾਰੋਬਾਰ ਦੌਰਾਨ ਇਹ 72,728 ਅੰਕ ਤੱਕ ਡਿੱਗ ਗਿਆ ਸੀ। ਅੰਤ ’ਚ ਵਾਪਸੀ ਕਰਦੇ ਹੋਏ ਇਹ 787.30 ਅੰਕ ਜਾਂ 1.07 ਫੀਸਦੀ ਵਧ ਕੇ 74,106.85 ’ਤੇ ਬੰਦ ਹੋਇਆ, ਜੋ ਇਸ ਦੇ ਹੇਠਲੇ ਪੱਧਰ ਤੋਂ 1400 ਅੰਕ ਵੱਧ ਹੈ।

ਇਸੇ ਤਰ੍ਹਾਂ, ਨੈਸ਼ਨਲ ਸਟਾਕ ਐਕਸਚੇਂਜ (ਐੱਨ. ਐੱਸ. ਈ.) ਦਾ ਨਿਫਟੀ-50 ਵੀ ਸਪਾਟ ਰੁਖ ਨਾਲ 22,780 ’ਤੇ ਖੁੱਲ੍ਹਿਆ। ਕਾਰੋਬਾਰ ਦੌਰਾਨ ਇਹ 22,542 ਅੰਕ ਦੇ ਹੇਠਲੇ ਅਤੇ 22,998 ਅੰਕ ਦੇ ਉੱਪਰਲੇ ਪੱਧਰ ਤੱਕ ਗਿਆ। ਅੰਤ ’ਚ 255.15 ਅੰਕ ਜਾਂ 1.12 ਫੀਸਦੀ ਦੇ ਵਾਧੇ ਨਾਲ 22,968.25 ’ਤੇ ਬੰਦ ਹੋਇਆ।

ਰੁਪਇਆ 14 ਪੈਸੇ ਚੜ੍ਹ ਕੇ 93.04 ਪ੍ਰਤੀ ਡਾਲਰ ’ਤੇ ਕਾਰੋਬਾਰ ਕਰਦਾ ਦੇਖਿਆ ਗਿਆ।