ਸਰਕਾਰ ਖਾਣਾ ਪਕਾਉਣ ਲਈ ਗੈਸ ਨਾਲੋਂ ਸਸਤਾ ਵਿਕਲਪ ਦੇਵੇਗੀ, ਜਾਣੋ ਕੀ ਹੈ ਯੋਜਨਾ?

ਨਵੀਂ ਦਿੱਲੀ — ਬਿਜਲੀ ਮੰਤਰੀ ਆਰ.ਕੇ. ਸਿੰਘ ਨੇ ਕਿਹਾ ਕਿ ਸਰਕਾਰ ਗਰੀਬਾਂ ਦੀ ਸਹਾਇਤਾ ਲਈ ਖਾਣਾ ਪਕਾਉਣ 'ਚ ਵਿਆਪਕ ਪੈਮਾਨੇ 'ਤੇ ਬਿਜਲੀ ਦੀ ਵਰਤੋਂ ਨੂੰ ਉਤਸ਼ਾਹਤ ਕਰਨ 'ਤੇ ਵਿਚਾਰ ਕਰ ਰਹੀ ਹੈ। ਬਿਜਲੀ ਮੰਤਰਾਲੇ ਦੇ ਬਿਆਨ ਅਨੁਸਾਰ ਮੰਤਰੀ ਨੇ ਕਿਹਾ ਕਿ ਸਮਾਜ ਦੇ ਗਰੀਬ ਵਰਗ ਨੂੰ ਉਨ੍ਹਾਂ ਦੀਆਂ ਰੋਜ਼ਾਨਾ ਜ਼ਰੂਰਤਾਂ ਪੂਰੀਆਂ ਕਰਨ ਲਈ ਸਸਤੇ ਵਿਕਲਪ ਵਜੋਂ ਬਿਜਲੀ ਮੁਹੱਈਆ ਕਰਵਾਈ ਜਾਵੇਗੀ। ਇਹ ਦੇਸ਼ ਨੂੰ ਨਾ ਸਿਰਫ ਸਵੈ-ਨਿਰਭਰਤਾ ਵੱਲ ਲੈ ਜਾਵੇਗਾ, ਬਲਕਿ ਪੈਟਰੋਲੀਅਮ ਪਦਾਰਥਾਂ 'ਤੇ ਨਿਰਭਰਤਾ ਘਟਾਉਣ ਵਿਚ ਵੀ ਸਹਾਇਤਾ ਕਰੇਗਾ। ਮੰਤਰੀ ਨੇ ਇਹ ਗੱਲਾਂ ਐਨਟੀਪੀਸੀ ਦੇ ਨਬੀਨਗਰ, ਬਾਰਹ ਅਤੇ ਬਰੌਨੀ ਵਿਖੇ ਕ੍ਰਮਵਾਰ ਸਰਵਿਸ ਬਿਲਡਿੰਗ, ਸ਼ਾਪਿੰਗ ਕੰਪਲੈਕਸ ਅਤੇ ਮੁੱਖ ਪਲਾਂਟ ਕੰਟੀਨ ਦਾ ਉਦਘਾਟਨ ਕਰਦਿਆਂ ਕਹੀਆਂ। ਇਹ ਕੇਂਦਰ ਬਿਹਾਰ ਦੇ ਲੋਕਾਂ ਅਤੇ ਐਨਟੀਪੀਸੀ ਕਰਮਚਾਰੀਆਂ ਦੀ ਸਹੂਲਤ ਲਈ ਬਣੇ ਹਨ।

ਸਿੰਘ ਨੇ ਕਿਹਾ, 'ਬਿਜਲੀ ਭਾਰਤ ਦਾ ਭਵਿੱਖ ਹੈ ਅਤੇ ਆਉਣ ਵਾਲੇ ਸਮੇਂ ਵਿਚ ਦੇਸ਼ ਦੀਆਂ ਬਹੁਤੀਆਂ ਮੁੱਢਲੀਆਂ ਸਹੂਲਤਾਂ ਬਿਜਲੀ ਊਰਜਾ ਉੱਤੇ ਨਿਰਭਰ ਹੋਣਗੀਆਂ। ਉਨ੍ਹਾਂ ਕਿਹਾ ਕਿ ਸਰਕਾਰ ਨੇ ਮੰਤਰਾਲੇ ਦੇ ਪੱਧਰ 'ਤੇ ਇਕ ਪਾਵਰ ਫਾਊਂਡੇਸ਼ਨ ਦੇ ਗਠਨ ਦਾ ਪ੍ਰਸਤਾਵ ਦਿੱਤਾ ਹੈ। ਇਸ ਦੇ ਟੀਚਿਆਂ ਵਿਚ ਖਾਣਾ ਪਕਾਉਣ ਵਿਚ ਸਿਰਫ ਬਿਜਲੀ ਦੀ ਵਰਤੋਂ ਸ਼ਾਮਲ ਹੈ। ਇਹ ਸਾਡੀ ਆਰਥਿਕਤਾ ਨੂੰ ਨਾ ਸਿਰਫ ਆਤਮ ਨਿਰਭਰ ਬਣਾ ਦੇਵੇਗਾ ਸਗੋਂ ਦਰਾਮਦਾਂ 'ਤੇ ਨਿਰਭਰਤਾ ਘਟਾਉਣ ਵਿਚ ਵੀ ਸਹਾਇਤਾ ਕਰੇਗਾ। ਸਿੰਘ ਨੇ ਕਿਹਾ ਕਿ ਸਾਡੀ ਸਰਕਾਰ ਗਰੀਬਾਂ ਦੀ ਭਲਾਈ ਲਈ ਕੰਮ ਕਰ ਰਹੀ ਹੈ ਅਤੇ ਇਹ ਕਦਮ ਸਮਾਜ ਦੇ ਗਰੀਬ ਵਰਗ ਨੂੰ ਭੋਜਨ ਪਕਾਉਣ ਲਈ ਸਸਤੇ ਵਿਕਲਪ ਮੁਹੱਈਆ ਕਰਵਾਏਗਾ।

ਇਹ ਵੀ ਦੇਖੋ: ਸੋਨੇ ਦੀਆਂ ਕੀਮਤਾਂ 'ਚ ਅੱਜ ਆਈ ਤੇਜ਼ੀ, ਚਾਂਦੀ ਵੀ ਹੋਈ ਮਹਿੰਗੀ

ਉਨ੍ਹਾਂ ਕਿਹਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਪ੍ਰਧਾਨ ਮੰਤਰੀ ਆਵਾਸ ਯੋਜਨਾ ਅਤੇ ਹਰ ਘਰ ਬਿਜਲੀ ਵਰਗੀਆਂ ਯੋਜਨਾਵਾਂ 'ਤੇ ਕੰਮ ਕਰਨਾ ਜਾਰੀ ਰੱਖਿਆ ਹੈ। ਉਨ੍ਹਾਂ ਕਿਹਾ ਜਨਤਕ ਖੇਤਰ ਦੇ ਕਾਰਜਾਂ ਦੇ ਕੰਮਕਾਜ ਉੱਤੇ ਹਮੇਸ਼ਾਂ ਹੀ ਪ੍ਰਸ਼ਨ ਹੁੰਦੇ ਰਹੇ ਹਨ, ਪਰ ਜੇ ਅਸੀਂ ਐਨ.ਟੀ.ਪੀ.ਸੀ. ਅਤੇ ਜਨਤਕ ਖੇਤਰ ਦੇ ਹੋਰ ਕਾਰਜਾਂ ਦੀ ਕਾਰਗੁਜ਼ਾਰੀ ਨੂੰ ਵੇਖੀਏ ਤਾਂ ਇਹ ਸਪੱਸ਼ਟ ਹੈ ਕਿ ਇਸ ਦੀਆਂ ਕੋਸ਼ਿਸ਼ਾਂ ਦੂਜੀ ਨਿੱਜੀ ਕੰਪਨੀਆਂ ਨਾਲੋਂ ਵਧੀਆ ਰਹੀਆਂ ਹਨ ਅਤੇ ਤਰੱਕੀ ਦੇ ਨਾਲ ਮੁਨਾਫਾ ਕਮਾ ਰਹੀਆਂ ਹਨ।

ਇਹ ਵੀ ਦੇਖੋ: 5 ਸਾਲ 'ਚ ਮਾਲਿਆ ਅਤੇ ਨੀਰਵ ਮੋਦੀ ਸਮੇਤ 38 ਲੋਕ ਦੇਸ਼ ਛੱਡ ਕੇ ਭੱਜੇ- ਮੋਦੀ ਸਰਕਾਰ

ਇਸ ਮੌਕੇ ਐਨਟੀਪੀਸੀ ਦੇ ਚੇਅਰਮੈਨ ਅਤੇ ਪ੍ਰਬੰਧ ਨਿਰਦੇਸ਼ਕ ਗੁਰਦੀਪ ਸਿੰਘ ਨੇ ਕਿਹਾ, ਐਨਟੀਪੀਸੀ ਖਾਣਾ ਪਕਾਉਣ ਵਿਚ ਬਿਜਲੀ ਦੀ ਵਰਤੋਂ ਨੂੰ ਉਤਸ਼ਾਹਤ ਕਰਨ ਲਈ ਹਰ ਸੰਭਵ ਕਦਮ ਚੁੱਕ ਰਹੀ ਹੈ। ਸਾਨੂੰ ਪੂਰਾ ਵਿਸ਼ਵਾਸ ਹੈ ਕਿ ਅਸੀਂ ਦੇਸ਼ ਭਰ ਵਿਚ ਇਸ ਮਾਡਲ ਨੂੰ ਲਾਗੂ ਕਰ ਸਕਾਂਗੇ। ਉਨ੍ਹਾਂ ਕਿਹਾ ਕਿ ਬਿਹਾਰ ਵਿਚ ਏਐਨਪੀਸੀ ਦਾ 3,800 ਮੈਗਾਵਾਟ ਸਮਰੱਥਾ ਵਾਲਾ ਪ੍ਰਾਜੈਕਟ ਨਿਰਮਾਣ ਅਧੀਨ ਹੈ ਅਤੇ ਕੰਪਨੀ ਸੂਬੇ ਦੀ ਤਰੱਕੀ ਵਿਚ ਯੋਗਦਾਨ ਪਾਉਂਦੀ ਰਹੇਗੀ। ਐਨ.ਟੀ.ਪੀ.ਸੀ. ਸਮੂਹ ਦੀ ਕੁਲ ਸਥਾਪਿਤ ਸਮਰੱਥਾ 62,900 ਮੈਗਾਵਾਟ ਹੈ। ਇਸ ਦੇ 70 ਪਾਵਰ ਸਟੇਸ਼ਨ ਹਨ।

ਇਹ ਵੀ ਦੇਖੋ: Tiktok ਲਈ ਮਾਈਕਰੋਸਾਫਟ ਦੇ ਬਾਅਦ Oracle ਦਾ ਆਫਰ ਵੀ ਬਾਈਟਡਾਂਸ ਨੇ ਕੀਤਾ ਰੱਦ : CGTN