ਹੋਟਲਾਂ ਦੀ ਬੁਕਿੰਗ ਹੋਈ ਫੁੱਲ, ਓਮੀਕ੍ਰੋਨ ਦੇ ਸਾਏ ਹੇਠ 30 ਤੋਂ 40 ਫ਼ੀਸਦੀ ਵਧੇ ਕਿਰਾਏ

ਨਵੀਂ ਦਿੱਲੀ - ਜੇਕਰ ਤੁਸੀਂ ਉਦੈਪੁਰ, ਜਿਮ ਕਾਰਬੇਟ ਜਾਂ ਗੋਆ ਦੇ ਕਿਸੇ ਹੋਰ ਆਲੀਸ਼ਾਨ ਰਿਜ਼ੋਰਟ ਵਿੱਚ ਕ੍ਰਿਸਮਸ ਮਨਾਉਣ ਦੀ ਯੋਜਨਾ ਬਣਾ ਰਹੇ ਹੋ, ਤਾਂ ਤੁਸੀਂ ਸ਼ਾਇਦ ਦੇਰ ਕਰ ਦਿੱਤੀ ਹੈ। ਇਨ੍ਹਾਂ ਵਿੱਚੋਂ ਜ਼ਿਆਦਾਤਰ ਰਿਜ਼ੋਰਟ ਪਹਿਲਾਂ ਹੀ ਬੁੱਕ ਹੋ ਗਏ ਹਨ। ਆਪਣੀਆਂ ਛੁੱਟੀਆਂ ਨੂੰ ਨਵੇਂ ਸਾਲ ਦੇ ਨੇੜੇ ਲਿਆਉਣ ਦੀ ਕੋਸ਼ਿਸ਼ ਕਰੋ ਤਾਂ ਹੋ ਸਕਦੈ ਤੁਹਾਡੀ ਕਿਸਮਤ ਤੁਹਾਡਾ ਸਾਥ ਦੇ ਦੇਵੇ। ਇਹ ਸੰਭਵ ਹੈ ਕਿ ਤੁਹਾਨੂੰ ਨਵੇਂ ਸਾਲ ਦੇ ਆਸਪਾਸ ਆਪਣੀ ਮਨਪਸੰਦ ਜਗ੍ਹਾ ਮਿਲ ਜਾਵੇਗੀ, ਪਰ ਇਸਦੇ ਲਈ ਤੁਹਾਨੂੰ 30 ਤੋਂ 40 ਪ੍ਰਤੀਸ਼ਤ ਜ਼ਿਆਦਾ ਭੁਗਤਾਨ ਕਰਨਾ ਪੈ ਸਕਦਾ ਹੈ।

ਸੁਵਿਧਾਵਾਂ ਦੇ ਆਧਾਰ 'ਤੇ, 30 ਦਸੰਬਰ ਤੋਂ 1 ਜਨਵਰੀ ਤੱਕ ਉਦੈਪੁਰ ਦੇ ਰੈਫਲਜ਼ ਵਿਖੇ ਦੋ ਬਾਲਗਾਂ ਲਈ ਦੋ ਰਾਤ ਦੇ ਠਹਿਰਨ ਦਾ ਖਰਚਾ 2,24,200 ਰੁਪਏ ਤੋਂ 2,95,000 ਰੁਪਏ ਤੱਕ ਹੋ ਸਕਦਾ ਹੈ। ਇਸ ਵਿੱਚ ਨਾਸ਼ਤਾ ਅਤੇ ਸਾਰੇ ਟੈਕਸ ਸ਼ਾਮਲ ਹੋਣਗੇ। ਉਸੇ ਹੀ ਤਾਰੀਖਾਂ 'ਤੇ, ਉੱਤਰਾਖੰਡ ਦੇ ਰਾਮਨਗਰ ਵਿੱਚ ਤਾਜ ਕਾਰਬੇਟ ਰਿਜ਼ੋਰਟ ਅਤੇ ਸਪਾ ਵਿੱਚ ਦੋ ਰਾਤ ਦੇ ਠਹਿਰਨ ਦੀ ਕੀਮਤ 1,00,300 ਰੁਪਏ ਹੋ ਸਕਦੀ ਹੈ (ਟੈਕਸ ਅਤੇ ਭੋਜਨ ਸ਼ਾਮਲ ਹਨ)। ਪਰ ਜੇਕਰ ਤੁਸੀਂ 15 ਤੋਂ 17 ਦਸੰਬਰ ਦਰਮਿਆਨ ਦੋ ਰਾਤਾਂ ਇਸ ਥਾਂ 'ਤੇ ਰੁਕਦੇ ਹੋ ਤਾਂ ਤੁਹਾਨੂੰ ਟੈਕਸ ਅਤੇ ਨਾਸ਼ਤੇ ਸਮੇਤ ਸਿਰਫ਼ 37,945 ਰੁਪਏ ਦੇਣੇ ਪੈਣਗੇ। ਇਸ ਦਾ ਮਤਲਬ ਹੈ ਕਿ ਨਵੇਂ ਸਾਲ ਦੇ ਆਸਪਾਸ ਦੀਆਂ ਤਰੀਕਾਂ 'ਤੇ, ਕਿਰਾਏ ਬਹੁਤ ਵੱਧ ਗਏ ਹਨ ਕਿਉਂਕਿ ਮੰਗ ਬਹੁਤ ਜ਼ਿਆਦਾ ਹੋ ਗਈ ਹੈ।

ਇਹ ਵੀ ਪੜ੍ਹੋ : ਅਗਲੇ ਹਫਤੇ ਆਉਣ ਵਾਲੇ ਹਨ ਇਹ 5 IPO, ਜਾਣੋ ਸ਼ੇਅਰ ਦੀ ਕੀਮਤ ਤੋਂ ਲੈ ਕੇ ਗ੍ਰੇ ਮਾਰਕੀਟ ਪ੍ਰੀਮੀਅਮ ਤੱਕ ਸਭ ਕੁਝ

ਅਜੇ ਵੀ ਪਸਰੇ ਹਨ ਅਨਿਸ਼ਿਤਤਾ ਦੇ ਬੱਦਲ 

ਅਜਿਹੀ ਸਥਿਤੀ 'ਚ ਪ੍ਰਾਹੁਣਚਾਰੀ ਖੇਤਰ ਦੀਆਂ ਕੰਪਨੀਆਂ ਨੂੰ ਖ਼ੁਸ਼ ਹੋਣਾ ਚਾਹੀਦਾ ਹੈ। ਪਰ ਅਜਿਹਾ ਇਸ ਲਈ ਨਹੀਂ ਹੈ ਕਿਉਂਕਿ ਓਮਿਕਰੋਨ ਦਾ ਖ਼ਤਰਾ ਲਗਾਤਾਰ ਮੰਡਰਾ ਰਿਹਾ ਹੈ। ਹੋਟਲਾਂ ਨੂੰ ਚਿੰਤਾ ਹੈ ਕਿ ਸਥਾਨਕ ਪ੍ਰਸ਼ਾਸਨ ਮਹਾਂਮਾਰੀ ਦੇ ਡਰੋਂ ਪਾਬੰਦੀਆਂ ਅਤੇ ਮਨਾਹੀ ਵਾਲੀਆਂ ਸ਼ਰਤਾਂ ਜਾਰੀ ਕਰ ਸਕਦਾ ਹੈ। ਸੈਲਾਨੀਆਂ ਨੂੰ ਇਹ ਵੀ ਡਰ ਹੈ ਕਿ ਓਮਿਕਰੋਨ ਆਖਰੀ ਸਮੇਂ 'ਤੇ ਉਨ੍ਹਾਂ ਦੀ ਯਾਤਰਾ ਨੂੰ ਬਰਬਾਦ ਕਰ ਸਕਦਾ ਹੈ।

ਹੋਟਲ ਐਸੋਸੀਏਸ਼ਨ ਆਫ ਇੰਡੀਆ ਦੇ ਵਾਈਸ ਪ੍ਰੈਜ਼ੀਡੈਂਟ ਕੇਬੀ ਕਚਰੂ ਨੇ ਕਿਹਾ, “ਹੋਟਲ ਉਦਯੋਗ ਵਿੱਚ ਸਾਡੇ ਸਾਰਿਆਂ ਨੂੰ ਉਮੀਦ ਹੈ ਪਰ ਅਸੀਂ ਸਾਵਧਾਨੀ ਵੀ ਵਰਤ ਰਹੇ ਹਾਂ। ਅਸੀਂ ਕੋਵਿਡ ਦੇ ਨਿਯਮਾਂ ਦੀ 100% ਪਾਲਣਾ ਕਰ ਰਹੇ ਹਾਂ। ਯਾਤਰਾ ਦੀਆਂ ਥਾਵਾਂ 'ਤੇ ਕਾਰੋਬਾਰ ਚੰਗਾ ਹੈ ਜਿੱਥੇ ਕਾਰ ਦੁਆਰਾ ਪਹੁੰਚਿਆ ਜਾ ਸਕਦਾ ਹੈ ਅਤੇ ਜੋ ਦੇਸ਼ ਦੇ ਅੰਦਰ ਹਨ। ਉਨ੍ਹਾਂ ਨੇ ਕਿਹਾ ਕਿ ਵਾਤਾਵਰਣ ਅਨਿਸ਼ਚਿਤ ਹੈ, ਇਸ ਲਈ ਕ੍ਰਿਸਮਿਸ ਅਤੇ ਨਵੇਂ ਸਾਲ ਲਈ ਬੁਕਿੰਗ ਦੇ ਰੁਝਾਨਾਂ 'ਤੇ ਟਿੱਪਣੀ ਕਰਨਾ ਜਲਦਬਾਜ਼ੀ ਹੋਵੇਗੀ।

ਵਿੰਡਹੈਮ ਹੋਟਲਜ਼ ਐਂਡ ਰਿਜ਼ੌਰਟਸ ਦੇ ਖੇਤਰੀ ਨਿਰਦੇਸ਼ਕ (ਯੂਰੇਸ਼ੀਆ) ਨਿਖਿਲ ਸ਼ਰਮਾ, ਨੇ ਕਿਹਾ, “ਫਿਲਹਾਲ ਇਹ ਕਹਿਣਾ ਮੁਸ਼ਕਲ ਹੈ ਕਿ ਕੋਵਿਡ ਦਾ ਇਹ ਨਵਾਂ ਰੂਪ ਉਦਯੋਗ ਨੂੰ ਕਿਵੇਂ ਪ੍ਰਭਾਵਤ ਕਰੇਗਾ। ਪਰ ਬੁਕਿੰਗ ਰੱਦ ਹੋਣ ਦੇ ਮਾਮਲੇ ਫਿਲਹਾਲ ਸਾਹਮਣੇ ਨਹੀਂ ਆ ਰਹੇ ਹਨ।

ਯਾਤਰਾ ਦੇ ਸ਼ੌਕੀਨ ਭਾਰਤੀ ਮਹਾਂਮਾਰੀ ਕਾਰਨ ਘੁਟਣ ਮਹਿਸੂਸ ਕਰ ਰਹੇ ਹਨ, ਇਸ ਲਈ ਉਹ ਕੁਦਰਤ ਦਾ ਆਨੰਦ ਲੈਣ ਲਈ ਬਾਹਰ ਨਿਕਲ ਰਹੇ ਹਨ। ਨਤੀਜੇ ਵਜੋਂ, ਪਰਾਹੁਣਚਾਰੀ ਅਤੇ ਯਾਤਰਾ ਕਾਰੋਬਾਰਾਂ ਨੂੰ ਉਨ੍ਹਾਂ ਦੀ ਉਮੀਦ ਨਾਲੋਂ ਵੱਧ ਮੰਗ ਦਿਖਾਈ ਦੇ ਰਹੀ ਹੈ। ਆਨਲਾਈਨ ਟ੍ਰੈਵਲ ਐਗਰੀਗੇਟਰ (OTA) EaseMyTrip ਦੇ ਸਹਿ-ਸੰਸਥਾਪਕ ਅਤੇ ਕਾਰਜਕਾਰੀ ਨਿਰਦੇਸ਼ਕ ਪ੍ਰਸ਼ਾਂਤ ਪਿੱਟੀ ਨੇ ਇਸ ਸਾਲ ਅਗਸਤ ਵਿੱਚ ਕਿਹਾ, ਮੌਜੂਦਾ ਮਹੀਨੇ ਯਾਨੀ ਦਸੰਬਰ ਲਈ ਅਡਵਾਂਸ ਬੁਕਿੰਗ ਪਿਛਲੇ ਸਾਲ ਦੇ ਮੁਕਾਬਲੇ ਚਾਰ ਗੁਣਾ ਵਧੀ ਸੀ।

ਇਹ ਵੀ ਪੜ੍ਹੋ : ਅਮਰੀਕਾ ਦੀ ਚੀਨ ਖ਼ਿਲਾਫ਼ ਵੱਡੀ ਕਾਰਵਾਈ, ਸਦਨ 'ਚ ਪਾਸ ਕੀਤਾ ਇਹ ਬਿੱਲ

ਨੋਟ - ਇਸ ਖ਼ਬਰ ਬਾਰੇ ਆਪਣੇ ਵਿਚਾਰ ਕੁਮੈਂਟ ਬਾਕਸ ਵਿਚ ਜ਼ਰੂਰ ਸਾਂਝੇ ਕਰੋ।