ਫੇਸਬੁੱਕ ਦੇ ਬੌਸ ਨੂੰ ਵੱਡਾ ਝਟਕਾ, ਇਕ ਦਿਨ ''ਚ ਡੁੱਬੇ 6 ਅਰਬ ਡਾਲਰ

ਵਾਸ਼ਿੰਗਟਨ— ਡਾਟਾ ਲੀਕ ਮਾਮਲੇ 'ਚ ਫੇਸਬੁੱਕ ਦੇ ਬੌਸ ਮਾਰਕ ਜੁਕਰਬਰਗ ਨੂੰ ਤਗੜਾ ਝਟਕਾ ਲੱਗਾ ਹੈ। ਫੇਸਬੁੱਕ ਨਾਲ ਜੁੜਿਆ ਇਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ ਜਿਸ ਨਾਲ ਇਕ ਦਿਨ 'ਚ ਜੁਕਰਬਰਗ ਦੇ ਤਕਰਬੀਨ 395 ਅਰਬ ਰੁਪਏ ਸਵਾਹਾ ਹੋ ਗਏ। ਰਿਪੋਰਟਾਂ ਅਨੁਸਾਰ 2016 'ਚ ਅਮਰੀਕੀ ਰਾਸ਼ਟਰਪਤੀ ਚੋਣਾਂ 'ਚ ਡੋਨਲਡ ਟਰੰਪ ਦੀ ਮਦਦ ਕਰਨ ਵਾਲੀ ਇਕ ਰਾਜਨੀਤਕ ਡਾਟਾ ਵਿਸ਼ਲੇਸ਼ਣ ਫਰਮ 'ਕੈਮਬ੍ਰਿਜ ਐਨਾਲਿਟਿਕਾ' ਨੇ 5 ਕਰੋੜ ਤੋਂ ਵਧ ਫੇਸਬੁੱਕ ਯੂਜ਼ਰਾਂ ਦੀ ਨਿੱਜੀ ਜਾਣਕਾਰੀ ਚੋਰੀ ਕਰਕੇ ਇਸ ਦਾ ਇਸਤੇਮਾਲ ਚੋਣਾਂ ਦੌਰਾਨ ਕੀਤਾ। ਇਸ ਖਬਰ ਦੇ ਬਾਅਦ ਅਮਰੀਕੀ ਅਤੇ ਯੂਰਪੀ ਅਧਿਕਾਰੀਆਂ ਨੇ ਫੇਸਬੁੱਕ ਤੋਂ ਜਵਾਬ-ਤਲਬ ਕੀਤਾ ਹੈ ਕਿਉਂਕਿ ਚੋਣਾਂ ਦੌਰਾਨ ਇਹ ਫਰਮ ਡੋਨਲਡ ਟਰੰਪ ਲਈ ਫੇਸਬੁੱਕ ਵਿਗਿਆਪਨਾਂ 'ਤੇ ਕੰਮ ਕਰ ਰਹੀ ਸੀ। ਹੁਣ ਅਮਰੀਕਾ ਅਤੇ ਯੂਰਪ ਦੇ ਸੰਸਦ ਮੈਂਬਰਾਂ ਨੇ ਜੁਕਰਬਰਗ ਨੂੰ ਉਨ੍ਹਾਂ ਸਾਹਮਣੇ ਪੇਸ਼ ਹੋਣ ਲਈ ਕਿਹਾ ਹੈ, ਤਾਂ ਕਿ ਉਹ ਜਾਣ ਸਕਣ ਕਿ ਕੈਮਬ੍ਰਿਜ ਐਨਾਲਿਟਿਕਾ ਨੇ ਫੇਸਬੁੱਕ ਯੂਜ਼ਰਾਂ ਦੀ ਨਿੱਜੀ ਜਾਣਕਾਰੀ ਕਿਵੇਂ ਇਕੱਠੀ ਕੀਤੀ ਅਤੇ ਇਸ ਦਾ ਇਸਤੇਮਾਲ ਕਿਵੇਂ ਹੋਇਆ।

ਮੀਡੀਆ 'ਚ ਇਨ੍ਹਾਂ ਖਬਰਾਂ ਦਾ ਵੱਡਾ ਅਸਰ ਕੰਪਨੀ ਦੇ ਸਟਾਕ 'ਤੇ ਦਿਸਿਆ। ਸੋਮਵਾਰ ਨੂੰ ਸੋਸ਼ਲ ਮੀਡੀਆ ਕੰਪਨੀ ਦੇ ਸ਼ੇਅਰ 7 ਫੀਸਦੀ ਤਕ ਟੁੱਟ ਗਏ। ਸ਼ੇਅਰ ਦੀ ਕੀਮਤ ਘਟਣ ਦੀ ਵਜ੍ਹਾ ਨਾਲ ਫੇਸਬੁੱਕ ਸੀ. ਈ. ਓ. ਮਾਰਕ ਜੁਕਰਬਰਗ ਨੂੰ ਇਕ ਦਿਨ 'ਚ 6.06 ਅਰਬ ਡਾਲਰ (ਤਕਰੀਬਨ 395 ਅਰਬ ਰੁਪਏ) ਦਾ ਨੁਕਸਾਨ ਹੋਇਆ। ਫੇਸਬੁੱਕ ਸਟਾਕ ਦੇ 40 ਕਰੋੜ ਤੋਂ ਵਧ ਸ਼ੇਅਰ ਮਾਰਕ ਜੁਕਰਬਰਗ ਕੋਲ ਹਨ। ਫੋਰਬਸ ਮੁਤਾਬਕ ਜੁਕਰਬਰਗ ਦੁਨੀਆ ਦੇ ਸਭ ਤੋਂ ਅਮੀਰ ਲੋਕਾਂ ਦੀ ਸੂਚੀ 'ਚ ਜੈੱਫ ਬੇਜੋਸ, ਬਿਲ ਗੇਟਸ, ਵਾਰੇਨ ਬਫਟ, ਬਰਨਾਰਡ ਅਰਨਾਲਟ ਦੇ ਬਾਅਦ 5ਵੇਂ ਸਥਾਨ 'ਤੇ ਹਨ। ਹਾਲਾਂਕਿ ਫੇਸਬੁੱਕ ਦੀ ਪ੍ਰਾਈਵੇਸੀ ਲੀਕ ਹੋਣ ਨਾਲ ਸੋਮਵਾਰ ਨੂੰ ਹੋਰ ਤਕਨਾਲੋਜੀ ਕੰਪਨੀਆਂ ਦੇ ਸਟਾਕ 'ਤੇ ਵੀ ਦਬਾਅ ਦੇਖਿਆ ਗਿਆ ਕਿਉਂਕਿ ਨਿਵੇਸ਼ਕਾਂ ਨੂੰ ਡਰ ਹੈ ਕਿ ਇਨ੍ਹਾਂ ਖਬਰਾਂ ਨਾਲ ਤਕਨਾਲੋਜੀ ਖੇਤਰ ਲਈ ਸਖਤ ਜਾਂਚ ਅਤੇ ਸੰਭਾਵੀ ਨਿਯਮ ਬਣਾਉਣ ਦੀ ਪਹਿਲ ਹੋ ਸਕਦੀ ਹੈ। ਪਹਿਲਾਂ ਹੀ ਸੰਯੁਕਤ ਰਾਜ ਅਮਰੀਕਾ, ਯੂਰਪ ਅਤੇ ਹੋਰ ਦੇਸ਼ਾਂ ਦੇ ਸਰਕਾਰੀ ਅਧਿਕਾਰੀ ਦੁਨੀਆ ਦੀਆਂ ਸਭ ਤੋਂ ਵੱਡੀਆਂ ਤਕਨੀਕੀ ਕੰਪਨੀਆਂ ਦੀ ਸਖਤ ਨਿਗਰਾਨੀ ਦੀ ਮੰਗ ਕਰ ਚੁੱਕੇ ਹਨ। ਨਿਵੇਸ਼ਕਾਂ ਨੂੰ ਡਰ ਹੈ ਕਿ ਕੁਝ ਕੰਪਨੀਆਂ ਨੂੰ ਆਪਣਾ ਬਿਜ਼ਨਸ ਮਾਡਲ ਦੇਸ਼ਾਂ ਦੇ ਹਿਸਾਬ ਨਾਲ ਅਨੁਕੂਲ ਬਣਾਉਣ ਲਈ ਕਿਹਾ ਜਾ ਸਕਦਾ ਹੈ, ਜਿਸ ਨਾਲ ਇਨ੍ਹਾਂ ਤਕਨੀਕੀ ਕੰਪਨੀਆਂ ਦਾ ਕਾਰੋਬਾਰ ਪ੍ਰਭਾਵਿਤ ਹੋਵੇਗਾ।