‘ਭ੍ਰਿਸ਼ਟਾਚਾਰ ਨੂੰ ਰੋਕਣ ਲਈ’ ਹੋਰ ਸਖ਼ਤ ਕਦਮ ਚੁੱਕਣੇ ਹੋਣਗੇ!

ਕੇਂਦਰ ਅਤੇ ਰਾਜ ਸਰਕਾਰਾਂ ਭ੍ਰਿਸ਼ਟਾਚਾਰ ਰੋਕਣ ਦੇ ਭਾਵੇਂ ਕਿੰਨੇ ਹੀ ਦਾਅਵੇ ਕਰਨ, ਤੱਥ ਇਹ ਹੈ ਕਿ ਭ੍ਰਿਸ਼ਟਾਚਾਰ ’ਤੇ ਪੂਰੀ ਤਰ੍ਹਾਂ ਨਕੇਲ ਕੱਸਣਾ ਅਜੇ ਮੁਸ਼ਕਲ ਹੈ। ਹੱਦ ਤਾਂ ਇਹ ਹੈ ਕਿ ਹੁਣ ਤਾਂ ਅਧਿਕਾਰੀ ਰਿਸ਼ਵਤ ਦੀ ਰਕਮ ਲੈਣ ਲਈ ਖ਼ੁਦ ਨਾ ਜਾ ਕੇ ਆਪਣੇ ਰਿਸ਼ਤੇਦਾਰਾਂ ਤੱਕ ਨੂੰ ਭੇਜਣ ਲੱਗੇ ਹਨ, ਜੋ ਪਿਛਲੇ ਮਹਿਜ਼ 7 ਦਿਨਾਂ ’ਚ ਸਾਹਮਣੇ ਆਈਆਂ ਹੇਠ ਲਿਖੀਆਂ ਘਟਨਾਵਾਂ ਤੋਂ ਸਪੱਸ਼ਟ ਹੈ :

* 13 ਫਰਵਰੀ, 2026 ਨੂੰ ‘ਪੰਜਾਬ ਵਿਜੀਲੈਂਸ ਬਿਊਰੋ’ ਨੇ ‘ਜ਼ਿਲਾ ਉਦਯੋਗ ਕੇਂਦਰ’ ‘ਲੁਧਿਆਣਾ’ ਦੇ 2 ਸੀਨੀਅਰ ਇੰਡਸਟਰੀਅਲ ਪ੍ਰਮੋਸ਼ਨਲ ਅਧਿਕਾਰੀਆਂ ‘ਜਸਪਾਲ ਸਿੰਘ’ ਤੇ ‘ਰਿਸ਼ਭ ਗਰਗ’ ਅਤੇ ਇਕ ਹੈੱਡ ਅਸਿਸਟੈਂਟ ‘ਅੰਤਰਪ੍ਰੀਤ ਸਿੰਘ’ ਨੂੰ ਇਕ ਉਦਯੋਗਪਤੀ ਨੂੰ ਪ੍ਰੋਡਕਸ਼ਨ ਸਰਟੀਫਿਕੇਟ ਦੇਣ ਦੇ ਬਦਲੇ ’ਚ ਉਸ ਤੋਂ 30,000 ਰੁਪਏ ਰਿਸ਼ਵਤ ਲੈਂਦੇ ਹੋਏ ਗ੍ਰਿਫ਼ਤਾਰ ਕੀਤਾ।

* 17 ਫਰਵਰੀ, 2026 ਨੂੰ ‘ਪੰਜਾਬ ਵਿਜੀਲੈਂਸ ਬਿਊਰੋ’ ਨੇ ਸਬ ਤਹਿਸੀਲ ‘ਮਹਿਤਪੁਰ’ ’ਚ ਤਾਇਨਾਤ ਕਾਨੂੰਨਗੋ ‘ਜਤਿੰਦਰ ਸਿੰਘ’ ਦੇ ਭਰਾ ‘ਪਰਮਿੰਦਰ ਸਿੰਘ’ ਨੂੰ ‘ਨਕੋਦਰ’ ਦੇ ਇਕ ਨਿਵਾਸੀ ਵੱਲੋਂ ਦਰਜ ਕਰਵਾਈ ਗਈ ਸ਼ਿਕਾਇਤ ਦੇ ਆਧਾਰ ’ਤੇ 20,000 ਰੁਪਏ ਰਿਸ਼ਵਤ ਲੈਂਦੇ ਹੋਏ ਗ੍ਰਿਫ਼ਤਾਰ ਕੀਤਾ।

* 18 ਫਰਵਰੀ, 2026 ਨੂੰ ‘ਪੰਜਾਬ ਵਿਜੀਲੈਂਸ ਬਿਊਰੋ’ ਨੇ ਉਪ-ਮੰਡਲ ਮੈਜਿਸਟ੍ਰੇਟ ‘ਕਪੂਰਥਲਾ’ ਦੀ ਅਦਾਲਤ ’ਚ ਤਾਇਨਾਤ ਨਾਇਬ ਕੋਰਟ ‘ਰਾਜਿੰਦਰ ਸਿੰਘ’ ਨੂੰ ਸ਼ਿਕਾਇਤਕਰਤਾ ’ਤੇ ਚੱਲ ਰਿਹਾ ਕੇਸ ਖ਼ਾਰਿਜ ਕਰਨ ਦੇ ਬਦਲੇ ’ਚ ਉਸ ਤੋਂ 8,000 ਰੁਪਏ ਰਿਸ਼ਵਤ ਲੈਂਦੇ ਹੋਏ ਗ੍ਰਿਫ਼ਤਾਰ ਕੀਤਾ।

* 18 ਫਰਵਰੀ, 2026 ਨੂੰ ਹੀ ‘ਪੰਜਾਬ ਵਿਜੀਲੈਂਸ ਬਿਊਰੋ’ ਨੇ ਪੀ. ਐੱਸ. ਪੀ. ਸੀ. ਐੱਲ. ‘ਅੱਤੋਵਾਲ’ (ਹੁਸ਼ਿਆਰਪੁਰ) ਦੇ ਸਬ ਡਵੀਜ਼ਨਲ ਆਫਿਸ ’ਚ ਤਾਇਨਾਤ ਲਾਈਨਮੈਨ ‘ਬਲਬੀਰ ਸਿੰਘ’ (ਫੌਜੀ) ਨੂੰ ਇਕ ਵਿਅਕਤੀ ਵੱਲੋਂ ਮੀਟਰ ਤੋਂ ਆਪਣੇ ਘਰ ਤੱਕ ਆਉਣ ਵਾਲੀ ਬਿਜਲੀ ਦੀ ਤਾਰ ਦਾ ਰੂਟ ਬਦਲਵਾਉਣ ਸਬੰਧੀ ਦਰਜ ਕਰਵਾਈ ਗਈ ਸ਼ਿਕਾਇਤ ਦੇ ਆਧਾਰ ’ਤੇ ਉਸ ਤੋਂ 5,000 ਰੁਪਏ ਰਿਸ਼ਵਤ ਲੈਂਦੇ ਹੋਏ ਗ੍ਰਿਫ਼ਤਾਰ ਕੀਤਾ।

* 18 ਫਰਵਰੀ, 2026 ਨੂੰ ਹੀ ‘ਰੋਹਤਕ’ (ਹਰਿਆਣਾ) ’ਚ ‘ਐਂਟੀ ਕੁਰੱਪਸ਼ਨ ਬਿਊਰੋ’ ਨੇ ਇਕ ਕੰਪਨੀ ਨੂੰ ਫੈਕਟਰੀ ਲਈ ਐੱਨ. ਓ. ਸੀ. ਦੇਣ ਦੇ ਨਾਂ ’ਤੇ ‘ਹਰਿਆਣਾ ਰਾਜ ਪ੍ਰਦੂਸ਼ਣ ਕੰਟਰੋਲ ਬੋਰਡ’ ਦੇ ਇਕ ਐੱਸ. ਡੀ. ਓ. ‘ਮਨਜੀਤ ਸਿੰਘ’ ਨੂੰ 1.25 ਲੱਖ ਰੁਪਏ ਰਿਸ਼ਵਤ ਲੈਂਦੇ ਹੋਏ ਗ੍ਰਿਫ਼ਤਾਰ ਕੀਤਾ।

* 19 ਫਰਵਰੀ, 2026 ਨੂੰ ‘ਭ੍ਰਿਸ਼ਟਾਚਾਰ ਰੋਕੂ ਬਿਊਰੋ’ ਦੀ ਟੀਮ ਨੇ ‘ਹੈਦਰਾਬਾਦ’ (ਤੇਲੰਗਾਨਾ) ’ਚ ਸਕੂਲ ਸਿੱਖਿਆ ਵਿਭਾਗ ਨਾਲ ਸਬੰਧਤ 2 ਅਧਿਕਾਰੀਆਂ ਨੂੰ ਸੀ. ਬੀ. ਐੱਸ. ਈ. ਦੀਆਂ ਪਾਠ-ਪੁਸਤਕਾਂ ਸਬੰਧੀ ਐੱਨ. ਓ. ਸੀ. ਦੀ ਫਾਈਲ ਅੱਗੇ ਵਧਾਉਣ ਦੇ ਬਦਲੇ ’ਚ 75,000 ਰੁਪਏ ਰਿਸ਼ਵਤ ਲੈਂਦੇ ਹੋਏ ਫੜਿਆ।

* 19 ਫਰਵਰੀ, 2026 ਨੂੰ ਹੀ ‘ਸਾਹਿਬਗੰਜ’ (ਬਿਹਾਰ) ’ਚ ‘ਰਾਜ ਕੁਮਾਰ ਤਿਵਾੜੀ’ ਨਾਮੀ ਸ਼ਿਕਾਇਤਕਰਤਾ ਦੇ ਇਕ ਬਿੱਲ ਦੀ ਅਦਾਇਗੀ ਸਬੰਧੀ ਪ੍ਰਕਿਰਿਆ ਨੂੰ ਅੱਗੇ ਵਧਾਉਣ ਦੇ ਬਦਲੇ ’ਚ ਉਸ ਤੋਂ 9,000 ਰੁਪਏ ਰਿਸ਼ਵਤ ਲੈਣ ਦੇ ਦੋਸ਼ ’ਚ ਜੂਨੀਅਰ ਇੰਜੀਨੀਅਰ ‘ਅਮਨ ਕੁਮਾਰ’ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ।

* 19 ਫਰਵਰੀ, 2026 ਨੂੰ ਹੀ ‘ਪ੍ਰਯਾਗਰਾਜ’ (ਉੱਤਰ ਪ੍ਰਦੇਸ਼) ’ਚ ‘ਭ੍ਰਿਸ਼ਟਾਚਾਰ ਰੋਕੂ ਵਿਭਾਗ’ ਦੇ ਅਧਿਕਾਰੀਆਂ ਨੇ ਇਕ ਕੇਸ ’ਚ ਫਾਈਨਲ ਰਿਪੋਰਟ ਲਗਾਉਣ ਦੇ ਬਦਲੇ ’ਚ ਸ਼ਿਕਾਇਤਕਰਤਾ ਤੋਂ 75,000 ਰੁਪਏ ਰਿਸ਼ਵਤ ਲੈਣ ਦੇ ਦੋਸ਼ ’ਚ ਇੰਸਪੈਕਟਰ ‘ਵਿਨੋਦ ਕੁਮਾਰ ਸੋਨਕਰ’ ਨੂੰ ਗ੍ਰਿਫ਼ਤਾਰ ਕੀਤਾ।

* 19 ਫਰਵਰੀ, 2026 ਨੂੰ ਹੀ ‘ਸੰਭਲ’ (ਉੱਤਰ ਪ੍ਰਦੇਸ਼) ’ਚ ਭ੍ਰਿਸ਼ਟਾਚਾਰ ਰੋਕੂ ਵਿਭਾਗ ਦੇ ਅਧਿਕਾਰੀਆਂ ਨੇ ‘ਰਾਜੂ’ ਨਾਂ ਦੇ ਇਕ ਵਿਅਕਤੀ ਦੀ ਪ੍ਰਾਪਰਟੀ ਦੇ ਨਕਸ਼ੇ ’ਚ ਸੁਧਾਰ ਦੇ ਬਦਲੇ ’ਚ ਉਸ ਤੋਂ 14,000 ਰੁਪਏ ਰਿਸ਼ਵਤ ਲੈਣ ਦੇ ਦੋਸ਼ ’ਚ ਇਕ ‘ਕਾਨੂੰਨਗੋ’ ਨੂੰ ਗ੍ਰਿਫ਼ਤਾਰ ਕੀਤਾ।

* 20 ਫਰਵਰੀ, 2026 ਨੂੰ ‘ਜ਼ੀਰਕਪੁਰ’ ਦੀ ਇਕ ਨਾਮੀ ਆਟੋਮੋਬਾਈਲ ਕੰਪਨੀ ਦੇ ਸ਼ੋਅਰੂਮ ਨੂੰ ਫਾਇਰ ਬ੍ਰਿਗੇਡ ਵਿਭਾਗ ਦੀ ਐੱਨ. ਓ. ਸੀ. ਦੇਣ ਦੇ ਨਾਂ ’ਤੇ ਡੇਢ ਲੱਖ ਰੁਪਏ ਰਿਸ਼ਵਤ ਲੈਂਦੇ ਹੋਏ ਫਾਇਰ ਬ੍ਰਿਗੇਡ ਵਿਭਾਗ ਦੇ ਸਬ ਫਾਇਰ ਅਫ਼ਸਰ ‘ਜਸਵੰਤ ਸਿੰਘ’ ਨੂੰ ਵਿਜੀਲੈਂਸ ਵਿਭਾਗ ਨੇ ਗ੍ਰਿਫ਼ਤਾਰ ਕੀਤਾ।

* ਅਤੇ ਹੁਣ 21 ਫਰਵਰੀ, 2026 ਨੂੰ ‘ਸ਼ਿਰਹੱਟੀ’ (ਕਰਨਾਟਕ) ਤੋਂ ਭਾਜਪਾ ਵਿਧਾਇਕ ਚੰਦਰੂ ਲਮਾਨੀ ਨੂੰ ਇਕ ਵਿਅਕਤੀ ਤੋਂ 5 ਲੱਖ ਰੁਪਏ ਰਿਸ਼ਵਤ ਲੈਂਦੇ ਹੋਏ ਲੋਕਾਯੁਕਤ ਪੁਲਸ ਨੇ ਗ੍ਰਿਫ਼ਤਾਰ ਕੀਤਾ ਹੈ।

ਉਪਰੋਕਤ ਕੁਝ ਉਦਾਹਰਣਾਂ ਤੋਂ ਸਪੱਸ਼ਟ ਹੈ ਕਿ ਨੌਕਰਸ਼ਾਹੀ ਕਿੰਨੀ ਭ੍ਰਿਸ਼ਟ ਹੋ ਚੁੱਕੀ ਹੈ। ਲਿਹਾਜ਼ਾ ਦੇਸ਼ ’ਚ ਸਾਰੇ ਪੱਧਰਾਂ ’ਤੇ ਭ੍ਰਿਸ਼ਟਾਚਾਰ ਵਿਰੁੱਧ ਸ਼ਿਕਾਇਤ ਕਰਨ ਲਈ ਆਮ ਜਨਤਾ ਨੂੰ ਉਤਸ਼ਾਹਿਤ ਕਰਨ, ਚੌਕਸੀ ਵਧਾਉਣ ਅਤੇ ਫੜੇ ਜਾਣ ਵਾਲੇ ਦੋਸ਼ੀਆਂ ਵਿਰੁੱਧ ਸਖ਼ਤ ਕਾਰਵਾਈ ਕਰਨ ਦੀ ਤੁਰੰਤ ਲੋੜ ਹੈ।

-ਵਿਜੇ ਕੁਮਾਰ