ਆਸਟਰੇਲੀਆ ਪਹੁੰਚਿਆ ਡੋਕਲਾਮ ਵਿਵਾਦ, ਭਾਰਤ ਵਿਰੁੱਧ ਕੀਤਾ ਗਿਆ ਵਿਰੋਧ ਪ੍ਰਦਰਸ਼ਨ
08/18/2017 3:07:44 PM
ਸਿਡਨੀ— ਡੋਕਲਾਮ ਨੂੰ ਲੈ ਕੇ ਭਾਰਤ ਅਤੇ ਚੀਨ ਵਿਚਕਾਰ ਜਾਰੀ ਵਿਵਾਦ ਦਾ ਅਸਰ ਆਸਟਰੇਲੀਆ ਵਿਚ ਦੇਖਣ ਨੂੰ ਮਿਲਿਆ ਹੈ । ਇਸ ਮੁੱਦੇ ਉੱਤੇ ਚੀਨੀ ਮੂਲ ਦੇ ਆਸਟਰੇਲਿਆਈ ਨਾਗਰਿਕਾਂ ਨੇ ਭਾਰਤ ਖਿਲਾਫ ਵਿਰੋਧ ਪ੍ਰਦਸ਼ਨ ਲਈ ਇਕ ਕਾਰ ਰੈਲੀ ਕੱਢਣ ਦਾ ਫੈਸਲਾ ਕੀਤਾ ਅਤੇ ਇਸ ਲਈ ਦੇਸ਼ ਦੇ 71ਵੇਂ ਆਜ਼ਾਦੀ ਦਿਹਾੜੇ ਦਾ ਦਿਨ ਚੁਣਿਆ ਸੀ।
ਸਾਰੇ ਆਪਣੀ-ਆਪਣੀ ਕਾਰ ਵਿਚ ਵਿਰੋਧ ਪ੍ਰਦਰਸ਼ਨ ਲਈ ਨਿਕਲੇ ਅਤੇ ਚਾਈਨਾਟਾਊਨ, ਮਾਰਟਿਨ ਪਲੇਸ, ਸਿਡਨੀ ਓਪੇਰਾ ਹਾਊਸ, ਆਰਟ ਗੈਲਰੀ ਆਫ ਐਨ. ਐਸ. ਡਬਲਯੂ ਹੁੰਦੇ ਹੋਏ ਆਪਣੇ ਆਖਰੀ ਮੰਜ਼ਿਲ ਭਾਰਤ ਦੇ ਵਣਜ ਦੂਤਘਰ ਪੁੱਜੇ । ਸਥਾਨਕ ਮੀਡੀਆ ਰਿਪੋਰਟ ਮੁਤਾਬਕ ਜ਼ਿਆਦਾਤਰ ਕਾਰਾਂ ਉੱਤੇ ਚੀਨੀ ਝੰਡੇ, ਭਾਰਤ ਖਿਲਾਫ ਨਾਅਰੇ ਵਾਲੇ ਸਟੀਕਰ ਚਿਪਕੇ ਹੋਏ ਸਨ ।
ਤੁਹਾਨੂੰ ਦੱਸ ਦਈਏ ਕਿ ਡੋਕਲਾਮ ਨੂੰ ਲੈ ਕੇ ਭਾਰਤ ਅਤੇ ਚੀਨ ਵਿਚਕਾਰ ਸਿੱਕਮ ਸਰਹੱਦ ਉੱਤੇ ਜਾਰੀ ਵਿਵਾਦ ਨੂੰ 2 ਮਹੀਨੇ ਤੋਂ ਜ਼ਿਆਦਾ ਸਮਾਂ ਹੋ ਗਿਆ । ਇਸ ਦੀ ਸ਼ੁਰੂਆਤ ਉਦੋਂ ਹੋਈ, ਜਦੋਂ ਚੀਨ ਨੇ ਭਾਰਤੀ ਜਵਾਨਾਂ ਉੱਤੇ ਸਰਹੱਦ ਪਾਰ ਕਰਨ ਅਤੇ ਡੋਕਲਾਮ ਵਿਚ ਉਨ੍ਹਾਂ ਦੇ ਇਕ ਸੜਕ ਉਸਾਰੀ ਦਾ ਕੰਮ ਨੂੰ ਰੋਕਣ ਦਾ ਦੋਸ਼ ਲਗਾਇਆ । ਉਦੋਂ ਤੋਂ ਹੁਣ ਤੱਕ ਚੀਨ ਲਗਾਤਾਰ ਭਾਰਤ ਤੋਂ ਆਪਣੇ ਜਵਾਨਾਂ ਨੂੰ ਵਾਪਸ ਬੁਲਾਉਣ ਦੀ ਮੰਗ ਕਰ ਰਿਹਾ ਹੈ । ਫੌਜੀ ਕਾਰਵਾਈ ਦੀ ਧਮਕੀ ਵੀ ਦੇ ਚੁੱਕਾ ਹੈ ਪਰ ਭਾਰਤ ਵੀ ਮੂੰਹਤੋੜ ਜਵਾਬ ਦੇਣ ਨੂੰ ਤਿਆਰ ਹੈ ।
