ਅਰਸ਼ਦੀਪ ਦੇ ਥ੍ਰੋਅ ਵਿਵਾਦ 'ਤੇ ਕਪਤਾਨ ਨੇ ਕਿਉਂ ਖ਼ੁਦ ਮੰਗੀ ਮੁਆਫੀ? ਸੂਰਿਆਕੁਮਾਰ ਨੇ ਦੱਸੀ ਵਜ੍ਹਾ

ਨਵੀਂ ਦਿੱਲੀ : ਭਾਰਤੀ ਟੀ-20 ਕਪਤਾਨ ਸੂਰਿਆਕੁਮਾਰ ਯਾਦਵ ਨੇ ਹਾਲ ਹੀ ਵਿੱਚ ਹੋਏ ਆਈਸੀਸੀ ਪੁਰਸ਼ ਟੀ-20 ਵਿਸ਼ਵ ਕੱਪ 2026 ਦੇ ਫਾਈਨਲ ਦੌਰਾਨ ਹੋਏ ਇੱਕ ਵਿਵਾਦਤ ਪਲ ਬਾਰੇ ਵੱਡਾ ਖੁਲਾਸਾ ਕੀਤਾ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਤੇਜ਼ ਗੇਂਦਬਾਜ਼ ਅਰਸ਼ਦੀਪ ਸਿੰਘ ਦੇ ਥਰੋਅ ਨਾਲ ਨਿਊਜ਼ੀਲੈਂਡ ਦੇ ਬੱਲੇਬਾਜ਼ ਡੇਰਿਲ ਮਿਸ਼ੇਲ ਨੂੰ ਗੇਂਦ ਲੱਗਣ ਤੋਂ ਬਾਅਦ ਉਨ੍ਹਾਂ ਨੇ ਨਿੱਜੀ ਤੌਰ 'ਤੇ ਮਿਸ਼ੇਲ ਤੋਂ ਮਾਫ਼ੀ ਮੰਗੀ ਸੀ।

ਕੀ ਸੀ ਪੂਰਾ ਮਾਮਲਾ? 
ਫਾਈਨਲ ਮੁਕਾਬਲੇ ਦੌਰਾਨ ਅਰਸ਼ਦੀਪ ਸਿੰਘ ਦਾ ਇੱਕ ਥਰੋਅ ਸਿੱਧਾ ਡੇਰਿਲ ਮਿਸ਼ੇਲ ਦੇ ਪੈਡਾਂ 'ਤੇ ਜਾ ਲੱਗਿਆ, ਜਿਸ ਤੋਂ ਬਾਅਦ ਮੈਦਾਨ 'ਤੇ ਤਣਾਅ ਪੈਦਾ ਹੋ ਗਿਆ ਸੀ। ਇਸ ਘਟਨਾ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਅੰਤਰਰਾਸ਼ਟਰੀ ਕ੍ਰਿਕਟ ਕੌਂਸਲ (ICC) ਨੇ ਅਰਸ਼ਦੀਪ 'ਤੇ ਮੈਚ ਫੀਸ ਦਾ 15 ਫੀਸਦੀ ਜੁਰਮਾਨਾ ਲਗਾਇਆ ਅਤੇ ਇੱਕ ਡੀਮੇਰਿਟ ਅੰਕ ਵੀ ਦਿੱਤਾ।

ਸੂਰਿਆਕੁਮਾਰ ਨੇ ਕਿਉਂ ਕੀਤੀ ਦਖ਼ਲਅੰਦਾਜ਼ੀ? 
ਘਟਨਾ ਤੋਂ ਤੁਰੰਤ ਬਾਅਦ ਜਦੋਂ ਅਰਸ਼ਦੀਪ ਨੇ ਮੁਆਫ਼ੀ ਨਹੀਂ ਮੰਗੀ, ਤਾਂ ਮਿਸ਼ੇਲ ਨੇ ਇਸ 'ਤੇ ਇਤਰਾਜ਼ ਜਤਾਇਆ। ਸਥਿਤੀ ਨੂੰ ਸੰਭਾਲਣ ਲਈ ਕਪਤਾਨ ਸੂਰਿਆਕੁਮਾਰ ਯਾਦਵ ਅਤੇ ਅੰਪਾਇਰਾਂ ਨੂੰ ਵਿੱਚ-ਬਚਾਅ ਕਰਨਾ ਪਿਆ। ਸੂਰਿਆਕੁਮਾਰ ਨੇ ਇੱਕ ਪੋਡਕਾਸਟ ਵਿੱਚ ਦੱਸਿਆ ਕਿ ਕਪਤਾਨ ਹੋਣ ਦੇ ਨਾਤੇ ਇੱਕ ਸਹੀ ਮਿਸਾਲ ਪੇਸ਼ ਕਰਨਾ ਉਨ੍ਹਾਂ ਦੀ ਜ਼ਿੰਮੇਵਾਰੀ ਸੀ। ਉਨ੍ਹਾਂ ਨੇ ਮਿਸ਼ੇਲ ਨੂੰ ਕਿਹਾ, "ਚਾਹੇ ਇਹ ਜਾਣਬੁੱਝ ਕੇ ਹੋਇਆ ਹੋਵੇ ਜਾਂ ਨਾ, ਦੋਵਾਂ ਹੀ ਸਥਿਤੀਆਂ ਵਿੱਚ ਸਾਨੂੰ ਮੁਆਫ਼ ਕਰੋ।" ਇਹ ਕਦਮ ਸਿਰਫ਼ ਖੇਡ ਭਾਵਨਾ ਨੂੰ ਬਣਾਈ ਰੱਖਣ ਲਈ ਚੁੱਕਿਆ ਗਿਆ ਸੀ।

ਅਰਸ਼ਦੀਪ ਦੀ ਸਫ਼ਾਈ ਅਤੇ ਭਾਰਤ ਦੀ ਜਿੱਤ 
ਮੈਚ ਤੋਂ ਬਾਅਦ ਅਰਸ਼ਦੀਪ ਸਿੰਘ ਨੇ ਵੀ ਅਧਿਕਾਰਤ ਤੌਰ 'ਤੇ ਮੁਆਫ਼ੀ ਮੰਗੀ ਅਤੇ ਸਪੱਸ਼ਟ ਕੀਤਾ ਕਿ ਉਨ੍ਹਾਂ ਦਾ ਥਰੋਅ ਰਿਵਰਸ ਸਵਿੰਗ ਹੋ ਕੇ ਮਿਸ਼ੇਲ ਨੂੰ ਲੱਗ ਗਿਆ ਸੀ ਅਤੇ ਇਹ ਪੂਰੀ ਤਰ੍ਹਾਂ ਅਣਜਾਣੇ ਵਿੱਚ ਹੋਇਆ ਸੀ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦਾ ਇਰਾਦਾ ਕਿਸੇ ਨੂੰ ਸੱਟ ਪਹੁੰਚਾਉਣ ਦਾ ਨਹੀਂ ਸੀ। ਦੂਜੇ ਪਾਸੇ, ਗੌਤਮ ਗੰਭੀਰ ਨੇ ਕਿਹਾ ਕਿ ਇਸ ਮਾਮਲੇ ਵਿੱਚ ਮੁਆਫ਼ੀ ਮੰਗਣ ਦੀ ਕੋਈ ਲੋੜ ਨਹੀਂ ਸੀ। ਇਸ ਵਿਵਾਦ ਦੇ ਬਾਵਜੂਦ, ਭਾਰਤੀ ਟੀਮ ਨੇ ਇਹ ਫਾਈਨਲ 96 ਦੌੜਾਂ ਨਾਲ ਜਿੱਤ ਕੇ ਵਿਸ਼ਵ ਕੱਪ 2026 ਦਾ ਖ਼ਿਤਾਬ ਆਪਣੇ ਨਾਮ ਕੀਤਾ।