''ਅਜੇ ਸੁਧਾਰ ਦੀ ਗੁੰਜਾਇਸ਼'', IPL 2026 ਦੀ ਪਹਿਲੀ ਜਿੱਤ ਤੋਂ ਬਾਅਦ KKR ਦੇ ਕਪਤਾਨ ਰਹਾਣੇ ਦਾ ਬਿਆਨ

ਕੋਲਕਾਤਾ : ਆਈ.ਪੀ.ਐੱਲ. 2026 ਵਿੱਚ ਲਗਾਤਾਰ ਛੇ ਮੈਚਾਂ ਦੀ ਨਿਰਾਸ਼ਾ ਤੋਂ ਬਾਅਦ ਆਖਰਕਾਰ ਕੋਲਕਾਤਾ ਨਾਈਟ ਰਾਈਡਰਜ਼ (KKR) 'ਤੇ ਕਿਸਮਤ ਮਿਹਰਬਾਨ ਹੋਈ ਹੈ। ਐਤਵਾਰ ਨੂੰ ਕੋਲਕਾਤਾ ਦੇ ਈਡਨ ਗਾਰਡਨਜ਼ ਵਿੱਚ ਖੇਡੇ ਗਏ ਰੋਮਾਂਚਕ ਮੁਕਾਬਲੇ ਵਿੱਚ ਕੇ.ਕੇ.ਆਰ. ਨੇ ਰਾਜਸਥਾਨ ਰਾਇਲਜ਼ (RR) ਨੂੰ 4 ਵਿਕਟਾਂ ਨਾਲ ਹਰਾ ਕੇ ਇਸ ਸੀਜ਼ਨ ਦੀ ਆਪਣੀ ਪਹਿਲੀ ਜਿੱਤ ਦਰਜ ਕੀਤੀ।

ਵਰੁਣ ਅਤੇ ਕਾਰਤਿਕ ਦੀ ਘਾਤਕ ਗੇਂਦਬਾਜ਼ੀ 
ਪਹਿਲਾਂ ਬੱਲੇਬਾਜ਼ੀ ਕਰਨ ਉਤਰੀ ਰਾਜਸਥਾਨ ਰਾਇਲਜ਼ ਦੀ ਸ਼ੁਰੂਆਤ ਚੰਗੀ ਰਹੀ। ਵੈਭਵ ਸੂਰਿਆਵੰਸ਼ੀ (46) ਅਤੇ ਯਸ਼ਸਵੀ ਜਾਇਸਵਾਲ (39) ਵਿਚਾਲੇ 81 ਦੌੜਾਂ ਦੀ ਸਾਂਝੇਦਾਰੀ ਹੋਈ। ਹਾਲਾਂਕਿ, ਕੇ.ਕੇ.ਆਰ. ਦੇ ਗੇਂਦਬਾਜ਼ਾਂ ਨੇ ਸ਼ਾਨਦਾਰ ਵਾਪਸੀ ਕੀਤੀ। ਵਰੁਣ ਚੱਕਰਵਰਤੀ ਨੇ ਮਹਿਜ਼ 14 ਦੌੜਾਂ ਦੇ ਕੇ 3 ਵਿਕਟਾਂ ਅਤੇ ਕਾਰਤਿਕ ਨੇ 22 ਦੌੜਾਂ ਦੇ ਕੇ 3 ਵਿਕਟਾਂ ਝਟਕਾਈਆਂ, ਜਿਸ ਕਾਰਨ ਰਾਜਸਥਾਨ ਦੀ ਟੀਮ 20 ਓਵਰਾਂ ਵਿੱਚ 155/9 ਦੌੜਾਂ ਹੀ ਬਣਾ ਸਕੀ।

ਰਿੰਕੂ ਸਿੰਘ ਅਤੇ ਅਨੁਕੂਲ ਰਾਏ ਬਣੇ ਜਿੱਤ ਦੇ ਹੀਰੋ
156 ਦੌੜਾਂ ਦੇ ਟੀਚੇ ਦਾ ਪਿੱਛਾ ਕਰਦਿਆਂ ਕੇ.ਕੇ.ਆਰ. ਦੀ ਹਾਲਤ ਇੱਕ ਸਮੇਂ ਕਾਫੀ ਨਾਜ਼ੁਕ ਹੋ ਗਈ ਸੀ ਅਤੇ ਟੀਮ ਨੇ 85 ਦੌੜਾਂ 'ਤੇ 6 ਵਿਕਟਾਂ ਗੁਆ ਦਿੱਤੀਆਂ ਸਨ। ਅਜਿਹੀ ਮੁਸ਼ਕਲ ਸਥਿਤੀ ਵਿੱਚ ਰਿੰਕੂ ਸਿੰਘ (34 ਗੇਂਦਾਂ ਵਿੱਚ 53*) ਅਤੇ ਅਨੁਕੂਲ ਰਾਏ (16 ਗੇਂਦਾਂ ਵਿੱਚ 29*) ਨੇ ਸੱਤਵੀਂ ਵਿਕਟ ਲਈ ਅਜੇਤੂ ਸਾਂਝੇਦਾਰੀ ਕਰਕੇ ਟੀਮ ਨੂੰ 2 ਗੇਂਦਾਂ ਰਹਿੰਦਿਆਂ ਜਿੱਤ ਦਿਵਾਈ।

ਕਪਤਾਨ ਰਹਾਣੇ ਦਾ ਬਿਆਨ 
ਜਿੱਤ ਤੋਂ ਬਾਅਦ ਕਪਤਾਨ ਅਜਿੰਕਿਆ ਰਹਾਣੇ ਨੇ ਕਿਹਾ ਕਿ ਇਹ ਜਿੱਤ ਪ੍ਰਸ਼ੰਸਕਾਂ ਲਈ ਹੈ। ਉਨ੍ਹਾਂ ਨੇ ਰਿੰਕੂ, ਅਨੁਕੂਲ ਅਤੇ ਵਰੁਣ ਦੇ ਪ੍ਰਦਰਸ਼ਨ ਦੀ ਸ਼ਲਾਘਾ ਕਰਦਿਆਂ ਕਿਹਾ, "ਬੱਲੇਬਾਜ਼ੀ ਵਿੱਚ ਅਜੇ ਵੀ ਸੁਧਾਰ ਦੀ ਗੁੰਜਾਇਸ਼ ਹੈ, ਪਰ ਇਸ ਜਿੱਤ ਨਾਲ ਟੀਮ ਦਾ ਆਤਮ-ਵਿਸ਼ਵਾਸ ਵਧੇਗਾ"। ਰਹਾਣੇ ਨੇ ਨੌਜਵਾਨ ਗੇਂਦਬਾਜ਼ ਕਾਰਤਿਕ ਦੀ ਵੀ ਤਾਰੀਫ਼ ਕੀਤੀ ਅਤੇ ਕਿਹਾ ਕਿ ਉਸ ਕੋਲ ਆਪਣੀ ਕਾਬਲੀਅਤ ਬਾਰੇ ਪੂਰੀ ਸਪੱਸ਼ਟਤਾ ਹੈ।

ਸਟ੍ਰਾਈਕ ਰੇਟ 'ਤੇ ਦਿੱਤੀ ਪ੍ਰਤੀਕਿਰਿਆ 
ਆਪਣੇ ਸਟ੍ਰਾਈਕ ਰੇਟ ਨੂੰ ਲੈ ਕੇ ਹੋ ਰਹੀ ਚਰਚਾ 'ਤੇ ਰਹਾਣੇ ਨੇ ਕਿਹਾ ਕਿ ਕਈ ਵਾਰ ਸਟ੍ਰਾਈਕ ਰੇਟ ਨੂੰ ਜ਼ਰੂਰਤ ਤੋਂ ਜ਼ਿਆਦਾ ਅਹਿਮੀਅਤ ਦਿੱਤੀ ਜਾਂਦੀ ਹੈ। ਉਨ੍ਹਾਂ ਅਨੁਸਾਰ ਖੇਡ ਨੂੰ ਅਖੀਰ ਤੱਕ ਲੈ ਕੇ ਜਾਣਾ ਜ਼ਰੂਰੀ ਹੁੰਦਾ ਹੈ, ਜੋ ਕਿ ਅੱਜ ਦੇ ਮੈਚ ਵਿੱਚ ਸਹੀ ਸਾਬਤ ਹੋਇਆ।