IPL 2026 ਵਿਚਾਲੇ 41 ਸਾਲਾ ਧਾਕੜ ਆਲਰਾਊਂਡਰ ਨੇ ਲਿਆ ਸੰਨਿਆਸ ! ਜਾਣੋ ਵਜ੍ਹਾ

ਸਪੋਰਟਸ ਡੈਸਕ : ਇੰਡੀਅਨ ਪ੍ਰੀਮੀਅਰ ਲੀਗ (IPL 2026) ਦੇ ਸੀਜ਼ਨ ਦਰਮਿਆਨ ਕ੍ਰਿਕਟ ਜਗਤ ਤੋਂ ਇੱਕ ਬਹੁਤ ਹੀ ਹੈਰਾਨ ਕਰਨ ਵਾਲੀ ਖਬਰ ਸਾਹਮਣੇ ਆਈ ਹੈ। ਇੰਗਲੈਂਡ ਦੇ 41 ਸਾਲਾ ਤਜ਼ਰਬੇਕਾਰ ਆਲਰਾਊਂਡਰ ਸਮਿਤ ਪਟੇਲ ਨੇ ਘਰੇਲੂ ਕ੍ਰਿਕਟ ਤੋਂ ਸੰਨਿਆਸ ਲੈਣ ਦਾ ਅਧਿਕਾਰਤ ਐਲਾਨ ਕਰ ਦਿੱਤਾ ਹੈ। ਇਸ ਅਚਾਨਕ ਲਏ ਗਏ ਫੈਸਲੇ ਨੇ ਕ੍ਰਿਕਟ ਪ੍ਰਸ਼ੰਸਕਾਂ ਨੂੰ ਹੈਰਾਨ ਕਰ ਦਿੱਤਾ ਹੈ। ਸਮਿਤ ਪਟੇਲ ਦਾ ਇਹ ਫੈਸਲਾ ਇੰਗਲੈਂਡ ਅਤੇ ਵੇਲਜ਼ ਕ੍ਰਿਕਟ ਬੋਰਡ (ECB) ਦੇ ਸਖਤ ਨਿਯਮਾਂ ਕਾਰਨ ਆਇਆ ਹੈ। ਦਰਅਸਲ, ਪਟੇਲ ਨੇ ਗੋਆ ਵਿੱਚ ਇੱਕ 'ਗੈਰ-ਮਾਨਤਾ ਪ੍ਰਾਪਤ' ਲੀਗ (ਵਰਲਡ ਲੀਜੈਂਡਜ਼ ਪ੍ਰੋ ਟੀ-20 ਲੀਗ) ਵਿੱਚ ਹਿੱਸਾ ਲਿਆ ਸੀ। ਬੋਰਡ ਦੇ ਨਿਯਮਾਂ ਅਨੁਸਾਰ, ਅਜਿਹੀਆਂ ਲੀਗਾਂ ਵਿੱਚ ਖੇਡਣ ਵਾਲੇ ਖਿਡਾਰੀ 'ਤੇ 12 ਮਹੀਨਿਆਂ ਲਈ ਘਰੇਲੂ ਕ੍ਰਿਕਟ ਖੇਡਣ 'ਤੇ ਪਾਬੰਦੀ ਲਗਾ ਦਿੱਤੀ ਜਾਂਦੀ ਹੈ। ਇਸੇ ਪਾਬੰਦੀ ਕਾਰਨ ਉਨ੍ਹਾਂ ਨੂੰ ਟੀ-20 ਬਲਾਸਟ ਵਰਗੇ ਟੂਰਨਾਮੈਂਟਾਂ ਤੋਂ ਮੁਅੱਤਲ ਕਰ ਦਿੱਤਾ ਗਿਆ ਸੀ, ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਸੰਨਿਆਸ ਲੈਣ ਦਾ ਮਨ ਬਣਾ ਲਿਆ।

ਸਮਿਤ ਪਟੇਲ ਦਾ ਕਰੀਅਰ ਬੇਮਿਸਾਲ ਰਿਹਾ ਹੈ। ਉਨ੍ਹਾਂ ਨੇ 2008 ਤੋਂ 2015 ਦਰਮਿਆਨ ਇੰਗਲੈਂਡ ਦੀ ਰਾਸ਼ਟਰੀ ਟੀਮ ਲਈ 60 ਮੈਚ ਖੇਡੇ। ਇਸ ਤੋਂ ਇਲਾਵਾ, ਉਨ੍ਹਾਂ ਨੇ ਨੌਟਿੰਘਮਸ਼ਾਇਰ ਲਈ 22 ਸਾਲਾਂ ਦੇ ਲੰਬੇ ਸਮੇਂ ਵਿੱਚ 629 ਮੈਚ ਖੇਡੇ ਹਨ। ਸਾਰੇ ਫਾਰਮੈਟਾਂ ਵਿੱਚ ਪਟੇਲ ਨੇ 25,000 ਤੋਂ ਵੱਧ ਦੌੜਾਂ ਬਣਾਈਆਂ ਅਤੇ ਆਪਣੀ ਸਪਿਨ ਗੇਂਦਬਾਜ਼ੀ ਨਾਲ 800 ਤੋਂ ਵੱਧ ਵਿਕਟਾਂ ਚਟਕਾਈਆਂ ਹਨ। ਭਾਵੇਂ ਸਮਿਤ ਪਟੇਲ ਨੇ ਇੰਗਲੈਂਡ ਵਿੱਚ ਘਰੇਲੂ ਕ੍ਰਿਕਟ ਨੂੰ ਅਲਵਿਦਾ ਕਹਿ ਦਿੱਤਾ ਹੈ, ਪਰ ਉਹ ਦੁਨੀਆ ਭਰ ਵਿੱਚ ਫਰੈਂਚਾਇਜ਼ੀ ਕ੍ਰਿਕਟ ਖੇਡਣਾ ਜਾਰੀ ਰੱਖਣਗੇ। ਦੱਸਣਯੋਗ ਹੈ ਕਿ ਪਟੇਲ ਨੇ ਕਦੇ ਵੀ ਆਈਪੀਐਲ (IPL) ਵਿੱਚ ਹਿੱਸਾ ਨਹੀਂ ਲਿਆ, ਪਰ 2011 ਦੀ ਨਿਲਾਮੀ ਵਿੱਚ ਆਪਣਾ ਨਾਂ ਦੇਣ ਤੋਂ ਬਾਅਦ ਉਨ੍ਹਾਂ ਨੇ ਕਾਉਂਟੀ ਕ੍ਰਿਕਟ ਨੂੰ ਪਹਿਲ ਦਿੰਦਿਆਂ ਨਾਂ ਵਾਪਸ ਲੈ ਲਿਆ ਸੀ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

Whatsapp Channel: https://whatsapp.com/channel/0029Va94hsaHAdNVur4L170e