CSK ਦੇ ਕਪਤਾਨ ਨੇ ਬਣਾ''ਤਾ ਨਵਾਂ ਰਿਕਾਰਡ! ਮਾਰਿਆ IPL 2026 ਦਾ ਸਭ ਤੋਂ ਹੌਲੀ ਅਰਧ ਸੈਂਕੜਾ

ਵੈੱਬ ਡੈਸਕ : IPL 2026 'ਚ ਗੁਜਰਾਤ ਟਾਈਟਨਸ (GT) ਦੇ ਖਿਲਾਫ ਖੇਡਦਿਆਂ ਚੇਨਈ ਸੁਪਰ ਕਿੰਗਜ਼ (CSK) ਦੇ ਕਪਤਾਨ ਰਿਤੂਰਾਜ ਗਾਇਕਵਾੜ ਨੇ ਇੱਕ ਅਹਿਮ ਪਾਰੀ ਖੇਡੀ, ਪਰ ਆਪਣੀ ਹੌਲੀ ਰਫਤਾਰ ਕਾਰਨ ਉਨ੍ਹਾਂ ਨੇ ਇੱਕ ਅਣਚਾਹੇ ਰਿਕਾਰਡ 'ਚ ਆਪਣਾ ਨਾਂ ਦਰਜ ਕਰਵਾ ਲਿਆ ਹੈ। ਐੱਮਏ ਚਿਦੰਬਰਮ ਸਟੇਡੀਅਮ 'ਚ ਖੇਡੇ ਗਏ ਇਸ ਮੈਚ 'ਚ ਗਾਇਕਵਾੜ ਨੇ ਇਸ ਸੀਜ਼ਨ ਦਾ ਸਭ ਤੋਂ ਹੌਲੀ ਅਰਧ ਸੈਂਕੜਾ ਜੜਿਆ।

ਟੀਮ ਦੇ ਸੰਕਟ 'ਚ ਕਪਤਾਨ ਨੇ ਸੰਭਾਲਿਆ ਮੋਰਚਾ
ਮੈਚ ਦੀ ਸ਼ੁਰੂਆਤ ਚੇਨਈ ਲਈ ਕਾਫੀ ਖਰਾਬ ਰਹੀ ਤੇ ਟੀਮ ਨੇ ਸਿਰਫ਼ 37 ਦੌੜਾਂ 'ਤੇ ਹੀ 4 ਵਿਕਟਾਂ ਗੁਆ ਦਿੱਤੀਆਂ ਸਨ। ਅਜਿਹੇ ਨਾਜ਼ੁਕ ਸਮੇਂ 'ਤੇ ਕਪਤਾਨ ਰਿਤੂਰਾਜ ਗਾਇਕਵਾੜ ਨੇ ਇੱਕ ਪਾਸਾ ਸੰਭਾਲਿਆ ਤੇ ਟੀਮ ਨੂੰ ਸਨਮਾਨਜਨਕ ਸਕੋਰ ਤੱਕ ਪਹੁੰਚਾਉਣ 'ਚ ਅਹਿਮ ਭੂਮਿਕਾ ਨਿਭਾਈ। ਉਨ੍ਹਾਂ ਨੇ 49 ਗੇਂਦਾਂ 'ਚ ਆਪਣਾ ਅਰਧ ਸੈਂਕੜਾ ਪੂਰਾ ਕੀਤਾ। ਇਸ ਤੋਂ ਪਹਿਲਾਂ ਇਸ ਸੀਜ਼ਨ ਦਾ ਸਭ ਤੋਂ ਹੌਲੀ ਅਰਧ ਸੈਂਕੜਾ ਰਿਸ਼ਭ ਪੰਤ (43 ਗੇਂਦਾਂ) ਦੇ ਨਾਂ ਸੀ।

ਗਾਇਕਵਾੜ ਨੇ ਆਪਣੀ ਇਸ ਜ਼ਿੰਮੇਵਾਰੀ ਭਰੀ ਪਾਰੀ ਦੌਰਾਨ ਕੁੱਲ 60 ਗੇਂਦਾਂ ਖੇਡੀਆਂ ਅਤੇ ਅਜੇਤੂ 74 ਦੌੜਾਂ ਬਣਾਈਆਂ, ਜਿਸ ਵਿੱਚ 6 ਚੌਕੇ ਅਤੇ 4 ਛੱਕੇ ਸ਼ਾਮਲ ਸਨ। ਦਿਲਚਸਪ ਗੱਲ ਇਹ ਹੈ ਕਿ ਇਸ ਸੀਜ਼ਨ ਦੀਆਂ ਪਿਛਲੀਆਂ ਸੱਤ ਪਾਰੀਆਂ ਵਿੱਚ ਗਾਇਕਵਾੜ ਇੱਕ ਵਾਰ ਵੀ 30 ਦੌੜਾਂ ਦਾ ਅੰਕੜਾ ਪਾਰ ਨਹੀਂ ਕਰ ਸਕੇ ਸਨ, ਜਿਸ ਕਾਰਨ ਇਹ ਪਾਰੀ ਹੋਰ ਵੀ ਮਹੱਤਵਪੂਰਨ ਸੀ।

ਚੇਨਈ ਦੀ ਹੌਲੀ ਬੱਲੇਬਾਜ਼ੀ
ਇਸ ਮੈਚ ਵਿੱਚ ਸਿਰਫ਼ ਗਾਇਕਵਾੜ ਹੀ ਨਹੀਂ, ਸਗੋਂ ਪੂਰੀ ਚੇਨਈ ਟੀਮ ਸੰਘਰਸ਼ ਕਰਦੀ ਨਜ਼ਰ ਆਈ। ਟੀਮ ਨੂੰ ਆਪਣੀਆਂ ਪਹਿਲੀਆਂ 50 ਦੌੜਾਂ ਬਣਾਉਣ ਲਈ 72 ਗੇਂਦਾਂ (12 ਓਵਰ) ਲੱਗੀਆਂ। ਇਹ ਆਈਪੀਐਲ ਇਤਿਹਾਸ ਵਿੱਚ ਚੇਨਈ ਦਾ ਦੂਜਾ ਸਭ ਤੋਂ ਹੌਲੀ ਅਰਧ ਸੈਂਕੜਾ (ਟੀਮ ਸਕੋਰ ਵਜੋਂ) ਹੈ। ਇਸ ਤੋਂ ਪਹਿਲਾਂ 2011 ਵਿੱਚ ਆਰਸੀਬੀ ਦੇ ਖਿਲਾਫ ਉਨ੍ਹਾਂ ਨੇ 12.1 ਓਵਰਾਂ ਵਿੱਚ 50 ਦੌੜਾਂ ਬਣਾਈਆਂ ਸਨ। ਹਾਲਾਂਕਿ ਗਾਇਕਵਾੜ ਦੀ ਪਾਰੀ ਕਾਫੀ ਹੌਲੀ ਰਹੀ, ਪਰ ਗੁਜਰਾਤ ਟਾਈਟਨਸ ਦੀ ਘਾਤਕ ਗੇਂਦਬਾਜ਼ੀ ਅੱਗੇ ਉਨ੍ਹਾਂ ਦੀ ਇਸ ਅਰਧ ਸੈਂਕੜੇ ਵਾਲੀ ਪਾਰੀ ਨੇ ਹੀ ਚੇਨਈ ਨੂੰ ਪੂਰੀ ਤਰ੍ਹਾਂ ਖੇਰੂ-ਖੇਰੂ ਹੋਣ ਤੋਂ ਬਚਾਇਆ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e