ਆਖਰੀ ਏਸ਼ੇਜ਼ ਟੈਸਟ ਜਿੱਤ ਕੇ ਆਸਟਰੇਲੀਆਈ ਕਪਤਾਨ ਦੇ ਨਾਂ ਦਰਜ ਹੋ ਸਕਦਾ ਹੈ ਇਹ ਵੱਡਾ ਰਿਕਾਰਡ

ਸਪੋਰਟਸ ਡੈਸਕ— ਇੰਗਲੈਂਡ ਖਿਲਾਫ ਏਸ਼ੇਜ ਸੀਰੀਜ਼ ਦੇ ਪੰਜਵੇਂ ਅਤੇ ਆਖਰੀ ਮੈਚ 'ਚ ਜਿੱਤ ਦਰਜ ਕਰਨ ਦੇ ਨਾਲ ਹੀ ਆਸਟਰੇਲਿਆਈ ਕਪਤਾਨ ਟਿਮ ਪੇਨ ਉਹ ਉਪਲੱਬਧੀ ਹਾਸਲ ਕਰ ਲੈਣਗੇ ਜੋ ਗਰੈਗ ਚੈਪਲ, ਰਿੱਕੀ ਪੋਂਟਿੰਗ ਅਤੇ ਮਾਈਕਲ ਕਲਾਰਕ ਜਿਹੇ ਸਾਬਕਾ ਦਿੱਗਜ ਵੀ ਹਾਸਲ ਨਹੀਂ ਕਰ ਸਕੇ। ਆਸਟਰੇਲੀਆ ਜੇਕਰ ਵੀਰਵਾਰ ਨੂੰ ਕੇਨਿੰਗਟਨ ਓਵਲ 'ਚ ਹੋਣ ਵਾਲੇ ਪੰਜਵੇਂ ਟੈਸਟ 'ਚ ਜਿੱਤ ਹਾਸਲ ਕਰ ਲੈਂਦੀ ਹੈ ਤਾਂ ਪੇਨ ਇੰਗਲੈਂਡ 'ਚ ਏਸ਼ੇਜ਼ ਸੀਰੀਜ਼ ਜਿੱਤਣ ਵਾਲੇ ਦੂਜੇ ਕਪਤਾਨ ਬਣੇ ਜਾਣਗੇ। 18 ਸਾਲ ਪਹਿਲਾਂ ਸਟੀਵ ਜਾਂ ਦੀ ਕਪਤਾਨੀ 'ਚ ਆਸਟਰੇਲੀਆ ਨੇ ਇੰਗਲੈਂਡ ਨੂੰ ਉਸ ਦੇ ਘਰ 'ਚ 4-1 ਤੋਂ ਏਸ਼ੇਜ਼ ਸੀਰੀਜ਼ ਹਰਾਈ ਸੀ। ਜਿਸ ਤੋਂ ਬਾਅਦ ਤੋਂ ਕੋਈ ਕੰਗਾਰੂ ਕਪਤਾਨ ਇਸ ਕੀਰਤੀਮਾਨ ਨੂੰ ਹਾਸਲ ਨਹੀਂ ਕਰ ਪਾਇਆ ਹੈ।
ਆਸਟਰੇਲੀਆਈ ਕ੍ਰਿਕਟ ਇਤਿਹਾਸ 'ਚ ਆਪਣਾ ਨਾਂ ਦਰਜ ਕਰਾਉਣ ਦੇ ਬੇਹੱਦ ਕਰੀਬ ਖੜੇ ਪੇਨ ਨੇ ਸ਼ਾਇਦ ਕਦੇ ਨਹੀਂ ਸੋਚਿਆ ਹੋਵੇਗਾ ਕਿ ਉਹ ਕਦੇ ਇਸ ਵੱਡੇ ਰਿਕਾਰਡ ਦੇ ਕਰੀਬ ਪਹੁੰਚ ਸਕਣਗੇ। ਜਿਨ੍ਹਾਂ ਹਾਲਾਤਾਂ 'ਚ ਉਨ੍ਹਾਂ ਨੇ ਆਸਟਰੇਲੀਆ ਟੀਮ ਦੀ ਕਮਾਨ ਸਾਂਭਾਲੀ ਉਹ ਸਧਾਰਣ ਨਹੀਂ ਕਹੇ ਜਾ ਸਕਦੇ। ਦੱਖਣੀ ਅਫਰੀਕਾ ਦੌਰੇ 'ਤੇ ਖੇਡੇ ਗਏ ਕੇਪਟਾਊਨ ਟੈਸਟ 'ਚ ਹੋਏ ਬਾਲ ਟੈਂਪਰਿੰਗ ਵਿਵਾਦ ਤੋਂ ਬਾਅਦ ਸਟੀਵ ਸਮਿਥ ਨੂੰ ਕਪਤਾਨ ਅਤੇ ਡੇਵਿਡ ਵਾਰਨਰ ਨੂੰ ਉਪ-ਕਪਤਾਨੀ ਦੇ ਅਹੁਦੇ ਤੋਂ ਹਟਾਏ ਜਾਣ ਤੋਂ ਬਾਅਦ ਕ੍ਰਿਕਟ ਆਸਟਰੇਲੀਆ ਨੇ ਪੇਨ ਨੂੰ ਟੀਮ ਦੀ ਕਪਤਾਨੀ ਸੌਂਪ ਦਿੱਤੀ।

ਸਾਲ 2010 'ਚ ਪਾਕਿਸਤਾਨ ਖਿਲਾਫ ਲਾਰਡਸ ਟੈਸਟ ਤੋਂ ਡੈਬਿਊ ਕਰਨ ਵਾਲੇ ਪੇਨ ਸਾਲ 2017 'ਚ ਸੰਨਿਆਸ ਲੈ ਕੇ ਕ੍ਰਿਕਟ ਦਾ ਸਮਾਨ ਬਣਾਉਣ ਵਾਲੀ ਕੰਪਨੀ 'ਚ ਨੌਕਰੀ ਕਰਨ ਦੇ ਬਾਰੇ 'ਚ ਸੋਚ ਰਹੇ ਸਨ। ਪਰ ਸਮਿਥ ਅਤੇ ਵਾਰਨਰ 'ਤੇ ਲੱਗੇ ਇਕ ਸਾਲ ਦੇ ਬੈਨ ਨੇ ਉਨ੍ਹਾਂ ਦੀ ਕਿਸਮਤ ਪਲਟ ਦਿੱਤੀ।
ਮੈਨਚੇਸਟਰ 'ਚ ਇੰਗਲੈਂਡ ਖਿਲਾਫ ਏਸ਼ੇਜ਼ ਦੇ ਚੌਥੇ ਟੈਸਟ 'ਚ 185 ਦੌੜਾਂ ਨਾਲ ਜਿੱਤ ਦਰਜ ਕਰ ਏਸ਼ੇਜ ਰੀਟੇਨ ਕਰਨ ਤੋਂ ਬਾਅਦ ਜਦ ਪੇਨ ਤੋਂ ਪੁੱਛਿਆ ਗਿਆ ਇਹ ਜਿੱਤ ਨਿਜੀ ਤੌਰ 'ਤੇ ਉਨ੍ਹਾਂ ਦੇ ਲਈ ਕੀ ਮਾਇਨੇ ਰੱਖਦੀ ਹੈ ਤਾਂ ਕਪਤਾਨ ਨੇ ਕਿਹਾ,“ਮੇਰਾ ਸੁਪਨਾ ਇੱਥੇ ਆ ਕੇ ਏਸ਼ੇਜ ਜਿੱਤਣ ਦਾ ਸੀ। ਮੈਂ ਨਿਸ਼ਚਿਤ ਰੂਪ ਨਾਲ ਏਸ਼ੇਜ ਜਿੱਤਣ ਵਾਲਾ ਕਪਤਾਨ ਨਹੀਂ ਬਣਨਾ ਚਾਹੁੰਦਾ ਸੀ। ਮੈਂ ਸਿਰਫ ਇਸ ਦਾ ਹਿੱਸਾ ਬਣ ਕੇ ਹੀ ਖੁਸ਼ ਹਾਂ, ਮੈਂ ਸ਼ਾਇਦ ਕੂਕਾਬੁਰਾ 'ਚ ਕੰਮ ਕਰ ਰਿਹਾ ਹੁੰਦਾ ਤਾਂ ਇਹ ਓਨਾ ਬੁਰਾ ਨਹੀਂ ਹੈ। ”