ਦੂਜੇ ਵਿਆਹ ਦੇ ਇਕ ਹਫ਼ਤੇ ਅੰਦਰ ਹੀ ਧਵਨ ਨੂੰ ਮਿਲੀ Good News ! ਮਿਲਣਗੇ 5.72 ਕਰੋੜ ਰੁਪਏ
Wednesday, Feb 25, 2026 - 01:42 PM (IST)
ਨਵੀਂ ਦਿੱਲੀ : ਭਾਰਤੀ ਕ੍ਰਿਕਟਰ ਸ਼ਿਖਰ ਧਵਨ ਨੂੰ ਦਿੱਲੀ ਦੀ ਪਟਿਆਲਾ ਹਾਊਸ ਕੋਰਟ (ਫੈਮਿਲੀ ਕੋਰਟ) ਤੋਂ ਇੱਕ ਵੱਡੀ ਕਾਨੂੰਨੀ ਜਿੱਤ ਹਾਸਲ ਹੋਈ ਹੈ। ਅਦਾਲਤ ਨੇ ਧਵਨ ਦੀ ਸਾਬਕਾ ਪਤਨੀ ਆਇਸ਼ਾ ਮੁਖਰਜੀ ਨੂੰ ਲਗਭਗ 5.72 ਕਰੋੜ ਰੁਪਏ (AU $812,397.50 ਅਤੇ AU $82,000) ਵਾਪਸ ਕਰਨ ਦੇ ਹੁਕਮ ਦਿੱਤੇ ਹਨ।
ਆਸਟ੍ਰੇਲੀਆਈ ਅਦਾਲਤ ਦੇ ਹੁਕਮ ਭਾਰਤੀ ਕਾਨੂੰਨ ਦੇ ਖਿਲਾਫ
ਜੱਜ ਦੇਵੇਂਦਰ ਕੁਮਾਰ ਗਰਗ ਨੇ ਆਪਣੇ ਫੈਸਲੇ ਵਿੱਚ ਕਿਹਾ ਕਿ ਆਸਟ੍ਰੇਲੀਆ ਦੀ ਇੱਕ ਫੈਮਿਲੀ ਕੋਰਟ ਦੁਆਰਾ 'ਪ੍ਰਾਪਰਟੀ ਸੈਟਲਮੈਂਟ' ਦੇ ਤਹਿਤ ਦਿੱਤੇ ਗਏ ਹੁਕਮ ਭਾਰਤੀ ਕਾਨੂੰਨਾਂ ਅਤੇ ਖਾਸ ਕਰਕੇ ਹਿੰਦੂ ਮੈਰਿਜ ਐਕਟ ਦੇ ਵਿਰੁੱਧ ਹਨ। ਅਦਾਲਤ ਨੇ ਸਪੱਸ਼ਟ ਕੀਤਾ ਕਿ ਵਿਦੇਸ਼ੀ ਅਦਾਲਤ ਦਾ ਅਜਿਹਾ ਕੋਈ ਵੀ ਹੁਕਮ ਜੋ ਭਾਰਤੀ 'ਪਬਲਿਕ ਪਾਲਿਸੀ' ਜਾਂ ਰਜਿਸਟ੍ਰੇਸ਼ਨ ਅਤੇ ਟ੍ਰਾਂਸਫਰ ਆਫ ਪ੍ਰਾਪਰਟੀ ਐਕਟ ਦੇ ਉਲਟ ਹੋਵੇ, ਉਹ ਭਾਰਤ ਵਿੱਚ ਲਾਗੂ ਨਹੀਂ ਕੀਤਾ ਜਾ ਸਕਦਾ।
ਧਮਕੀਆਂ ਅਤੇ ਧੋਖਾਧੜੀ ਦਾ ਖੁਲਾਸਾ
ਸੁਣਵਾਈ ਦੌਰਾਨ ਸ਼ਿਖਰ ਧਵਨ ਨੇ ਅਦਾਲਤ ਨੂੰ ਦੱਸਿਆ ਕਿ ਉਹ ਆਸਟ੍ਰੇਲੀਆਈ ਅਦਾਲਤ ਦੇ ਸਾਹਮਣੇ ਆਪਣੀ ਮਰਜ਼ੀ ਨਾਲ ਪੇਸ਼ ਨਹੀਂ ਹੋਏ ਸਨ, ਸਗੋਂ ਉਨ੍ਹਾਂ ਦੀ ਸਾਬਕਾ ਪਤਨੀ ਨੇ ਉਨ੍ਹਾਂ ਨੂੰ ਬਦਨਾਮ ਕਰਨ ਅਤੇ ਕਰੀਅਰ ਖ਼ਤਮ ਕਰਨ ਦੀ ਧਮਕੀ ਦਿੱਤੀ ਸੀ। ਅਦਾਲਤ ਨੇ ਮੰਨਿਆ ਕਿ ਵਿੱਤੀ ਸਮਝੌਤਿਆਂ ਨਾਲ ਜੁੜੇ ਦਸਤਾਵੇਜ਼ ਧਮਕੀਆਂ, ਜ਼ਬਰਦਸਤੀ ਅਤੇ ਧੋਖਾਧੜੀ ਕਾਰਨ ਕੀਤੇ ਗਏ ਸਨ, ਜਿਸ ਕਾਰਨ ਇਨ੍ਹਾਂ ਨੂੰ ਰੱਦ ਮੰਨਿਆ ਗਿਆ ਹੈ।
9 ਫੀਸਦੀ ਵਿਆਜ ਨਾਲ ਮੋੜਨੀ ਪਵੇਗੀ ਰਕਮ
ਅਦਾਲਤ ਨੇ ਇਹ ਵੀ ਹੁਕਮ ਦਿੱਤਾ ਹੈ ਕਿ ਸਾਬਕਾ ਪਤਨੀ ਨੂੰ ਉਪਰੋਕਤ ਰਕਮ 'ਤੇ ਕੇਸ ਦਾਇਰ ਕਰਨ ਦੀ ਮਿਤੀ ਤੋਂ ਲੈ ਕੇ ਰਕਮ ਦੀ ਵਾਪਸੀ ਤੱਕ 9 ਫੀਸਦੀ ਸਾਲਾਨਾ ਵਿਆਜ ਵੀ ਦੇਣਾ ਪਵੇਗਾ। ਇਸ ਤੋਂ ਇਲਾਵਾ, ਅਦਾਲਤ ਨੇ ਆਇਸ਼ਾ ਨੂੰ ਆਸਟ੍ਰੇਲੀਆਈ ਅਦਾਲਤ ਦੇ ਪੁਰਾਣੇ ਹੁਕਮਾਂ ਦੇ ਹਵਾਲੇ ਨਾਲ ਧਵਨ ਤੋਂ ਹੋਰ 16.9 ਕਰੋੜ ਰੁਪਏ ਦੀ ਮੰਗ ਨਾ ਕਰਨ ਦਾ ਵੀ ਆਦੇਸ਼ ਦਿੱਤਾ ਹੈ।
ਜ਼ਿਕਰਯੋਗ ਹੈ ਕਿ ਸ਼ਿਖਰ ਧਵਨ ਨੇ ਹਾਲ ਹੀ ਵਿੱਚ ਆਇਰਿਸ਼ ਮਹਿਲਾ ਸੋਫੀ ਸ਼ਾਈਨ ਨਾਲ ਦੂਜਾ ਵਿਆਹ ਕੀਤਾ ਹੈ।
