ਟੀਮ ਇੰਡੀਆ ਦੇ ਨੈਟ ਸੈਸ਼ਨ ਤੋਂ ਆਈ Good News ! T20 WC 'ਚ ਹੁਣ ਪਾਕਿਸਤਾਨ ਦੀ ਰੇਲ ਬਣਨੀ ਤੈਅ

ਸਪੋਰਟਸ ਡੈਸਕ : ਟੀ-20 ਵਿਸ਼ਵ ਕੱਪ 2026 ਵਿੱਚ ਪਾਕਿਸਤਾਨ ਵਿਰੁੱਧ ਹੋਣ ਵਾਲੇ ਮਹਾਂ-ਮੁਕਾਬਲੇ ਤੋਂ ਪਹਿਲਾਂ ਭਾਰਤੀ ਕ੍ਰਿਕਟ ਪ੍ਰਸ਼ੰਸਕਾਂ ਲਈ ਇੱਕ ਬੇਹੱਦ ਰਾਹਤ ਭਰੀ ਖ਼ਬਰ ਸਾਹਮਣੇ ਆਈ ਹੈ। ਟੀਮ ਇੰਡੀਆ ਦੇ ਸਟਾਰ ਤੇਜ਼ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ ਨੇ ਬੀਮਾਰੀ ਤੋਂ ਉੱਭਰਨ ਤੋਂ ਬਾਅਦ ਨੈੱਟਸ ਵਿੱਚ ਪੂਰੀ ਸਮਰੱਥਾ ਨਾਲ ਗੇਂਦਬਾਜ਼ੀ ਸ਼ੁਰੂ ਕਰ ਦਿੱਤੀ ਹੈ। ਬੁਮਰਾਹ ਦੀ ਇਸ ਵਾਪਸੀ ਨਾਲ 15 ਫਰਵਰੀ ਨੂੰ ਕੋਲੰਬੋ ਵਿੱਚ ਹੋਣ ਵਾਲੇ ਹਾਈ-ਵੋਲਟੇਜ ਮੈਚ ਤੋਂ ਪਹਿਲਾਂ ਪਾਕਿਸਤਾਨੀ ਟੀਮ ਲਈ ਖ਼ਤਰੇ ਦੀ ਘੰਟੀ ਵੱਜ ਚੁੱਕੀ ਹੈ।

ਬੀਮਾਰੀ ਕਾਰਨ ਪਹਿਲੇ ਮੈਚ ਤੋਂ ਰਹੇ ਸਨ ਬਾਹਰ
ਜ਼ਿਕਰਯੋਗ ਹੈ ਕਿ ਜਸਪ੍ਰੀਤ ਬੁਮਰਾਹ ਬੀਮਾਰੀ ਕਾਰਨ ਟੂਰਨਾਮੈਂਟ ਦੇ ਪਹਿਲੇ ਮੈਚ ਦੀ ਪਲੇਇੰਗ-11 ਦਾ ਹਿੱਸਾ ਨਹੀਂ ਬਣ ਸਕੇ ਸਨ ਅਤੇ ਇਸੇ ਕਾਰਨ ਉਨ੍ਹਾਂ ਨੇ ਗੇਂਦਬਾਜ਼ੀ ਤੋਂ ਵੀ ਦੂਰੀ ਬਣਾਈ ਹੋਈ ਸੀ। ਹਾਲਾਂਕਿ, ਹੁਣ ਉਨ੍ਹਾਂ ਨੇ ਮੈਦਾਨ 'ਤੇ ਵਾਪਸੀ ਕਰ ਲਈ ਹੈ। ਨਾਮੀਬੀਆ ਵਿਰੁੱਧ ਦਿੱਲੀ ਵਿੱਚ ਹੋਣ ਵਾਲੇ ਅਗਲੇ ਮੁਕਾਬਲੇ ਤੋਂ ਪਹਿਲਾਂ ਬੁਮਰਾਹ ਸਮੇਤ ਭਾਰਤੀ ਗੇਂਦਬਾਜ਼ਾਂ ਨੇ ਨੈੱਟਸ ਵਿੱਚ ਲਗਭਗ 2 ਘੰਟੇ ਤੱਕ ਪੂਰੀ ਤਾਕਤ ਨਾਲ ਗੇਂਦਬਾਜ਼ੀ ਦਾ ਅਭਿਆਸ ਕੀਤਾ। ਕਪਤਾਨ ਸੂਰਿਆਕੁਮਾਰ ਯਾਦਵ ਦੀ ਅਗਵਾਈ ਵਿੱਚ ਭਾਰਤੀ ਟੀਮ ਨੇ ਪਹਿਲਾਂ ਹੀ ਜਿੱਤ ਨਾਲ ਟੂਰਨਾਮੈਂਟ ਦਾ ਸ਼ਾਨਦਾਰ ਆਗਾਜ਼ ਕੀਤਾ ਹੈ ਅਤੇ ਹੁਣ ਬੁਮਰਾਹ ਦੀ ਮੌਜੂਦਗੀ ਟੀਮ ਦੇ ਹੌਸਲੇ ਹੋਰ ਬੁਲੰਦ ਕਰੇਗੀ।

🏏🇮🇳 pic.twitter.com/3iLlCKV9FF

— Jasprit Bumrah (@Jaspritbumrah93) February 11, 2026

ਪਾਕਿਸਤਾਨ ਵਿਰੁੱਧ ਬੁਮਰਾਹ ਦਾ ਘਾਤਕ ਰਿਕਾਰਡ 
ਅੰਕੜੇ ਗਵਾਹੀ ਦਿੰਦੇ ਹਨ ਕਿ ਪਾਕਿਸਤਾਨ ਵਿਰੁੱਧ ਜਸਪ੍ਰੀਤ ਬੁਮਰਾਹ ਦਾ ਪ੍ਰਦਰਸ਼ਨ ਹਮੇਸ਼ਾ ਹੀ ਬੇਮਿਸਾਲ ਰਹਿੰਦਾ ਹੈ। ਉਨ੍ਹਾਂ ਨੇ ਪਾਕਿਸਤਾਨ ਵਿਰੁੱਧ ਹੁਣ ਤੱਕ 7 ਮੈਚਾਂ ਵਿੱਚ 9 ਵਿਕਟਾਂ ਹਾਸਲ ਕੀਤੀਆਂ ਹਨ, ਜਿਸ ਵਿੱਚ ਉਨ੍ਹਾਂ ਦੀ ਔਸਤ 19.33 ਰਹੀ ਹੈ। ਆਪਣੇ ਟੀ-20 ਅੰਤਰਰਾਸ਼ਟਰੀ ਕਰੀਅਰ ਵਿੱਚ ਬੁਮਰਾਹ ਹੁਣ ਤੱਕ 87 ਮੈਚਾਂ ਵਿੱਚ 107 ਵਿਕਟਾਂ ਝਟਕਾ ਚੁੱਕੇ ਹਨ। ਜਿੱਥੇ ਭਾਰਤ ਆਪਣਾ ਅਗਲਾ ਮੈਚ ਨਾਮੀਬੀਆ ਵਿਰੁੱਧ ਖੇਡੇਗਾ, ਉੱਥੇ ਹੀ ਟੀਮ ਦੀ ਅਸਲੀ ਪ੍ਰੀਖਿਆ ਕੋਲੰਬੋ ਵਿੱਚ ਹੋਵੇਗੀ, ਜਿਸ ਲਈ ਪਾਕਿਸਤਾਨੀ ਟੀਮ ਨੇ ਵੀ ਹੁਣ ਹਰੀ ਝੰਡੀ ਦਿਖਾ ਦਿੱਤੀ ਹੈ।