ਤੀਰਅੰਦਾਜ਼ੀ ਵਿਸ਼ਵ ਕੱਪ 2026 ''ਚ ਸਾਹਿਲ ਜਾਧਵ ਨੇ ਜਿੱਤਿਆ ਕਾਂਸੀ ਦਾ ਤਮਗਾ

ਸ਼ੰਘਾਈ (ਚੀਨ) : ਭਾਰਤ ਦੇ 25 ਸਾਲਾ ਤੀਰਅੰਦਾਜ਼ ਸਾਹਿਲ ਜਾਧਵ ਨੇ ਸ਼ਨੀਵਾਰ ਨੂੰ ਤੀਰਅੰਦਾਜ਼ੀ ਵਿਸ਼ਵ ਕੱਪ 2026 (ਸਟੇਜ 2) ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਪੁਰਸ਼ਾਂ ਦੇ ਵਿਅਕਤੀਗਤ ਕੰਪਾਊਂਡ ਵਰਗ ਵਿੱਚ ਕਾਂਸੀ ਦਾ ਤਮਗਾ ਜਿੱਤ ਕੇ ਦੇਸ਼ ਦਾ ਨਾਮ ਰੌਸ਼ਨ ਕੀਤਾ ਹੈ। ਸਾਹਿਲ ਦਾ ਇਹ ਪਹਿਲਾ ਤੀਰਅੰਦਾਜ਼ੀ ਵਿਸ਼ਵ ਕੱਪ ਤਮਗਾ ਹੈ।

ਡੈਨਮਾਰਕ ਦੇ ਦਿੱਗਜ ਨੂੰ ਦਿੱਤੀ ਮਾਤ 
ਕਾਂਸੀ ਦੇ ਤਮਗੇ ਲਈ ਹੋਏ ਮੁਕਾਬਲੇ ਵਿੱਚ ਸਾਹਿਲ ਨੇ ਡੈਨਮਾਰਕ ਦੇ ਤਜਰਬੇਕਾਰ ਤੀਰਅੰਦਾਜ਼ ਮਾਰਟਿਨ ਡੈਮਸਬੋ ਨੂੰ 147-144 ਦੇ ਫਰਕ ਨਾਲ ਹਰਾਇਆ। ਮੁਕਾਬਲੇ ਦੀ ਸ਼ੁਰੂਆਤ ਵਿੱਚ ਸਾਹਿਲ 30-29 ਨਾਲ ਪਿੱਛੇ ਚੱਲ ਰਹੇ ਸਨ, ਪਰ ਉਨ੍ਹਾਂ ਨੇ ਹੌਲੀ-ਹੌਲੀ ਵਾਪਸੀ ਕੀਤੀ ਅਤੇ ਅਗਲੇ ਚਾਰ ਸੈੱਟਾਂ ਵਿੱਚ ਲੀਡ ਬਣਾ ਕੇ ਜਿੱਤ ਦਰਜ ਕੀਤੀ।

ਵਿਸ਼ਵ ਚੈਂਪੀਅਨਾਂ ਵਿਰੁੱਧ ਰੋਮਾਂਚਕ ਜੰਗ 

ਸਾਹਿਲ ਜਾਧਵ ਨੇ ਤਮਗਾ ਜਿੱਤਣ ਤੱਕ ਦਾ ਸਫ਼ਰ ਬਹੁਤ ਹੀ ਚੁਣੌਤੀਪੂਰਨ ਰਿਹਾ:

ਕੁਆਰਟਰ ਫਾਈਨਲ ਵਿਚ ਉਨ੍ਹਾਂ ਨੇ 2021 ਦੇ ਵਿਸ਼ਵ ਚੈਂਪੀਅਨ ਆਸਟ੍ਰੀਆ ਦੇ ਨਿਕੋ ਵੀਨਰ ਨੂੰ ਸ਼ੂਟ-ਆਫ ਵਿੱਚ ਹਰਾ ਕੇ ਉਲਟਫੇਰ ਕੀਤਾ। ਸੈਮੀਫਾਈਨਲ ਵਿਚ ਉਨ੍ਹਾਂ ਦਾ ਸਾਹਮਣਾ ਮੌਜੂਦਾ ਵਿਸ਼ਵ ਚੈਂਪੀਅਨ ਫਰਾਂਸ ਦੇ ਨਿਕੋਲਸ ਗਿਰਾਰਡ ਨਾਲ ਹੋਇਆ, ਜਿੱਥੇ ਸਾਹਿਲ ਨੂੰ 147-145 ਦੇ ਕਰੀਬੀ ਫਰਕ ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ।

ਸ਼ੁਰੂਆਤੀ ਰਾਊਂਡ 'ਚ ਸਾਹਿਲ ਨੇ ਤੀਜੇ ਦੌਰ ਵਿੱਚ ਭਾਰਤ ਦੇ ਦਿੱਗਜ ਤੀਰਅੰਦਾਜ਼ ਅਭਿਸ਼ੇਕ ਵਰਮਾ ਨੂੰ ਅਤੇ 'ਰਾਊਂਡ ਆਫ 16' ਵਿੱਚ ਜਰਮਨੀ ਦੇ ਰੂਵੇਨ ਫਲੂਸ ਨੂੰ ਮਾਤ ਦਿੱਤੀ ਸੀ।

ਭਾਰਤ ਦਾ ਇਕਲੌਤਾ ਤਮਗਾ ਹਾਲਾਂਕਿ ਪਿਛਲੇ ਸਾਲ ਭਾਰਤ ਨੇ ਸ਼ੰਘਾਈ ਵਿੱਚ ਪੰਜ ਕੰਪਾਊਂਡ ਤਮਗੇ ਜਿੱਤੇ ਸਨ, ਪਰ ਇਸ ਵਾਰ ਸਾਹਿਲ ਜਾਧਵ ਦਾ ਇਹ ਕਾਂਸੀ ਦਾ ਤਮਗਾ ਭਾਰਤ ਦਾ ਇਕਲੌਤਾ ਤਮਗਾ ਰਿਹਾ। ਭਾਰਤ ਦੇ ਹੋਰ ਪ੍ਰਮੁੱਖ ਖਿਡਾਰੀਆਂ ਦਾ ਪ੍ਰਦਰਸ਼ਨ ਨਿਰਾਸ਼ਾਜਨਕ ਰਿਹਾ।