ਟੁੱਟੀਆਂ ਚੱਪਲਾਂ ਤੋਂ ਏਸ਼ੀਅਨ ਪੋਡੀਅਮ ਤਕ, ਡਿਸਕਸ ਥ੍ਰੋਅਰ ਭਰਤਪ੍ਰੀਤ ਸਿੰਘ ਨੇ ਜਿੱਤਿਆ ਕਾਂਸੀ ਤਮਗਾ

ਬਟਾਲਾ : ਹਰੇਕ ਮੈਡਲ ਦੇ ਪਿੱਛੇ ਇੱਕ ਕਹਾਣੀ ਹੁੰਦੀ ਹੈ, ਪਰ ਚੀਨ ਵਿੱਚ ਖੇਡੀ ਗਈ 'ਏਸ਼ੀਅਨ ਅੰਡਰ-23 ਅਥਲੈਟਿਕਸ ਚੈਂਪੀਅਨਸ਼ਿਪ' ਦੇ ਡਿਸਕਸ ਥ੍ਰੋਅ ਈਵੈਂਟ ਵਿੱਚ ਬ੍ਰੋਂਜ਼ (ਕਾਂਸੀ) ਦਾ ਮੈਡਲ ਜਿੱਤਣ ਵਾਲੇ ਭਰਤਪ੍ਰੀਤ ਸਿੰਘ ਦੀ ਕਹਾਣੀ ਸਿਰਫ਼ ਸਖ਼ਤ ਮਿਹਨਤ ਦਾ ਨਤੀਜਾ ਨਹੀਂ, ਸਗੋਂ ਉਸ ਦੇ ਸਮਰਪਣ ਅਤੇ ਪਰਿਵਾਰਕ ਤਿਆਗ ਦੀ ਮਿਸਾਲ ਹੈ। ਬਟਾਲਾ ਦੇ ਨੇੜਲੇ ਪਿੰਡ ਸ਼ਾਹਬਾਦ ਦੇ ਰਹਿਣ ਵਾਲੇ ਭਰਤਪ੍ਰੀਤ ਨੇ ਆਪਣੀ ਖੇਡ ਯਾਤਰਾ ਦੀ ਸ਼ੁਰੂਆਤ ਅੰਤਰਰਾਸ਼ਟਰੀ ਜਿੱਤਾਂ ਦੇ ਸੁਪਨਿਆਂ ਨਾਲ ਨਹੀਂ, ਸਗੋਂ ਆਪਣੀ ਵਿਧਵਾ ਮਾਂ ਦਾ ਆਰਥਿਕ ਬੋਝ ਘਟਾਉਣ ਦੀ ਇੱਕ ਨਿਮਾਣੀ ਜਿਹੀ ਆਸ ਨਾਲ ਕੀਤੀ ਸੀ।

ਭਰਤਪ੍ਰੀਤ ਸਿੰਘ ਨੇ ਕਿਹਾ, "ਮੈਂ ਸੋਚਿਆ ਸੀ ਕਿ ਜੇਕਰ ਮੈਂ ਘਰ ਛੱਡ ਦੇਵਾਂਗਾ ਤਾਂ ਘੱਟੋ-ਘੱਟ ਇੱਕ ਜਣੇ ਦੀ ਰੋਟੀ ਦਾ ਖਰਚਾ ਘਟ ਜਾਵੇਗਾ। ਜਲੰਧਰ 'ਚ ਟਰਾਇਲ ਦੇਣ ਆਇਆ ਤਾਂ ਜੋ ਚੁਣੇ ਜਾਣ 'ਤੇ ਖਾਣਾ ਤੇ ਰਹਿਣਾ ਫ੍ਰੀ ਮਿਲ ਸਕੇ ਅਤੇ ਮਾਂ 'ਤੇ ਭੈਣ ਦੀ ਪੜ੍ਹਾਈ ਦਾ ਬੋਝ ਘੱਟ ਹੋ ਸਕੇ।"

ਬਚਪਨ 'ਚ ਹੀ ਸਿਰ ਤੋਂ ਉੱਠਿਆ ਪਿਤਾ ਦਾ ਸਾਇਆ
ਜਦੋਂ ਭਰਤਪ੍ਰੀਤ ਮਾਤਰ 8 ਸਾਲ ਦਾ ਸੀ, ਤਾਂ ਉਸ ਦੇ ਪਿਤਾ (ਜੋ ਪੰਜਾਬ ਪੁਲਸ ਵਿੱਚ ਕਾਂਸਟੇਬਲ ਸਨ) ਦਾ ਦਿਹਾਂਤ ਹੋ ਗਿਆ। ਇਸ ਤੋਂ ਬਾਅਦ ਉਸ ਦੀ ਮਾਂ ਨੇ ਮਹਿਜ਼ 8,000 ਰੁਪਏ ਮਹੀਨੇ ਦੀ ਨੌਕਰੀ ਕਰਕੇ ਪਰਿਵਾਰ ਦਾ ਪਾਲਣ-ਪੋਸ਼ਣ ਕੀਤਾ। ਜਦੋਂ ਉਹ ਜਲੰਧਰ ਵਿੱਚ 'ਸੈਂਟਰ ਆਫ਼ ਐਕਸੀਲੈਂਸ' (ਪੰਜਾਬ ਖੇਡ ਵਿਭਾਗ) ਵਿਖੇ ਟਰਾਇਲ ਦੇਣ ਪਹੁੰਚਿਆ, ਤਾਂ ਕੋਚ ਬਲਦੀਪ ਸਿੰਘ ਨੇ ਦੇਖਿਆ ਕਿ ਉਸ ਦੇ ਪੈਰਾਂ ਵਿੱਚ ਟੁੱਟੀਆਂ ਚੱਪਲਾਂ ਸਨ। ਕੋਚ ਬਲਦੀਪ ਸਿੰਘ ਅਨੁਸਾਰ: "ਉਸ ਦਾ ਸਰੀਰਕ ਢਾਂਚਾ ਤਾਂ ਵਧੀਆ ਸੀ, ਪਰ ਆਰਥਿਕ ਹਾਲਤ ਬਹੁਤ ਮਾੜੀ ਸੀ। ਮੈਂ ਜਦੋਂ ਪੁੱਛਿਆ ਤਾਂ ਉਸ ਨੇ ਹੌਲੀ ਜਿਹੇ ਦੱਸਿਆ ਕਿ ਉਸ ਦੇ ਪਿਤਾ ਦਾ ਦਿਹਾਂਤ ਹੋ ਚੁੱਕਾ ਹੈ।"

ਮਾਂ ਦੇ ਗਹਿਣੇ ਅਤੇ ਕੋਚ ਦਾ ਸਾਥ
ਖੇਡਾਂ ਵਿੱਚ ਅੱਗੇ ਵਧਣ ਲਈ ਭਰਤਪ੍ਰੀਤ ਨੂੰ ਜਦੋਂ ਪਹਿਲੀ ਵਾਰ ਪ੍ਰੋਫੈਸ਼ਨਲ ਥ੍ਰੋਇੰਗ ਸ਼ੂਜ਼ (ਖੇਡ ਵਾਲੇ ਜੁੱਤੇ) ਦੀ ਲੋੜ ਪਈ, ਤਾਂ ਉਸ ਦੀ ਮਾਂ ਨੇ ਆਪਣੇ ਸੋਨੇ ਦੇ ਕੰਗਣ ਵੇਚ ਦਿੱਤੇ। ਇਸੇ ਤਰ੍ਹਾਂ, ਜਦੋਂ ਗੁਹਾਟੀ ਵਿਖੇ ਉਸ ਦੀ ਪਹਿਲੀ 'ਜੂਨੀਅਰ ਨੈਸ਼ਨਲ ਚੈਂਪੀਅਨਸ਼ਿਪ' ਸੀ, ਤਾਂ ਕੋਚ ਬਲਦੀਪ ਸਿੰਘ ਨੇ ਉਸ ਲਈ ਏਸੀ ਕੋਚ ਦੀ ਟਿਕਟ ਦਾ ਪ੍ਰਬੰਧ ਕੀਤਾ। ਭਰਤਪ੍ਰੀਤ ਦੱਸਦਾ ਹੈ ਕਿ ਉਸ ਟਿਕਟ ਨੂੰ ਉਸ ਨੇ ਅੱਜ ਵੀ ਸੰਭਾਲ ਕੇ ਰੱਖਿਆ ਹੋਇਆ ਹੈ, ਕਿਉਂਕਿ ਉਸ ਤੋਂ ਬਾਅਦ ਹੀ ਉਸ ਵਿੱਚ ਖੇਡ ਪ੍ਰਤੀ ਗੰਭੀਰਤਾ ਅਤੇ ਮਿਹਨਤ ਕਰਨ ਦਾ ਜਜ਼ਬਾ ਜਾਗਿਆ।

ਕਾਮਯਾਬੀ ਦਾ ਸਫ਼ਰ ਅਤੇ ਅਗਲਾ ਸੁਪਨਾ
ਭਰਤਪ੍ਰੀਤ ਨੇ ਇਸ ਤੋਂ ਪਹਿਲਾਂ 2023 ਏਸ਼ੀਅਨ ਅੰਡਰ-20 ਅਥਲੈਟਿਕਸ ਚੈਂਪੀਅਨਸ਼ਿਪ ਵਿੱਚ ਗੋਲਡ ਮੈਡਲ ਜਿੱਤਿਆ ਸੀ। ਹੁਣ ਉਹ ਭਾਰਤੀ ਨੌਸੈਨਾ (Indian Navy) ਵਿੱਚ ਪੈਟੀ ਅਫ਼ਸਰ (Petty Officer) ਵਜੋਂ ਸੇਵਾ ਨਿਭਾ ਰਿਹਾ ਹੈ। ਹਾਲਾਂਕਿ, ਉਸ ਦਾ ਸਭ ਤੋਂ ਵੱਡਾ ਸੁਪਨਾ ਮੈਡਲਾਂ ਨਾਲ ਨਹੀਂ, ਸਗੋਂ ਆਪਣੇ ਪਰਿਵਾਰ ਨਾਲ ਜੁੜਿਆ ਹੋਇਆ ਹੈ। ਉਸ ਦੀ ਮਾਂ ਅੱਜ ਵੀ ਲਗਭਗ 13,000 ਰੁਪਏ ਮਹੀਨੇ 'ਤੇ ਕੰਮ ਕਰਦੀ ਹੈ। ਪਰਿਵਾਰ ਅਜੇ ਵੀ ਕਿਰਾਏ ਦੇ ਮਕਾਨ ਵਿੱਚ ਰਹਿੰਦਾ ਹੈ। ਭਰਤਪ੍ਰੀਤ ਦਾ ਸਭ ਤੋਂ ਵੱਡਾ ਮਕਸਦ ਆਪਣੀ ਮਾਂ ਲਈ ਇੱਕ ਆਪਣਾ ਘਰ ਖਰੀਦਣਾ ਹੈ।