ਰਾਜਸਥਾਨ ਨੇ ਦਿੱਲੀ ਵਿਰੁੱਧ ਟਾਲੀ ਹਾਰ, ਮੈਚ ਡਰਾਅ

ਸਪੋਰਸਟ ਡੈਸਕ— ਮਹਿਪਾਲ ਲੋਮਰੋਰ (118) ਦੇ ਸ਼ਾਨਦਾਰ ਸੈਂਕੜੇ ਅਤੇ ਰਿਤੂਰਾਜ ਸਿੰਘ (58) ਤੇ ਸਲਮਾਨ ਖਾਨ (ਅਜੇਤੂ 56) ਦੇ ਅਰਧ ਸੈਂਕੜਿਆਂ ਦੀ ਬਦੌਲਤ ਰਾਜਸਥਾਨ ਨੇ ਦਿੱਲੀ ਵਿਰੁੱਧ ਰਣਜੀ ਟਰਾਫੀ ਏਲੀਟ ਗਰੁੱਪ-ਏ ਤੇ ਬੀ ਮੁਕਾਬਲੇ ਦੇ ਚੌਥੇ ਤੇ ਆਖਰੀ ਦਿਨ ਸ਼ਨੀਵਾਰ ਨੂੰ 6 ਵਿਕਟਾਂ 'ਤੇ 345 ਦੌੜਾਂ ਬਣਾ ਕੇ ਮੈਚ ਡਰਾਅ ਕਰਵਾ ਲਿਆ। ਇੱਥੇ ਖੇਡੇ ਗਏ ਮੁਕਾਬਲੇ 'ਚ ਦਿੱਲੀ ਨੂੰ ਪਹਿਲੀ ਪਾਰੀ ਦੀ ਬੜ੍ਹਤ ਦੇ ਆਧਾਰ 'ਤੇ 3 ਅੰਕ ਹਾਸਲ ਹੋਏ, ਜਦਕਿ ਰਾਜਸਥਾਨ ਦੇ ਹਿੱਸੇ 'ਚ ਇਕ ਅੰਕ ਆਇਆ। ਦਿੱਲੀ ਨੇ ਅੱਠ ਮੈਚਾਂ 'ਚੋਂ ਇਹ 5ਵਾਂ ਡਰਾਅ ਖੇਡਿਆ ਤੇ ਉਸ ਨੇ 21 ਅੰਕਾਂ ਨਾਲ ਇਸ ਸੈਸ਼ਨ ਵਿਚ ਆਪਣੀ ਮੁਹਿੰਮ ਖਤਮ ਕੀਤੀ। ਦਿੱਲੀ ਅੰਕ ਸੂਚੀ ਵਿਚ 8ਵੇਂ ਸਥਾਨ 'ਤੇ ਰਹੀ। ਰਾਜਸਥਾਨ ਦਾ 8 ਮੈਚਾਂ 'ਚ ਇਹ ਦੂਜਾ ਡਰਾਅ ਰਿਹਾ ਤੇ ਉਹ 17 ਅੰਕਾਂ ਨਾਲ 12ਵੇਂ ਸਥਾਨ 'ਤੇ ਰਿਹਾ।

ਦਿੱਲੀ ਨੇ ਆਪਣੀ ਪਹਿਲੀ ਪਾਰੀ 'ਚ 623 ਦੌੜਾਂ ਬਣਾਈਆਂ ਸਨ, ਜਦਕਿ ਰਾਜਸਥਾਨ ਦੀ ਟੀਮ ਪਹਿਲੀ ਪਾਰੀ 'ਚ 299 ਦੌੜਾਂ 'ਤੇ ਸਿਮਟ ਗਈ ਸੀ ਤੇ ਉਸ ਨੂੰ ਫਾਲੋਆਨ ਖੇਡਣ ਲਈ ਮਜਬੂਰ ਹੋਣਾ ਪਿਆ ਸੀ। ਰਾਜਸਥਾਨ ਨੇ ਦੂਜੀ ਪਾਰੀ ਵਿਚ ਸਵੇਰੇ 2 ਵਿਕਟਾਂ 'ਤੇ 128 ਦੌੜਾਂ ਤੋਂ ਅੱਗੇ ਖੇਡਣਾ ਸ਼ੁਰੂ ਕੀਤਾ ਤੇ ਉਸ ਨੂੰ ਪਾਰੀ ਦੀ ਹਾਰ ਤੋਂ ਬਚਣ ਲਈ 196 ਦੌੜਾਂ ਬਣਾਉਣੀਆਂ ਸਨ।