ਡਾਕਿਊਮੈਂਟਰੀ ''ਚ ਸਪਾਟ ਫਿਕਸਿੰਗ ਦੇ ਦਾਅਵੇ ਬੇਬੁਨਿਆਦ : ਪੀ.ਸੀ.ਬੀ.
Tuesday, Oct 23, 2018 - 01:02 PM (IST)
ਕਰਾਚੀ— ਪਾਕਿਸਤਾਨ ਕ੍ਰਿਕਟ ਬੋਰਡ ਨੇ ਹਾਲ ਹੀ 'ਚ ਜਾਰੀ ਡਾਕਿਊਮੈਂਟਰੀ 'ਚ ਰਾਸ਼ਟਰੀ ਟੀਮ 'ਤੇ ਲਗਾਏ ਗਏ ਸਪਾਟ ਫਿਕਸਿੰਗ ਦੇ ਦੋਸ਼ਾਂ ਨੂੰ ਬੇਬੁਨਿਆਦ ਦਸਦੇ ਹੋਏ ਕਿਹਾ ਕਿ ਟੀ.ਵੀ. ਚੈਨਲ ਵੱਲੋਂ ਫੁਟੇਜ ਦਿੱਤੇ ਜਾਣ ਦੇ ਬਾਅਦ ਹੀ ਮਾਮਲੇ ਦੀ ਜਾਂਚ ਹੋ ਸਕਦੀ ਹੈ। ਜ਼ਿਕਰਯੋਗ ਹੈ ਕਿ ਅਲ ਜਜ਼ੀਰਾ ਦੀ ਨਵੀਂ ਡਾਕਿਊਮੈਂਟਰੀ 'ਚ ਕਿਹਾ ਗਿਆ ਹੈ ਕਿ ਪਾਕਿਸਤਾਨ ਦੇ ਚਾਰ ਕੌਮਾਂਤਰੀ ਮੈਚ ਫਿਕਸ ਸਨ।
ਪੀ.ਸੀ.ਬੀ. ਨੇ ਕਿਹਾ ਕਿ ਆਈ.ਸੀ.ਸੀ. ਅਤੇ ਉਸ ਦੀ ਭ੍ਰਿਸ਼ਟਾਚਾਰ ਰੋਕੂ ਇਕਾਈ ਦੋਸ਼ਾਂ ਦੀ ਜਾਂਚ ਕਰ ਰਹੀ ਹੈ। ਉਸ ਨੇ ਬਿਆਨ 'ਚ ਕਿਹਾ, ''ਪ੍ਰਸਾਰਕ ਨੇ ਕੋਈ ਸਬੂਤ ਪੇਸ਼ ਨਹੀਂ ਕੀਤੇ ਹਨ। ਇਸ ਲਈ ਇਹ ਸਾਰੇ ਦੋਸ਼ ਬੇਬੁਨਿਆਦ ਹਨ।'' ਇਸ ਤੋਂ ਪਹਿਲਾਂ ਇਕ ਆਜ਼ਾਦ ਕਾਨੂੰਨਸਾਜ਼ ਰਿਟਾਇਰਡ ਜੱਜ ਮਿਲਨ ਹਾਮਿਦ ਫਾਰੂਕ ਨੇ ਟੈਸਟ ਕ੍ਰਿਕਟਰ ਨਾਸਿਰ ਜਮਸ਼ੇਦ 'ਤੇ ਲਗਾਏ ਗਏ 10 ਸਾਲਾਂ ਦੀ ਪਾਬੰਦੀ ਨੂੰ ਸਹੀ ਠਹਿਰਾਇਆ। ਜਮਸ਼ੇਦ ਨੂੰ ਪੀ.ਸੀ.ਬੀ. ਦੇ ਭ੍ਰਿਸ਼ਟਾਚਾਰ ਰੋਕੂ ਟ੍ਰਿਬਿਊਨਲ ਨੇ ਸਪਾਟ ਫਿਕਸਿੰਗ ਦਾ ਦੋਸ਼ੀ ਪਾਇਆ ਸੀ।
