ਜਿੱਤ ਦੀ ਪਟੜੀ ਤੋਂ ਲਹਿ ਗਈ ਪੰਜਾਬ ਕਿੰਗਜ਼ ਦੀ ਗੱਡੀ ! ਲਾ'ਤੀ ਹਾਰ ਦੀ ਹੈਟ੍ਰਿਕ, ਆਖ਼ਿਰ ਕੌਣ ਹੈ ਜ਼ਿੰਮੇਵਾਰ

ਸਪੋਰਟਸ ਡੈਸਕ : ਆਈ.ਪੀ.ਐੱਲ. 2026 ਵਿੱਚ ਸ਼ਾਨਦਾਰ ਸ਼ੁਰੂਆਤ ਕਰਨ ਵਾਲੀ ਪੰਜਾਬ ਕਿੰਗਜ਼ (PBKS) ਦੀ ਟੀਮ ਨੂੰ ਹੁਣ ਲਗਾਤਾਰ ਤੀਜੀ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ। ਸਨਰਾਈਜ਼ਰਜ਼ ਹੈਦਰਾਬਾਦ (SRH) ਵਿਰੁੱਧ ਖੇਡੇ ਗਏ ਇਸ ਮੁਕਾਬਲੇ ਵਿੱਚ ਪੰਜਾਬ ਨੂੰ 33 ਦੌੜਾਂ ਨਾਲ ਹਾਰ ਮਿਲੀ, ਜਿਸ ਕਾਰਨ ਟੀਮ ਅੰਕ ਸੂਚੀ ਵਿੱਚ ਹੇਠਾਂ ਖਿਸਕ ਕੇ ਹੁਣ ਦੂਜੇ ਸਥਾਨ 'ਤੇ ਆ ਗਈ ਹੈ। ਇਸ ਹਾਰ ਦਾ ਸਭ ਤੋਂ ਵੱਡਾ ਜ਼ਿੰਮੇਵਾਰ ਸ਼ਸ਼ਾਂਕ ਸਿੰਘ ਨੂੰ ਮੰਨਿਆ ਜਾ ਰਿਹਾ ਹੈ, ਜਿਸ ਨੇ ਮੈਦਾਨ 'ਤੇ ਨਾ ਸਿਰਫ ਇੱਕ ਆਸਾਨ ਕੈਚ ਟਪਕਾਇਆ, ਬਲਕਿ ਬੱਲੇਬਾਜ਼ੀ ਵਿੱਚ ਵੀ ਬੁਰੀ ਤਰ੍ਹਾਂ ਫਲਾਪ ਰਿਹਾ।

ਕਲਾਸੇਨ ਦਾ 'ਆਸਾਨ' ਕੈਚ ਛੱਡਿਆ 
ਹੈਦਰਾਬਾਦ ਦੀ ਪਾਰੀ ਦੇ 9ਵੇਂ ਓਵਰ ਵਿੱਚ ਜਦੋਂ ਹੈਨਰਿਕ ਕਲਾਸੇਨ ਸਿਰਫ 9 ਦੌੜਾਂ 'ਤੇ ਖੇਡ ਰਹੇ ਸਨ, ਤਾਂ ਯੁਜ਼ਵੇਂਦਰ ਚਹਿਲ ਦੀ ਗੇਂਦ 'ਤੇ ਉਨ੍ਹਾਂ ਨੇ ਇੱਕ ਉੱਚਾ ਸ਼ਾਟ ਖੇਡਿਆ। ਡੀਪ ਬੈਕਵਰਡ ਸਕੁਏਅਰ ਲੈੱਗ 'ਤੇ ਖੜ੍ਹੇ ਸ਼ਸ਼ਾਂਕ ਸਿੰਘ ਕੋਲ ਇੱਕ ਬਹੁਤ ਹੀ ਆਸਾਨ ਕੈਚ ਆਇਆ ਸੀ, ਪਰ ਉਨ੍ਹਾਂ ਨੇ ਇਸ ਨੂੰ ਛੱਡ ਦਿੱਤਾ। ਇਹ ਨਜ਼ਾਰਾ ਦੇਖ ਕੇ ਕਪਤਾਨ ਸ਼੍ਰੇਅਸ ਅਈਅਰ ਅਤੇ ਗੇਂਦਬਾਜ਼ ਚਹਿਲ ਨੂੰ ਵੀ ਯਕੀਨ ਨਹੀਂ ਹੋਇਆ ਕਿ ਸ਼ਸ਼ਾਂਕ ਨੇ ਇੰਨਾ ਆਸਾਨ ਕੈਚ ਛੱਡ ਦਿੱਤਾ ਹੈ। ਇੰਨਾ ਹੀ ਨਹੀਂ, ਬਾਊਂਡਰੀ ਦੇ ਬਹੁਤ ਨੇੜੇ ਹੋਣ ਕਾਰਨ ਗੇਂਦ ਬਾਹਰ ਚਲੀ ਗਈ ਅਤੇ ਹੈਦਰਾਬਾਦ ਨੂੰ ਚਾਰ ਦੌੜਾਂ ਵੀ ਮਿਲ ਗਈਆਂ।

ਜੀਵਨਦਾਨ ਤੋਂ ਬਾਅਦ ਕਲਾਸੇਨ ਦਾ ਤੂਫਾਨ 
ਇਸ ਜੀਵਨਦਾਨ ਦਾ ਫਾਇਦਾ ਉਠਾਉਂਦਿਆਂ ਕਲਾਸੇਨ ਹੋਰ ਵੀ ਹਮਲਾਵਰ ਹੋ ਗਏ ਅਤੇ ਉਨ੍ਹਾਂ ਨੇ 43 ਗੇਂਦਾਂ ਵਿੱਚ 69 ਦੌੜਾਂ ਦੀ ਜ਼ਬਰਦਸਤ ਪਾਰੀ ਖੇਡੀ, ਜਿਸ ਵਿੱਚ 3 ਚੌਕੇ ਅਤੇ 4 ਛੱਕੇ ਸ਼ਾਮਲ ਸਨ। ਕਲਾਸੇਨ ਦੀ ਇਸ ਪਾਰੀ ਦੀ ਬਦੌਲਤ ਸਨਰਾਈਜ਼ਰਜ਼ ਹੈਦਰਾਬਾਦ ਨੇ 235 ਦੌੜਾਂ ਦਾ ਵਿਸ਼ਾਲ ਸਕੋਰ ਖੜ੍ਹਾ ਕੀਤਾ। ਜੇਕਰ ਸ਼ਸ਼ਾਂਕ ਨੇ ਉਹ ਕੈਚ ਫੜ ਲਿਆ ਹੁੰਦਾ, ਤਾਂ ਸ਼ਾਇਦ ਹੈਦਰਾਬਾਦ ਇੰਨਾ ਵੱਡਾ ਸਕੋਰ ਨਾ ਬਣਾ ਸਕਦਾ।

ਬੱਲੇਬਾਜ਼ੀ ਵਿੱਚ ਵੀ ਰਹੇ ਫੇਲ੍ਹ 
ਜਦੋਂ ਪੰਜਾਬ ਦੀ ਟੀਮ ਇੰਨੇ ਵੱਡੇ ਟੀਚੇ ਦਾ ਪਿੱਛਾ ਕਰ ਰਹੀ ਸੀ, ਤਾਂ ਉਮੀਦ ਸੀ ਕਿ ਸ਼ਸ਼ਾਂਕ ਸਿੰਘ ਬੱਲੇ ਨਾਲ ਕੋਈ ਯੋਗਦਾਨ ਪਾਉਣਗੇ। ਪਰ ਉਹ ਸੱਤਵੇਂ ਨੰਬਰ 'ਤੇ ਬੱਲੇਬਾਜ਼ੀ ਕਰਨ ਆਏ ਅਤੇ ਮਹਿਜ਼ 3 ਗੇਂਦਾਂ ਵਿੱਚ 4 ਦੌੜਾਂ ਬਣਾ ਕੇ ਹੀ ਆਊਟ ਹੋ ਗਏ। ਇਸ ਤਰ੍ਹਾਂ ਸ਼ਸ਼ਾਂਕ ਸਿੰਘ ਦੇ ਖ਼ਰਾਬ ਪ੍ਰਦਰਸ਼ਨ ਕਾਰਨ ਪੰਜਾਬ ਕਿੰਗਜ਼ ਦੀ ਜਿੱਤ ਦੀ ਉਮੀਦ ਪੂਰੀ ਤਰ੍ਹਾਂ ਖਤਮ ਹੋ ਗਈ।