ਸ਼ਾਕਿਬ 'ਤੇ ਪਾਬੰਦੀ ਲੱਗਣ ਕਾਰਨ ਮੁਸਤਫਿਜ਼ੁਰ ਦਾ ਦਰਦ ਆਇਆ ਸਾਹਮਣੇ, ਕੀਤਾ ਇਹ ਭਾਵੁਕ ਟਵੀਟ

ਸਪੋਰਟਸ  ਡੈਸਕ : ਬੰਗਲਾਦੇਸ਼ ਦੇ ਸਰਵਸ੍ਰੇਸ਼ਠ ਆਲਰਾਊਂਡਰ ਸ਼ਾਕਿਬ ਅਲ ਹਸਨ 'ਤੇ ਹਾਲ ਹੀ 'ਚ 2 ਸਾਲ ਦੀ ਪਾਬੰਦੀ ਲੱਗੀ ਹੈ ਜਿਸ ਤੋਂ ਬਾਅਦ ਉਸ ਦੇ ਸਾਥੀ ਖਿਡਾਰੀ ਮੁਸਤਫਿਜ਼ੁਰ ਰਹਿਮਾਨ ਨੇ ਦੁੱਖ ਪ੍ਰਗਟਾਇਆ ਹੈ। ਰਹਿਮਾਨ ਨੇ ਸ਼ਾਕਿਬ ਲਈ ਇਕ ਭਾਵੁਕ ਟਵੀਟ ਪੋਸਟ ਕਰਦਿਆਂ ਲਿਖਿਆ ਕਿ ਤੁਹਾਡੇ ਬਿਨਾ ਖੇਡਣ ਦੇ ਬਾਰੇ ਸੋਚਣ 'ਤੇ ਹੀ ਬੁਰਾ ਲੱਗਦਾ ਹੈ। ਮੁਸਤਫਿਜ਼ੁਰ ਨੇ ਆਪਣੀ ਪੋਸਟ ਵਿਚ ਲਿਖਿਆ, ''ਉਮਰ ਪੱਧਰ....ਕੌਮਾਂਤਰੀ.....18 ਸਾਲ ਤੱਕ ਇਕੱਠੇ ਕ੍ਰਿਕਟ ਖੇਡਣਾ.....ਮੈਦਾਨ 'ਤੇ ਤੁਹਾਡੇ ਬਿਨਾ ਖੇਡਣ ਦੇ ਬਾਰੇ ਸੋਚਣ 'ਤੇ ਹੀ ਬੁਰਾ ਲੱਗਦਾ ਹੈ। ਮੈਨੂੰ ਭਰੋਸਾ ਹੈ ਕਿ ਤੁਸੀਂ ਦਮਦਾਰ ਤਰੀਕੇ ਨਾਲ ਜਲਦੀ ਵਾਪਸੀ ਕਰੋਗੇ। ਤੁਹਾਡੇ ਨਾਲ ਮੇਰਾ ਅਤੇ ਪੂਰੀ ਬੰਗਲਾਦੇਸ਼ ਟੀਮ ਦਾ ਸਮਰਥਨ ਹੈ। ਹਮੇਸ਼ਾ ਮਜ਼ਬੂਤ ਬਣੇ ਰਹਿਣਾ ਇੰਸ਼ਾਹਅੱਲਾਹ।''

Don't know what should I say. Still I can't able to believe that we have to play without you. But I know and believe one thing that you will be definitely comeback strongly. We will be waiting for the day @Sah75official bhai. #WeAreWithShakib pic.twitter.com/Obk4IosNgc

— Mustafizur Rahman (@Mustafiz90) October 30, 2019

ਇਸ ਤੋਂ ਇਲਾਵਾ ਬੰਗਲਾਦੇਸ਼ ਦੀ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਵੀ ਕਹਿ ਚੁੱਕੀ ਹੈ ਕਿ ਸਟਾਰ ਕ੍ਰਿਕਟਰ ਸ਼ਾਕਿਬ ਹਸਨ ਨੇ ਬੁਕੀ ਵੱਲੋਂ ਉਸ ਦੇ ਨਾਲ ਸੰਪਰਕ ਕਰਨ ਦੀ ਗੱਲ ਲੁਕਾ ਕੇ ਗਲਤੀ ਕੀਤੀ ਪਰ ਉਸ ਨੂੰ ਆਪਣੀ ਇਸ ਗਲਤੀ ਦਾ ਅਹਿਸਾਸ ਹੈ। ਆਈ. ਸੀ. ਸੀ. ਦੇ ਫੈਸਲੇ ਬਾਰੇ ਸਰਕਾਰ ਕੁਝ ਨਹੀਂ ਕਰ ਸਕਦੀ ਪਰ ਬੰਗਲਾਦੇਸ਼ ਕ੍ਰਿਕਟ ਬੋਰਡ ਅਤੇ ਪੂਰਾ ਬੰਗਲਾਦੇਸ਼ ਉਸ ਦੇ ਨਾਲ ਹੈ। ਜਾਣਕਾਰੀ ਲੁਕਾਉਣ ਕਾਰਨ ਕੌਮਾਂਤਰੀ ਕ੍ਰਿਕਟ ਪਰੀਸ਼ਦ ਨੇ ਮੰਗਲਵਾਰ ਨੂੰ ਇਕ ਵੱਡਾ ਫੈਸਲਾ ਲੈਂਦਿਆਂ ਉਸ 'ਤੇ 2 ਸਾਲ ਦੀ ਪਾਬੰਦੀ ਲਗਾਈ ਹੈ। ਸ਼ਾਕਿਬ ਨੇ ਵੀ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਕਿਹਾ ਸੀ ਕਿ ਮੈਨੂੰ ਬਹੁਤ ਦੁੱਖ ਹੈ ਕਿ ਜਿਸ ਖੇਡ ਨਾਲ ਮੈਂ ਬਹੁਤ ਪਿਆਰ ਕਰਦਾ ਹਾਂ ਉਸ 'ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ ਪਰ ਆਈ. ਸੀ. ਸੀ. ਨੂੰ ਨਾ ਦੱਸਣ ਲਈ ਮੈਂ ਆਪਣੀ ਗਲਤੀ ਅਤੇ ਇਸ ਪਾਬੰਦੀ ਨੂੰ ਸਵੀਕਾਰ ਕਰਦਾ ਹਾਂ।