ਲੰਡਨ ਸਪਿਰਿਟ ਨੇ ਬਰਮਿੰਘਮ ਫਿਨਿਕਸ ਨੂੰ 7 ਵਿਕਟਾਂ ਨਾਲ ਹਰਾਇਆ

ਸਪੋਰਟਸ ਡੈਸਕ- ਪੁਰਸ਼ 'ਦ ਹੰਡਰਡ' 2026 ਟੂਰਨਾਮੈਂਟ ਵਿੱਚ ਲੰਡਨ ਸਪਿਰਿਟ ਨੇ ਟਾਸ ਜਿੱਤ ਕੇ ਪਹਿਲਾਂ ਗੇਂਦਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਪਹਿਲਾਂ ਬੱਲੇਬਾਜ਼ੀ ਕਰਦਿਆਂ ਬਰਮਿੰਘਮ ਫੀਨਿਕਸ ਨੇ ਨਿਰਧਾਰਤ 100 ਗੇਂਦਾਂ ਵਿੱਚ 4 ਵਿਕਟਾਂ ਦੇ ਨੁਕਸਾਨ 'ਤੇ 162 ਦੌੜਾਂ ਬਣਾਈਆਂ। ਸ਼ੁਰੂਆਤੀ ਬੱਲੇਬਾਜ਼ਾਂ (ਮਿਚੇਲ ਓਵੇਨ, ਜੋ ਵੈਦਰਲੀ ਅਤੇ ਲੌਰੀ ਇਵਾਂਸ) ਦੇ ਸਸਤੇ ਵਿੱਚ ਆਊਟ ਹੋਣ ਤੋਂ ਬਾਅਦ, ਜੋ ਕਲਾਰਕ (73 ਦੌੜਾਂ) ਅਤੇ ਸ਼ਾਨ ਡਿਕਸਨ (ਨਾਬਾਦ 51 ਦੌੜਾਂ) ਨੇ 47 ਗੇਂਦਾਂ ਵਿੱਚ 92 ਦੌੜਾਂ ਦੀ ਸ਼ਾਨਦਾਰ ਸਾਂਝੇਦਾਰੀ ਕਰਕੇ ਪਾਰੀ ਨੂੰ ਸੰਭਾਲਿਆ ਅਤੇ ਅਖੀਰ ਵਿੱਚ ਡੋਨੋਵਨ ਫਰੇਰਾ ਦੇ ਤੇਜ਼ ਰਨਾਂ ਦੀ ਮਦਦ ਨਾਲ ਟੀਮ ਨੇ ਇੱਕ ਮਜ਼ਬੂਤ ਸਕੋਰ ਖੜ੍ਹਾ ਕੀਤਾ।

ਜਵਾਬ ਵਿੱਚ, ਲੰਡਨ ਸਪਿਰਿਟ ਨੇ 18 ਗੇਂਦਾਂ ਬਾਕੀ ਰਹਿੰਦਿਆਂ 7 ਵਿਕਟਾਂ ਨਾਲ ਸ਼ਾਨਦਾਰ ਜਿੱਤ ਦਰਜ ਕੀਤੀ। ਹਾਲਾਂਕਿ ਜੌਨੀ ਬੇਅਰਸਟੋ ਅਤੇ ਲੁਆਨ-ਡ੍ਰੇ ਪ੍ਰੇਟੋਰੀਅਸ ਜਲਦੀ ਆਊਟ ਹੋ ਗਏ ਸਨ, ਪਰ ਕਪਤਾਨ ਲਿਆਮ ਲਿਵਿੰਗਸਟੋਨ (30 ਗੇਂਦਾਂ ਵਿੱਚ 66 ਦੌੜਾਂ) ਅਤੇ ਡੇਵਾਲਡ ਬ੍ਰੇਵਿਸ (31 ਗੇਂਦਾਂ ਵਿੱਚ ਨਾਬਾਦ 55 ਦੌੜਾਂ) ਨੇ ਮਹਿਜ਼ 47 ਗੇਂਦਾਂ ਵਿੱਚ 103 ਦੌੜਾਂ ਦੀ ਤੂਫ਼ਾਨੀ ਸਾਂਝੇਦਾਰੀ ਕਰਕੇ ਮੈਚ ਨੂੰ ਪੂਰੀ ਤਰ੍ਹਾਂ ਫੀਨਿਕਸ ਤੋਂ ਖੋਹ ਲਿਆ। ਲਿਵਿੰਗਸਟੋਨ ਦੇ ਆਊਟ ਹੋਣ ਤੋਂ ਬਾਅਦ ਬ੍ਰੇਵਿਸ ਨੇ ਰੇਹਾਨ ਅਹਿਮਦ ਦੀਆਂ ਗੇਂਦਾਂ 'ਤੇ ਲਗਾਤਾਰ ਦੋ ਚੌਕੇ ਜੜ ਕੇ ਟੀਮ ਨੂੰ ਜਿੱਤ ਦਿਵਾਈ। ਇਹ ਲੰਡਨ ਸਪਿਰਿਟ ਦੀ ਸੀਜ਼ਨ ਦੀ ਦੂਜੀ ਜਿੱਤ ਹੈ, ਜਦਕਿ ਫੀਨਿਕਸ ਸੱਤ ਮੈਚਾਂ ਵਿੱਚ ਸਿਰਫ਼ ਇੱਕ ਜਿੱਤ ਨਾਲ ਅੰਕ ਤਾਲਿਕਾ ਵਿੱਚ ਸਭ ਤੋਂ ਹੇਠਲੇ ਸਥਾਨ 'ਤੇ ਹੈ।