ਰਣਜੀ ਟਰਾਫੀ ਫਾਈਨਲ ਦੇ ਆਖਰੀ ਦਿਨ ਮੁੰਬਈ ਲਈ ਮੈਦਾਨ ''ਚ ਉਤਰਨਗੇ ਅਈਅਰ

ਮੁੰਬਈ, (ਭਾਸ਼ਾ) ਮੁੰਬਈ ਦੇ ਬੱਲੇਬਾਜ਼ ਸ਼੍ਰੇਅਸ ਅਈਅਰ ਪਿੱਠ ਦੀ ਸੱਟ ਤੋਂ ਉਭਰਦੇ ਹੋਏ ਵੀਰਵਾਰ ਨੂੰ ਰਣਜੀ ਟਰਾਫੀ ਫਾਈਨਲ ਦੇ ਪੰਜਵੇਂ ਅਤੇ ਆਖਰੀ ਦਿਨ ਵਿਦਰਭ ਦੇ ਖਿਲਾਫ ਮੈਦਾਨ 'ਚ ਉਤਰਨਗੇ। ਵਾਨਖੇੜੇ ਸਟੇਡੀਅਮ 'ਚ ਵਿਦਰਭ ਖਿਲਾਫ ਫਾਈਨਲ ਦੇ ਤੀਜੇ ਦਿਨ 95 ਦੌੜਾਂ ਦੀ ਪਾਰੀ ਖੇਡ ਕੇ ਮੈਚ 'ਚ ਮੁੰਬਈ ਦਾ ਦਬਦਬਾ ਬਣਾਉਣ 'ਚ ਯੋਗਦਾਨ ਦੇਣ ਵਾਲੇ ਅਈਅਰ ਬੁੱਧਵਾਰ ਨੂੰ ਖੇਡ ਦੇ ਚੌਥੇ ਦਿਨ ਮੈਦਾਨ 'ਤੇ ਮੌਜੂਦ ਨਹੀਂ ਰਹੇ। 

ਇਸ ਦੌਰਾਨ ਵਿਦਰਭ ਦੇ ਬੱਲੇਬਾਜ਼ਾਂ ਨੇ ਬਹੁਤ ਧੀਰਜ ਅਤੇ ਸਾਹਸ ਦਾ ਪ੍ਰਦਰਸ਼ਨ ਕੀਤਾ ਅਤੇ ਸੰਭਾਵਿਤ ਜਿੱਤ ਲਈ ਮੁੰਬਈ ਦੀ ਉਡੀਕ ਨੂੰ ਲੰਮਾ ਕਰ ਦਿੱਤਾ। ਜਿੱਤ ਲਈ 538 ਦੌੜਾਂ ਦੇ ਔਖੇ ਟੀਚੇ ਦਾ ਪਿੱਛਾ ਕਰਦੇ ਹੋਏ ਵਿਦਰਭ ਨੇ ਪੰਜ ਵਿਕਟਾਂ 'ਤੇ 248 ਦੌੜਾਂ ਬਣਾ ਕੇ ਮੈਚ ਨੂੰ ਜਿਊਂਦਾ ਰੱਖਿਆ। ਮੁੰਬਈ ਟੀਮ ਦੇ ਇੱਕ ਸੂਤਰ ਨੇ ਚੌਥੇ ਦਿਨ ਦੀ ਖੇਡ ਤੋਂ ਬਾਅਦ ਪੁਸ਼ਟੀ ਕੀਤੀ ਕਿ ਅਈਅਰ ਪਿੱਠ ਨਾਲ ਸਬੰਧਤ ਸਮੱਸਿਆ ਤੋਂ ਠੀਕ ਹੋ ਗਿਆ ਹੈ ਅਤੇ ਇਸ ਰਣਜੀ ਟਰਾਫੀ ਸੀਜ਼ਨ ਦੇ ਆਖਰੀ ਦਿਨ ਮੈਦਾਨ ਵਿੱਚ ਉਤਰਨ ਲਈ ਉਪਲਬਧ ਹੋਵੇਗਾ। ਮੰਨਿਆ ਜਾ ਰਿਹਾ ਹੈ ਕਿ ਬੀ. ਸੀ. ਸੀ. ਆਈ. ਨੇ ਰਾਸ਼ਟਰੀ ਟੀਮ ਨਾਲ ਨਾ ਹੋਣ ਦੇ ਬਾਵਜੂਦ ਰਣਜੀ ਟਰਾਫੀ ਮੈਚਾਂ ਨੂੰ ਨਜ਼ਰਅੰਦਾਜ਼ ਕਰਨ ਲਈ ਅਈਅਰ ਅਤੇ ਈਸ਼ਾਨ ਕਿਸ਼ਨ ਨੂੰ ਬੋਰਡ ਦੇ ਸਾਲਾਨਾ ਕਰਾਰ ਤੋਂ ਬਾਹਰ ਕਰ ਦਿੱਤਾ ਹੈ।