India vs Bangladesh 2nd ODI: ਬੰਗਲਾਦੇਸ਼ ਨੇ ਭਾਰਤ ਨੂੰ ਦਿੱਤਾ 272 ਦੌੜਾਂ ਦਾ ਟੀਚਾ

ਮੀਰਪੁਰ (ਵਾਰਤਾ)- ਬੰਗਲਾਦੇਸ਼ ਨੇ ਮੇਹਿਦੀ ਹਸਨ ਮਿਰਾਜ਼ (ਅਜੇਤੂ 100) ਦੇ ਸੈਂਕੜੇ ਅਤੇ ਮਹਿਮੂਦੁੱਲਾ ਰਿਆਦ (77) ਦੇ ਅਰਧ ਸੈਂਕੜੇ ਦੀ ਬਦੌਲਤ ਬੁੱਧਵਾਰ ਨੂੰ ਦੂਜੇ ਵਨਡੇ ਵਿੱਚ ਭਾਰਤ ਦੇ ਸਾਹਮਣੇ 272 ਦੌੜਾਂ ਦਾ ਟੀਚਾ ਰੱਖਿਆ। ਟਾਸ ਜਿੱਤ ਕੇ ਬੱਲੇਬਾਜ਼ੀ ਕਰਨ ਉਤਰੀ ਬੰਗਲਾਦੇਸ਼ ਨੇ 69 ਦੌੜਾਂ 'ਤੇ 6 ਵਿਕਟਾਂ ਗੁਆ ਦਿੱਤੀਆਂ ਸਨ ਪਰ ਮਹਿਮੂਦੁੱਲਾ-ਮਿਰਾਜ਼ ਦੀ ਜੋੜੀ ਨੇ ਸੱਤਵੀਂ ਵਿਕਟ ਲਈ 148 ਦੌੜਾਂ ਦੀ ਸਾਂਝੇਦਾਰੀ ਕਰਕੇ ਟੀਮ ਨੂੰ ਸਨਮਾਨਜਨਕ ਸਕੋਰ ਤੱਕ ਪਹੁੰਚਾਇਆ। ਭਾਰਤ ਨੇ ਟਾਸ ਹਾਰ ਕੇ ਗੇਂਦ ਨਾਲ ਚੰਗੀ ਸ਼ੁਰੂਆਤ ਕੀਤੀ। ਦੀਪਕ ਚਾਹਰ ਨੇ ਜਿੱਥੇ ਆਪਣੀ ਸਵਿੰਗ ਗੇਂਦਬਾਜ਼ੀ ਨਾਲ ਬੱਲੇਬਾਜ਼ਾਂ ਨੂੰ ਦੁਵਿਧਾ ਵਿੱਚ ਰੱਖਿਆ, ਉਥੇ ਹੀ ਮੁਹੰਮਦ ਸਿਰਾਜ ਨੇ ਅਨਾਮੁਲ ਹੱਕ (11) ਅਤੇ ਲਿਟਨ ਦਾਸ (7) ਨੂੰ ਛੋਟੇ ਸਕੋਰ 'ਤੇ ਪੈਵੇਲੀਅਨ ਭੇਜਿਆ। ਨਜਮੁਲ ਹਸਨ ਸ਼ਾਂਤੋ 3 ਚੌਕਿਆਂ ਦੀ ਮਦਦ ਨਾਲ 21 ਦੌੜਾਂ ਬਣਾ ਕੇ ਲੈਅ ਵਿਚ ਨਜ਼ਰ ਆ ਰਿਹਾ ਸੀ ਪਰ ਉਮਰਾਨ ਮਲਿਕ ਨੇ ਉਸ ਨੂੰ 151 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਰਫਤਾਰ ਨਾਲ ਬੋਲਡ ਕਰ ਦਿੱਤਾ। ਪਹਿਲਾ ਪਾਵਰਪਲੇ ਖਤਮ ਹੋਣ ਤੋਂ ਬਾਅਦ ਕਪਤਾਨ ਲੋਕੇਸ਼ ਰਾਹੁਲ ਨੇ ਗੇਂਦ ਵਾਸ਼ਿੰਗਟਨ ਸੁੰਦਰ ਨੂੰ ਸੌਂਪ ਦਿੱਤੀ।

ਸੁੰਦਰ ਨੇ ਸ਼ਾਕਿਬ ਅਲ ਹਸਨ, ਮੁਸ਼ਫਿਕੁਰ ਰਹੀਮ ਅਤੇ ਅਫੀਫ ਹੁਸੈਨ ਨੂੰ ਆਊਟ ਕਰ ਦਿੱਤਾ, ਜਿਸ ਨਾਲ ਬੰਗਲਾਦੇਸ਼ ਨੂੰ 69/6 ਦੇ ਸਕੋਰ ਨਾਲ ਸੰਕਟ ਵਿਚ ਪਹੁੰਚ ਗਈ। ਮਹਿਮੂਦੁੱਲਾ ਅਤੇ ਮਿਰਾਜ਼ ਨੇ ਇੱਥੋਂ ਬੰਗਲਾਦੇਸ਼ ਦੀ ਪਾਰੀ ਨੂੰ ਸੰਭਾਲਿਆ ਅਤੇ ਉਸ ਨੂੰ 200 ਦੌੜਾਂ ਦੇ ਪਾਰ ਪਹੁੰਚਾਇਆ। ਮਹਿਮੂਦੁੱਲਾ ਨੇ ਸ਼ੁਰੂਆਤ 'ਚ ਹੌਲੀ ਬੱਲੇਬਾਜ਼ੀ ਕੀਤੀ ਜਦਕਿ ਮਿਰਾਜ਼ ਨੇ ਧਮਾਕੇਦਾਰ ਬੱਲੇਬਾਜ਼ੀ ਕੀਤੀ। ਮਹਿਮੂਦੁੱਲਾ ਨੇ ਵੀ ਸੈਂਕੜੇ ਵਾਲੀ ਸਾਂਝੇਦਾਰੀ ਤੋਂ ਬਾਅਦ ਆਪਣੇ ਹੱਥ ਖੋਲ੍ਹੇ, ਹਾਲਾਂਕਿ ਉਹ 96 ਗੇਂਦਾਂ 'ਤੇ 7 ਚੌਕਿਆਂ ਦੀ ਮਦਦ ਨਾਲ 77 ਦੌੜਾਂ ਬਣਾ ਕੇ ਉਮਰਾਨ ਦਾ ਸ਼ਿਕਾਰ ਹੋ ਗਿਆ। ਉਸ ਨੇ ਆਊਟ ਹੋਣ ਤੋਂ ਪਹਿਲਾਂ ਮਿਰਾਜ਼ ਦੇ ਨਾਲ 148 ਦੌੜਾਂ ਜੋੜੀਆਂ, ਜੋ ਇੱਕ ਰੋਜ਼ਾ ਕ੍ਰਿਕਟ ਵਿੱਚ ਭਾਰਤ ਖ਼ਿਲਾਫ਼ 7ਵੀਂ ਵਿਕਟ ਲਈ ਸਭ ਤੋਂ ਵੱਡੀ ਸਾਂਝੇਦਾਰੀ ਹੈ। ਨੌਵੇਂ ਨੰਬਰ 'ਤੇ ਬੱਲੇਬਾਜ਼ੀ ਕਰਨ ਆਏ ਨਸਾਮ ਅਹਿਮਦ ਨੇ ਵੀ ਧਮਾਕੇਦਾਰ ਬੱਲੇਬਾਜ਼ੀ ਕੀਤੀ ਅਤੇ ਮਿਰਾਜ਼ ਨਾਲ 8ਵੀਂ ਵਿਕਟ ਲਈ 23 ਗੇਂਦਾਂ 'ਚ 54 ਦੌੜਾਂ ਦੀ ਸਾਂਝੇਦਾਰੀ ਕਰਕੇ ਬੰਗਲਾਦੇਸ਼ ਨੂੰ 271/7 ਦੇ ਸਕੋਰ ਤੱਕ ਪਹੁੰਚਾਇਆ। ਨਸਾਮ ਨੇ 11 ਗੇਂਦਾਂ 'ਤੇ 2 ਚੌਕਿਆਂ ਅਤੇ 1 ਛੱਕੇ ਦੀ ਮਦਦ ਨਾਲ ਅਜੇਤੂ 18 ਦੌੜਾਂ ਬਣਾਈਆਂ, ਜਦਕਿ ਪਾਰੀ ਦੀ ਆਖਰੀ ਗੇਂਦ 'ਤੇ ਸੈਂਕੜਾ ਲਗਾਉਣ ਵਾਲੇ ਮਿਰਾਜ਼ ਨੇ 83 ਗੇਂਦਾਂ 'ਤੇ 8 ਚੌਕਿਆਂ ਅਤੇ 4 ਛੱਕਿਆਂ ਦੀ ਮਦਦ ਨਾਲ 100 ਦੌੜਾਂ ਬਣਾਈਆਂ। ਭਾਰਤ ਲਈ ਸੁੰਦਰ ਨੇ 10 ਓਵਰਾਂ ਵਿੱਚ 37 ਦੌੜਾਂ ਦੇ ਕੇ 3 ਵਿਕਟਾਂ ਲਈਆਂ, ਜਦਕਿ ਉਮਰਾਨ ਮਲਿਕ ਨੇ 10 ਓਵਰਾਂ ਵਿੱਚ 58 ਦੌੜਾਂ ਦੇ ਕੇ 2 ਵਿਕਟਾਂ ਲਈਆਂ। ਮੁਹੰਮਦ ਸਿਰਾਜ ਨੇ ਵੀ 2 ਵਿਕਟਾਂ ਆਪਣੇ ਨਾਂ ਕੀਤੀਆਂ, ਹਾਲਾਂਕਿ ਉਹ 10 ਓਵਰਾਂ ਵਿੱਚ 73 ਦੌੜਾਂ ਦੇ ਕੇ ਮਹਿੰਗਾ ਸਾਬਤ ਹੋਇਆ।